Zintharika 22:1-29
22 Zina liwemi* ndakukhumbikwa kuluska usambazi unandi.+Ntchiwemi kuchindikika kuluska kuŵa na siliva na golide.
2 Munthu musambazi na mukavu ŵakuyana waka* pa ichi:
Wose ŵaŵiri ŵali kulengeka na Yehova.+
3 Munthu wakuchenjera wakuwona ulwani na kubisama,Kweni muzeleza wakujendera bweka ndipo wakupwetekeka.*
4 Njombe ya kujiyuyura na kopa YehovaMbusambazi, uchindami, na umoyo.+
5 Minga na vipingo vili mu nthowa ya munthu mukhuluku,Kweni uyo wakusungilira umoyo wake wakutalikirana navyo.+
6 Lera msepuka* mu nthowa iyo wakwenera kwendamo,+Nanga wangakura wafumengemo chara.+
7 Munthu musambazi wakuwusa mukavu,Ndipo uyo wakongora ni muzga wa uyo wamukongozga.+
8 Uyo wakuseŵa ubendezi wavunenge soka,+Ndipo ndodo ya kutukutwa kwake yimalenge.+
9 Munthu wa mtima wa kupa* watumbikikenge,Pakuti wakupako mukavu chakurya chake.+
10 Chimbizga munthu wamsinjiro,Ndipo mphindano zimalenge.Kususkana* na kutukana vilekenge.
11 Uyo wakutemwa mtima wakutowa na kuyowoya mazgu ghawemiWaŵenge mubwezi wa themba.+
12 Maso gha Yehova ghakusungilira mahara,Kweni wakutimbanizga mazgu gha muryarya.+
13 Munthu mukata wakuti: “Kuwaro kuli nkhalamu!
Ningakakomekera mu luŵaza!”+
14 Mulomo wa mwanakazi wakupuluka* ni mbuna yakunyang’amira.+
Munthu uyo wasuskika na Yehova wawengemo.
15 Uchindere ukuvungika mu mtima wa msepuka,*+Kweni ndodo ya chilango yiwufumiskengemo.+
16 Uyo wakulyera ŵakavu kuti wasazgireko usambazi wake+Na uyo wakupeleka vyawanangwa kwa musambazi,Waŵenge mukavu.
17 Uthye khutu lako na kupulika mazgu gha ŵavinjeru,+Mwakuti uŵike mtima wako pa ivyo nkhukumanyiska,+
18 Pakuti ntchakukondweska kuvisunga mukati mwako,+Mwakuti vyose viŵenge pa milomo yako nyengo zose.+
19 Nkhukumanyiska muhanya uno,Mwakuti chigomezgo chako chiŵe mwa Yehova.
20 Asi nakulembera kale,Kukupa ulongozgi na kukumanyiska,
21 Kuti nikusambizge mazgu ghaunenesko na ghakugomezgeka,Mwakuti ulute na mazgu ghaunenesko kwa uyo wakakutuma?
22 Ungamupokanga yayi mukavu vinthu vyake pakuti ni mukavu,+Ndipo munthu wakuyuyuka ungamutekenyuliranga mu chipata cha msumba chara,+
23 Pakuti Yehova waŵimirenge pa mulandu wawo+Ndipo watorenge umoyo wa awo ŵakuŵaphanga vinthu vyawo.
24 Ungendezgananga na munthu wakaŵefu yayi,Panji kwenda na uyo wakutemwa kukwiya,
25 Mwakuti uleke kusambirako mendero ghakeNa kujithya* chipingo.+
26 Uleke kuŵa pamoza na awo ŵakukorana vyasa pakupangana,Awo ŵakukhalirana ukaboni pa ngongoli.+
27 Usange ulije chakuti ulipire,Bedi lako lizamutolekako kusi kwako!
28 Ungasezganga yayi chimanyikwiro cha mphaka cha papo kale,Icho ŵasekuru ŵako ŵakaŵika.+
29 Kasi wamuwona munthu waluso pa mulimo wake?
Wimilirenge panthazi pa mathemba,+Panthazi pa ŵanthu bweka wimilirengepo yayi.
Mazgu Ghamusi
^ Panji kuti, “Lumbiri luwemi.” Mazgu gheneko, “Zina.”
^ Mazgu gheneko, “ŵakukumana.”
^ Panji kuti, “wakuvimyantha.”
^ Panji kuti, “mwana; muwukirano.”
^ Mazgu gheneko, “Uyo wali na jiso liwemi.”
^ Panji kuti, “Kumangalirana.”
^ Panji kuti, “mwana; muwukirano.”
^ Panji kuti, “kuthyera umoyo wako.”
