Salimo 27:1-14
Salimo la Davide.
27 Yehova ni ungweru+ wane na chiponosko chane.
Kasi niwopenge njani?+
Yehova ni linga lakukhora la umoyo wane.+
Kasi nitenthemenge na njani?
2 Ŵanthu ŵaheni ŵakati ŵaniwukira kuti ŵarye thupi lane,+Ŵakupindikana nane na ŵalwani ŵane ndiwo ŵakakhuŵara na kuwa.
3 Nanga ŵasilikari ŵangajintha misasa kuti ŵimikane nane,Mtima wane wopenge chara.+
Nanga nkhondo yinganiwira,Niŵenge na chigomezgo nipera.
4 Pali chinthu chimoza icho napempha kwa YehovaNdicho nipenjenge,Chakuti nikhalenge mu nyumba ya Yehova mazuŵa ghose gha umoyo wane,+Kuti nidodoliskenge uwemi wa YehovaNa kudaŵira tempile lake.*+
5 Pakuti mu zuŵa la soka wanibisenge mu chakujoŵamo chake.+Wanijoŵeskenge mu malo ghakubisika gha hema lake.+Waniŵikenge pachanya pa jalawe.+
6 Sono mutu wane uli pachanya pa ŵalwani ŵane awo ŵanizingilizga.Nipelekenge sembe pa hema lake na chimwemwe chikuru.Nimbirenge Yehova malumbo.
7 Nipulikani, A Yehova, para nkhulira,+Nilongorani lusungu na kunizgora.+
8 Mtima wane ukuyowoya vya languro linu lakuti:
“Penja chisko chane.”
Nipenjenge chisko chinu, A Yehova.+
9 Mungabisanga chisko chinu kwa ine chara.+
Mu ukali winu, mungachimbizgiranga kutali chara muteŵeti winu.
Ndimwe movwiri wane,+Munganitayanga yayi panji kunisida, Chiuta wane wa chiponosko.
10 Nanga adada na amama ŵanganisida,+Yehova wanitorenge.+
11 Nisambizgani nthowa yinu, A Yehova,+Nilongozgani mu nthowa yakunyoloka chifukwa cha ŵalwani ŵane.
12 Munganipelekanga yayi ku awo ŵakupindikana nane.+Pakuti ŵakaboni ŵatesi ŵaniwukira,+Ndipo ŵakunofya na nkhaza.
13 Kasi mphanyi nili nkhu niŵavyenge chipulikanoChakuti niwonenge uwemi wa Yehova mu charu cha ŵamoyo?*+
14 Gomezga Yehova.+Uŵe wakukhwima na wakukhora mu mtima.+
Nadi, gomezga Yehova.
Mazgu Ghamusi
^ Panji kuti, “malo ghakupatulika.”
^ Pangayowoyekaso kuti, “Nadi, nili na chipulikano kuti niwonenge uwemi wa Yehova mu charu cha ŵamoyo.”
