Salimo 44:1-26
Kwa wakulongozga sumu. Salimo la ŵana ŵa Kora.+ Masikilu.*
44 A Chiuta, tapulika na makutu ghithu,Ŵasekuru ŵithu ŵali kutiphalira,+Milimo iyo mukachita mu mazuŵa ghawo,Mu mazuŵa ghakale chomene.
2 Mukachimbizga mitundu na woko linu,+Mukaŵakhazika ŵasekuru ŵithu mwenemura.+
Mukathereska mitundu na kuyifumiskamo.+
3 Ŵakapoka charu na lupanga lwawo chara,+Ŵakatonda na woko lawo chara.+
Kweni ntchifukwa cha woko linu lamalyero, mkono+ winu, na ungweru wa chisko chinu,Chifukwa mukakondwa nawo.+
4 A Chiuta, ndimwe Themba lane.+Langurani kuti Yakhobe watonde.
5 Na nkhongono zinu tiwiskenge ŵalwani ŵithu.+Mu zina linu tiŵadyakirenge pasi awo ŵakutiwukira.+
6 Pakuti nkhuthemba uta wane chara,Ndipo lupanga lwane lunganiponoska yayi.+
7 Ndimwe mukatiponoska ku ŵalwani ŵithu,+Mukaŵalengeska awo ŵakutitinkha.
8 Nyengo zose tipelekenge malumbo kwa Chiuta,Ndipo tiwongenge zina linu muyirayira. (Selah)
9 Kweni sono mwatitaya na kutikhozga soni,Mukuluta nase chara ku nkhondo.
10 Mwazomerezga ŵalwani ŵithu kutichimbizga.+Awo ŵakutitinkha ŵakuyora chilichose icho ŵakhumba.
11 Mwatipeleka kuti tiryeke nga ni mberere.Mwatimbininiskira mu ŵamitundu.+
12 Mukuguliska ŵanthu ŵinu kwawaka,+Mukusangapo chandulo chara pakuŵaguliska.*
13 Mukutizgora chinthu icho ŵazengezgani ŵithu ŵakuchiyowoyera msinjiro,Wose awo ŵatizingilizga ŵakutigoska na kutihoya.
14 Mukutizgora chinthu icho ŵamitundu ŵakuchinyoza,+Taŵa chinthu icho ŵanthu ŵakupukunyirapo mitu.
15 Zuŵa lose nkhulengeskeka,Ndipo soni zikunikora,
16 Pakupulika misinjiro yawo na vitusi,Chifukwa cha mulwani withu uyo wakutiwezgera nduzga.
17 Vyose ivi vyatiwira, kweni ise tindamuluwani,Ndipo tindaswe phangano linu.+
18 Mtima withu undapatuke,Malundi ghithu ghandapuluke mu nthowa yinu.
19 Kweni mwatitekenyulira uko ŵakambwe ŵakukhala,Mwatibenekelera na mfwiri wa bii.
20 Usange taluwa zina la Chiuta withuPanji usange tikutumphuskira mawoko ghithu kwa chiuta wachilendo mu lurombo,
21 Asi Chiuta wavibowozgenge?
Iyo wakumanya vinthu vyakubisika vya mu mtima.+
22 Pakuti tikukomeka zuŵa lose chifukwa cha imwe.Tili nga ni mberere izo zikwenera kukomeka.+
23 Jiwuskani, A Yehova. Chifukwa wuli muchali kugona?+
Wukani! Mungatitayanga muyirayira chara.+
24 Mukubisirachi chisko chinu?
Mukuluwirachi visuzgo vithu na kuyuzgika kwithu?
25 Pakuti taponyeka pa fuvu.Mathupi ghithu ghakunyekezgekera pasi.+
26 Wukani pakuŵa movwiri withu!+
Tithaskani* chifukwa cha lusungu* lwinu.+
Mazgu Ghamusi
^ Wonani Mang’anamuro gha Mazgu.
^ Panji kuti, “pa mtengo uwo mwapima pa iwo.”
^ Panji kuti, “Tiwomborani.”
^ Panji kuti, “chitemwa chakugomezgeka.”
