Zekariya 13:1-9
13 “Mu zuŵa ilo, chisimi chizamujulikira nyumba ya Davide na ŵanthu ŵa mu Yerusalemu kuti ŵatozgeke ku kwananga na ukazuzi.+
2 “Mu zuŵa ilo,” wakuti Yehova wa mawumba, “Nizamusisita mazina gha vikozgo mu charu,+ ndipo vizamukumbukikaso chara. Mu charu nizamufumiskamo zintchimi+ na mzimu waukazuzi.
3 Usange munthu munyake wazamuchimaso, awiske na anyina awo ŵakamubaba ŵazamumuphalira kuti: ‘Ufwenge, chifukwa wayowoya mautesi mu zina la Yehova.’ Ndipo awiske na anyina awo ŵakamubaba ŵazakamugwaze chifukwa cha kuchima kwake.+
4 “Mu zuŵa ilo, ntchimi yiliyose yizamuchita soni na mboniwoni yake para yikuchima, ndipo yizamuvwara yayi munjilira wake wa weya+ kuti yipusike ŵanthu.
5 Yizamuti: ‘Ine ndine ntchimi yayi. Ndine mulimi waka, chifukwa munthu wakanigura apo nkhaŵa muwukirano.’
6 Ndipo usange munyake wayifumba kuti, ‘Kasi vilonda vya pakati pa viŵegha* vyako ivi ni vya vichi?’ Yizamuzgora kuti, ‘Vilonda ivi nkhavipokera mu nyumba ya ŵabwezi ŵane.’”*
7 “Iwe lupanga, wukira muliska wane,+Wukira munthu uyo ni munyane,” ndimo wayowoyera Yehova wa mawumba.
“Timba muliska,+ ndipo mskambo* umbininike,+Woko lane lizamuzgokera pa awo mbambura kuzirwa.”
8 “Ndipo mu charu chose,” wakuti Yehova,“Vigaŵa viŵiri vizamudumulika na kuparanyika,*Ndipo chigaŵa chachitatu chizamulekeka kuti chikhalilire mwenemumo.
9 Chigaŵa chachitatu nizamuchiyendeska pa moto,Ndipo nizamuŵayenga nga umo munthu wakwengera silivaNa kuŵayezga nga umo munthu wakuyezgera golide+
Ŵazamuchema pa zina lane,Ndipo nizamuŵazgora.
Nizamuyowoya kuti: ‘Mbanthu ŵane,’+
Ndipo iwo ŵazamuti: ‘Yehova ni Chiuta withu.’”
Mazgu Ghamusi
^ Mazgu gheneko, “pakati pa mawoko ghako.” Kung’anamura pa nganga panji pa muwongo.
^ Panji kuti, “awo ŵakunitemwa.”
^ Panji kuti, “mberere.”
^ Panji kuti, “kufwa.”
