Yobu 12:1-25
12 Yobu wakazgora, wakati:
2 “Nadi, imwe ndimwe ŵanthu ŵakumanya,*Ndipo vinjeru vifwenge namwe pamoza.
3 Kweni naneso nili na mahara.*
Nili wapasi yayi kwa imwe.
Kasi ni njani wakuleka kumanya vinthu ivi?
4 Nazgoka chinthu chakusekeska ku ŵanyane,+Nkhuchema Chiuta kuti wanizgore.+
Munthu murunji na wambura kafukwa wazgoka chinthu chakusekeska.
5 Munthu uyo wali pamtende wakuti soka nkhanthu chara,Wakughanaghana kuti likuwira waka awo malundi ghawo ghali tewutewu.*
6 Mahema gha vigeŵenga ghali pamtende,+Ndipo awo ŵakwavya Chiuta mbakuvikilirika,+Awo ŵali na chiuta wawo mu mawoko ghawo.
7 Kweni sono fumba vinyama ndipo vikusambizgenge,Kweniso viyuni vyamudera ndipo vikuphalirenge.
8 Panji ghanaghanira* charu chapasi ndipo chikusambizgenge,Na somba za mu nyanja zikupharazgirenge.
9 Ni njani pakati pa ivi uyo wakuleka kumanya,Kuti woko la Yehova ndilo lachita ichi?
10 Mu woko lake muli umoyo wa chinthu chilichose chamoyoNa mzimu* wa munthu waliyose.+
11 Asi khutu likuyezga mazguNga umo lulimi lukuchetera chakurya?+
12 Asi vinjeru vikusangika mu ŵalara,+Ndiposo mahara ghakwiza na unandi wa mazuŵa?
13 Chiuta wali na vinjeru na nkhongono,+Wali na fundo na umanyi.+
14 Para wabwangandulira pasi chinthu kuti chingazengekaso chara.+Icho iyo wajara palije munthu uyo wangachijura.
15 Para wajalira maji, chilichose chikomira.+Para waghajulira, ghakuzuzga charu chapasi.+
16 Iyo wali na nkhongono na vinjeru vyakovwira.+Uyo wakupuluka na uyo wakupuluska wose mbake.
17 Ŵakupeleka fundo wakuŵayendeska kwambura skapato,*Ndipo ŵeruzgi wakuŵazgora vindere.+
18 Wakusutura simbi izo mathemba ghakaka,+Ndipo wakukaka lamba mu viwuno vyawo.*
19 Ŵasembe* wakuŵayendeska kwambura skapato,+Ndipo wakugodobora awo ŵali na nkhongono zikuru,+
20 Wakujara mulomo wa ŵakupeleka fundo ŵakugomezgeka,Ŵalara wakuŵapoka mahara.
21 Wakupungulira muyuyuro pa ŵakuchindikika,+Ndipo ŵankhongono wakuŵalopweska,*
22 Wakuvumbura vinthu vyakunyang’amira kufuma mu mdima,+Ndipo mdima ukuru wakwiza nawo ku ungweru,
23 Mitundu wakuyizgora yankhongono kuti wayiparanye,Wakukuzga mitundu kuti wayilongozgere ku wuzga.
24 Ŵalongozgi ŵa ŵanthu wakuŵapoka mahara,*Wakuŵayingiska mu mapopa ghambura nthowa.+
25 Ŵakupapaska mu mdima+ umo mulije ungweru.Wakuŵayingiska nga mbanthu ŵaloŵevu.+
Mazgu Ghamusi
^ Mazgu gheneko, “imwe mbanthu.”
^ Mazgu gheneko, “mtima.”
^ Panji kuti, “malundi ghakutelemuka.”
^ Pangayowoyekaso kuti, “yowoya ku.”
^ Panji kuti, “mvuchi.”
^ Panji kuti, “wakuŵavura vyose.”
^ Mazgu ghanyake, “maluwunda ghawo.”
^ Mazgu ghanyake, “Ŵasofi.”
^ Mazgu gheneko, “wakusutura lamba wa ŵankhongono.”
^ Mazgu gheneko, “mtima.”
