Salimo 9:1-20
Kwa wakulongozga sumu pa Muti-labeni.* Sumu ya Davide.
א [Aleph]
9 Nimulumbaninge, A Yehova, na mtima wane wose.Nipharazgenge milimo yinu yose yakuzizwiska.+
2 Nisekelerenge na kuzaya mwa imwe,Nimbirenge malumbo zina linu, mwe Wapachanya Nkhanira.+
ב [Beth]
3 Para ŵalwani ŵane ŵakuwelera,+Ŵakhuŵarenge na kumara pamaso pinu.
4 Pakuti imwe mukwimira mulandu wane,Mukukhala pa chitengo chinu na kweruzga mu urunji.+
ג [Gimel]
5 Mwachenya mitundu+ na kuparanya ŵaheni,Mwasisita zina lawo muyirayira swii.
6 Mulwani waparanyikirathu,Mwapankhura misumba yawo,Chikumbukiro chawo chose chimalenge.+
ה [He]
7 Kweni Yehova wali pa chitengo chake muyirayira,+Wakhozga nkhanira mpando wake wachifumu kuti weruzge mu urunji.+
8 Weruzgenge mu urunji charu icho mukukhala ŵanthu.+Wadumulenge mulandu wa mitundu mwaurunji.+
ו [Waw]
9 Yehova waŵenge chigongwe chakukhora ku ŵakuyuzgika,+Chigongwe chakukhora mu nyengo za suzgo.+
10 Awo ŵakumanya zina linu ŵamuthembaninge,+Awo ŵakumupenjani, A Yehova, muŵasidenge chara.+
ז [Zayin]
11 Yimbirani malumbo Yehova, uyo wakukhala mu Ziyoni.Pharazgani milimo yake mukati mu ŵanthu.+
12 Pakuti uyo wakuwezgera nduzga ndopa zawo wakuŵakumbuka.+Waluwenge chara kulira kwa ŵakusuzgika.+
ח [Heth]
13 Nilengerani lusungu, A Yehova, wonani umo awo ŵakunitinkha ŵakuniyuzgira,Mwaŵeneimwe mukuniwuskamo mu vipata vya nyifwa,+
14 Mwakuti nipharazge milimo yinu yakulumbika mu vipata vya mwana msungwana wa Ziyoni,+Na kusekelera mu chiponosko chinu.+
ט [Teth]
15 Mitundu yazolokera mu mbuna izo yikajima.Lundi lawo lakoreka mu ukonde uwo yikabisa.+
16 Yehova wakumanyikwa na cheruzgo icho wakupeleka.+
Muheni wawira mu milimo ya mawoko ghake.+
Higayoni.* (Selah)
י [Yod]
17 Ŵaheni ŵawelerenge kulazga ku Dindi,*Mitundu yose iyo yikuluwa Chiuta.
18 Kweni mukavu waluwikenge yayi nyengo zose.+Chigomezgo cha ŵakuzika nacho chimalenge chara.+
כ [Kaph]
19 Wukani, A Yehova! Munthu wangaluskanga chara.
Mitundu yeruzgike pamaso pinu.+
20 Ŵawofyani, mwe Yehova,+Yimanyiskani mitundu kuti iwo mbanthu waka. (Selah)
Mazgu Ghamusi
^ Wonani Mang’anamuro gha Mazgu.
^ Wonani Mang’anamuro gha Mazgu.
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
