Salimo 139:1-24
Kwa wakulongozga sumu. Salimo la Davide. Sumu.
139 A Yehova, mwanisanda ndipo mukunimanya.+
2 Mukumanya para nkhukhala pasi na para nkhuwuka.+
Maghanoghano ghane mukughamanyira patali.+
3 Mukuniwona* para nkhwenda na para nkhugona,Mendero ghane ghose muli kuzgoŵerana nagho.+
4 Pambere lulimi lwane lundayowoye mazgu,Wonani, imwe mwaghamanya kale, A Yehova.+
5 Imwe mukunizingilizga, kumanyuma na kunthazi.Mukuŵika woko linu pa ine.
6 Kumanya kwanthena kwanimara mahara.*
Nkhwapachanya, ningafikapo yayi.*+
7 Kasi ningaluta nkhu kuti nigwenthe mzimu winu,Ningachimbilira nkhu kufumako ku chisko chinu?+
8 Usange ningakwelera kuchanya, imwe muŵenge kwenekuko,Usange ningatandika chakugonapo chane mu Dindi,* imwe muŵenge mwenemumo.+
9 Usange ningatora mapapindo gha matandakucha na kudukira kutali,Kuti nkhakhale ku nyanja yakutali chomene,
10 Kura nako woko linu lamunilongozgaNdipo woko linu lamalyero lamunikora.+
11 Usange nkhuti: “Chisi chinibisenge nadi!”
Mbwenu usiku uwo wanizingilizga uŵenge ungweru.
12 Nanga ni chisi chiŵenge mdima chara kwa imwe,Kweni usiku ungwelukenge nga ni muhanya.+Kwa imwe chisi chikuyana waka na ungweru.+
13 Pakuti ndimwe mukapanga ziso* zane.Mukanivungilizga* mu nthumbo ya amama.+
14 Nkhumulumbani chifukwa mu nthowa yakofya nili kupangika mwakuzizwiska.+
Milimo yinu njakuzizwiska,+Fundo iyi nkhuyimanya makora nkhanira.
15 Viwangwa vyane vikabisika chara kwa imweApo nkhapangikanga ku udesi,Apo nkhalukikanga kusi chomene kwa charu.+
16 Maso ghinu ghakaniwona nkhati namba waka kupangika mu nthumbo,Viŵaro vyane vyose vikalembeka mu buku linuKuyana na mazuŵa agho vikapangikira,Pambere chilichose cha ivyo chindaŵeko.
17 Ntheura, maghanoghano ghinu ngakuzirwa nadi kwa ine!+
A Chiuta, ghose pamoza nganandi chomene!+
18 Usange ningayezga kughapenda, ghakuluska unandi wa mchenga.+
Para nkhuwuka mu tulo, nkhuŵa kuti nichali namwe.*+
19 A Chiuta, muŵenge kuti mwakoma ŵaheni,+
Mphanyi ŵanthu ŵankhaza* ŵafumako kwa ine,
20 Awo na chilato chiheni* ŵakuyowoya vinthu kwimikana namwe.Mbakupindikana namwe awo ŵakuzunura zina linu mwambura kwenelera.+
21 A Yehova, asi nkhutinkha awo ŵakumutinkhani,+Na kuseluka nawo awo ŵakumugalukirani?+
22 Nkhuŵatinkha chomene,+Ŵazgoka ŵalwani ŵane.
23 Nisandani, A Chiuta, na kumanya mtima wane.+
Nipimani, na kumanya vyenjezgo vya mu maghanoghano ghane.+
24 Wonani usange panji mungaŵa kendero kakupweteka mwa ine,+Ndipo nilongozgerani+ mu nthowa ya muyirayira.
Mazgu Ghamusi
^ Mazgu gheneko, “Mukunipima.”
^ Panji kuti, “kwanitindika chomene.”
^ Panji kuti, “nkhwakusuzga kuti nipulikiske.”
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
^ Pangayowoyekaso kuti, “Mukanitaŵilira.”
^ Mazgu ghanyake, “sana; figho.”
^ Pangayowoyekaso kuti, “niŵenge kuti nichali kughapenda.”
^ Panji kuti, “ŵakuthiska ndopa.”
^ Panji kuti, “kuyana na fundo zawo.”
