Salimo 94:1-23
94 Yehova, imwe Chiuta wakuwezgera nduzga,+Ŵalani, mwe Chiuta wakuwezgera nduzga.
2 Wukani, imwe Mweruzgi wa charu chapasi.+
Ŵawezgerani ŵakujikuzga ivyo vikuŵenelera.+
3 M’paka pawuli, A Yehova,Kasi ŵaheni ŵalutilirenge kujihaya m’paka pawuli?+
4 Ŵakuŵeleŵeta na kuyowoya mwakujituntha.Ŵabendezi wose ŵakujilumba.
5 Ŵakuteketa ŵanthu ŵinu, A Yehova,+Na kuyuzga chiharo chinu.
6 Ŵakukoma chokoro na mulendo,Ndipo ŵakukoma ŵana ŵalanda.
7 Ŵakuti: “Ya wakuwona yayi.+Chiuta wa Yakhobe wakulaŵiskako yayi.”+
8 Manyani ichi, imwe ŵazeleza.Mwa vindere imwe, kasi muzamulongora pawuli kuti muli na mahara?+
9 Kasi uyo wali kupanga* khutu, wangapulika yayi?
Kasi uyo wali kuwumba jiso, wangawona yayi?+
10 Kasi uyo wakusambizga mitundu, wangachenya yayi?+
Ndiyo wakovwira ŵanthu kuti ŵamanye vinthu.+
11 Yehova wakumanya maghanoghano gha ŵanthu,Kuti ni mvuchi pera.+
12 Ngwakukondwa munthu uyo mukumuchenya, mwe Ya,+Uyo mukumusambizga mu dango linu,+
13 Kumupa bata mu zuŵa la soka,M’paka khululu lijimikire muheni.+
14 Pakuti Yehova watayenge chara ŵanthu ŵake,+Panji kusida chiharo chake.+
15 Pakuti cheruzgo chiŵengeso chaurunji,Ndipo wose ŵakunyoloka mu mtima ŵachilondezgenge.
16 Ni njani wawukenge kuti wanilwere pakwimikana na muheni?
Ni njani waniyimirenge pakwimikana na ŵabendezi?
17 Kuŵenge kuti Yehova ni movwiri wane yayi,Mphanyi nili kuparanyika kale.*+
18 Para nkhati: “Lundi lane likutelemuka,”
Lusungu* lwinu, A Yehova, lukanifighiliranga.+
19 Para vyenjezgo vyaninyekezga,*Imwe mukunisanguluska na kunizikiska mtima.*+
20 Kasi chitengo* cha uryarya chingakolerana na imweApo chikwata suzgo mu zina la dango?+
21 Ŵakuwukira murunji*+Na kususkira munthu wambura mulandu ku nyifwa.*+
22 Kweni Yehova waŵenge chiphokwero chane chakukhora,Chiuta wane ni jalawe lane lakubisamamo.+
23 Waŵawezgerenge milimo yawo yiheni.+
Waŵaparanyenge* na uheni wawo.
Yehova Chiuta withu waŵaparanyenge.*+
Mazgu Ghamusi
^ Mazgu gheneko, “kupanda.”
^ Mazgu gheneko, “nkhukhala kwa yii.”
^ Panji kuti, “Chitemwa chakugomezgeka.”
^ Panji kuti, “vikaŵa vinandi mukati mwane.”
^ Panji kuti, “Visangulusko vinu vikatuniska umoyo wane.”
^ Panji kuti, “ŵawusi; ŵeruzgi.”
^ Panji kuti, “umoyo wa murunji.”
^ Mazgu gheneko, “Ndipo ŵakupa mulandu ndopa za wambura kafukwa.”
^ Mazgu gheneko, “Waŵachetamiskenge.”
^ Mazgu gheneko, “waŵachetamiskenge.”
