Salimo 33:1-22
33 Chemerezgani na chimwemwe, imwe ŵarunji, chifukwa cha Yehova.+
Ntchakwenelera kuti ŵakunyoloka ŵamulumbenge.
2 Wongani Yehova na bango.Muyimbirani malumbo pa chakwimbira cha vingwe 10.
3 Muyimbirani sumu yiphya.+Lizgani vingwe mwaluso, pamoza na kukoŵerana mwachimwemwe.
4 Pakuti mazgu gha Yehova ngakunyoloka,+Ndipo chose icho wakuchita ntchakugomezgeka.
5 Iyo wakutemwa urunji na weruzgi wakunyoloka.+
Charu chapasi ntchakuzura na lusungu* lwa Yehova.+
6 Machanya ghakapangika na mazgu gha Yehova,+Mawumba ghake ghose* na mzimu* wa mulomo wake.
7 Wakuwunjika maji gha mu nyanja nga ntchiziŵa.+Wakuŵika maji ghakututuka mu vyakusungiramo.
8 Charu chose chapasi chiwope Yehova.+
Awo ŵakukhala pa charu ŵatentheme na iyo.
9 Pakuti wakayowoya, ndipo chikachitika.+Wakalangura, ndipo chikakhozgeka.+
10 Yehova wapindingura viŵembu vya mitundu.+Watimbanizga maghanoghano gha ŵanthu.+
11 Kweni fundo za Yehova ziyimenge muyirayira.+Maghanoghano gha mtima wake nga ku muwiro na muwiro.
12 Ngwakukondwa mtundu uwo Chiuta wake ni Yehova,+Ŵanthu awo waŵasora kuŵa chiharo chake.+
13 Yehova wakulaŵiska pasi kufuma kuchanya,Wakuwona ŵana wose ŵa ŵanthu.+
14 Wakudodoliska pa awo ŵakukhala pa charu chapasiKufuma ku malo ghake ghakukhalamo.
15 Ndiyo wakupanga mitima ya wose.Wakusanda milimo yawo yose.+
16 Palije themba ilo likuponoskeka chifukwa cha unandi wa ŵankhondo.+Chinkhara chikuponoskeka chifukwa cha nkhongono zake zikuru chara.+
17 Hachi ntchigomezgo chautesi pa nkhani ya chiponosko,+Nkhongono zake zikuru zingathaska chara.
18 Wonani! Jiso la Yehova likulaŵiska awo ŵakumopa,+Awo ŵakulindilira lusungu* lwake,
19 Kuti waŵathaske ku nyifwa,Na kuŵasunga ŵamoyo mu nyengo ya njara.+
20 Tikulindizga* Yehova.
Ndiyo movwiri withu na chiskango chithu.+
21 Mitima yithu yikusekelera mwa iyo,Chifukwa tikuthemba zina lake lituŵa.+
22 A Yehova, mphanyi lusungu* lwinu lwakhala pa ise,+Apo tikulindilira imwe.+
Mazgu Ghamusi
^ Panji kuti, “chitemwa chakugomezgeka.”
^ Panji kuti, “Vyose ivyo vilimo.”
^ Panji kuti, “mvuchi.”
^ Panji kuti, “chitemwa chakugomezgeka.”
^ Panji kuti, “Umoyo withu ukulindizga.”
^ Panji kuti, “chitemwa chakugomezgeka.”
