Salimo 147:1-20
147 Lumbani Ya!*
Ntchiwemi kwimbira malumbo Chiuta withu.Ntchakukondweska na chakwenelera nadi kumulumba.+
2 Yehova wakuzenga Yerusalemu.+Wakuwunganya pamoza Ŵaisrayeli ŵakumbininika.+
3 Wakuchizga ŵakusweka mtima,Wakukaka vilonda vyawo.
4 Wakupenda unandi wa nyenyezi.Yiliyose wakuyichema zina.+
5 Fumu yithu njikuru na yakukhora mu nkhongono.+Umanyi wake ngwambura kupimika.+
6 Yehova wakuwuska ŵakuzika,+Kweni ŵaheni wakuŵaponya pasi.
7 Mwimbirani Yehova pamoza na kuwonga.Yimbirani malumbo Chiuta withu, pamoza na bango,
8 Uyo wakubenekelera mitambo na mabingu,Uyo wakulokweska vula pa charu chapasi,+Uyo wakumezga utheka pa mapiri.+
9 Wakupeleka chakurya ku vinyama,+Ku ŵana ŵa chaholi awo ŵakulilira chakurya.+
10 Nkhongono za hachi wakukondwa nazo yayi,+Panji kutoleka mtima na malundi ghankhongono gha munthu.+
11 Yehova wakukondwa na awo ŵakumopa,+Awo ŵakulindilira lusungu* lwake.+
12 Peleka uchindami kwa Yehova, iwe Yerusalemu.
Lumba Chiuta wako, iwe Ziyoni.
13 Wakukhozga mphingilizgo za vipata vya msumba wako.Wakutumbika ŵana ŵako mukati mwako.
14 Wakupeleka mtende ku chigaŵa chako.+Wakukukhutiska na tirigu muwemi.*+
15 Wakutuma dango lake ku charu chapasi.Mazgu ghake ghakuchimbira luŵiro.
16 Wakutuma chiwuvi nga ni weya.+Wakuchupura chiwuvi chakukhoma nga ni vyoto.+
17 Wakuponya matalala nga ni vimenyu vya chingwa.+
Ni njani wangima ku kuzizima kwake?+
18 Wakutuma mazgu ghake, ndipo ghakusongonoka.
Wakuputiska mphepo yake,+ ndipo maji ghakwenda.
19 Wakuphalira Yakhobe mazgu ghake,Malango na vyeruzgo vyake kwa Israyeli.+
20 Wandachitepo nthena na mtundu unyake.+Ŵakumanya chara vyeruzgo vyake.
Lumbani Ya!*+
Mazgu Ghamusi
^ Panji kuti, “Aleluya.” “Ya” nkhudumura kwa zina lakuti Yehova.
^ Panji kuti, “chitemwa chakugomezgeka.”
^ Mazgu gheneko, “wa mafuta.”
^ Panji kuti, “Aleluya.” “Ya” nkhudumura kwa zina lakuti Yehova.
