Yobu 4:1-21
4 Elifazi+ Mutemani wakazgora kuti:
2 “Kasi vikuseluskenge usange munyake wakuyezga kuyowoya nawe?
Pakuti ni njani uyo wangajikora kuti waleke kuyowoya?
3 Wona! Iwe wasambizga ŵanandi,Ndipo ukakhozganga mawoko ghakulopwa.
4 Mazgu ghako ghakawuskanga waliyose uyo wakhuŵara,Ndipo ukakhozganga awo makongono ghawo ghalopotoka.
5 Kweni sono chawira iwe, ndipo wathika lusoko,*Chakhwaska iwe, ndipo wahangayika nacho.
6 Kasi ukukhwima mtima yayi pakuti ukopa Chiuta?
Kasi nthowa yako yaurunji+ yikukupa chigomezgo yayi?
7 Kumbuka: Kasi ni munthu nju wambura mulandu uyo wali kulangikapo?
Mphawuli apo wakunyoloka wali kuparanyikapo?
8 Icho ine nawona ntchakuti awo ŵalima* viheni,Na awo ŵakuseŵa masuzgo, ŵakuvuna vyenevivyo.
9 Ŵakuparanyika na mvuchi wa Chiuta,Ndipo ŵakumara na kuphulika kwa ukali wake.
10 Nkhalamu yikubangura, ndipo mwana wa nkhalamu wakuwuluma,Kweni nanga ni mino gha nkhalamu* zankhongono ghakuphyoka.
11 Nkhalamu yikufwa chifukwa cha kusoŵa nyama,Ndipo ŵana ŵa nkhalamu ŵakumbininika.
12 Mazgu ghakiza kwa ine kuubende,*Ndipo khutu lane likapulika kuphwepwerezga kwake.
13 Nkhasuzgika maghanoghano chifukwa cha mboniwoni izo nkhawona usiku,Apo tulo tuzito tukuwira ŵanthu,
14 Kumbwambwantha kwakofya kukiza pa ine,Viwangwa vyane vyose vikazura na chitenthe.
15 Mzimu ukajumpha pamaso pane,Sisi la thupi lane likati nyalunyalu!*
16 Ndipo ukimilira jojololo,Kweni nkhamanya yayi kawonekero kake.
Chinthu chikaŵa kunthazi kwane,Kukaŵa bata, ndipo nkhapulika mazgu ghakuti:
17 ‘Kasi munthu wangaŵa murunji kuluska Chiuta?
Kasi munthu wangaŵa wakutowa kuluska Mlengi wake?’
18 Wona! Ŵateŵeti ŵake wakuŵagomezga yayi,Ndipo ŵangelo* ŵake wakuŵasanga vifukwa.
19 Ntheura kuli wuli ŵanthu awo ŵakukhala mu nyumba za dongo,Awo ŵakujinthika mu fuvu,+Awo ŵakutikinyulika luŵiro nga ni fufuzi!
20 Ŵakutikinyulikirathu kufuma mulenji m’paka mise,Ŵakuparanyika kwamuyirayira, ndipo palije uyo wakuŵikako mahara.
21 Asi ŵali nga ni hema ilo chingwe chake ŵagulura?
Ŵakufwa kwambura vinjeru.
Mazgu Ghamusi
^ Mazgu gheneko, “walombotoka.”
^ Panji kuti, “ŵakwata.”
^ Panji kuti, “nkhalamu ziwukirano.”
^ Panji kuti, “kuudesi; kwanekha.”
^ Mazgu ghanyake, “nyang’unyang’u; metumetu.”
^ Panji kuti, “mathenga ghake.”
