Zintharika 3:1-35
3 Mwana wane, ungaluwanga chara chisambizgo chane,*Ndipo mtima wako usungilire malango ghane,
2 Chifukwa vikusazgirengeko mazuŵa ghanandi,Vyaka vya umoyo, na mtende.+
3 Lusungu* na kugomezgeka* vingakusidanga chara.+
Uvikakilire mu singo yako.Uvilembe mu mtima wako,+
4 Apo ndipo usangenge uwemi na mahara ghawemiPamaso pa Chiuta na ŵanthu wuwo.+
5 Uthembenge Yehova+ na mtima wako wose,Ungagomezganga* pa kapulikiskiro kako yayi.+
6 Mu mendero ghako ghose maso ghako ghaŵe kwa iyo,+Ndipo wakunyoloskerenge nthowa zako.+
7 Ungaŵanga wavinjeru mu maso ghako chara.+
Uwopenge Yehova na kupatukako ku uheni.
8 Ivi viŵenge munkhwala ku thupi lako*Na chipumulo ku viwangwa vyako.
9 Chindika Yehova na vinthu vyako vyakuzirwa,+Na vipambi vyakwamba* vya vuna yako yose.*+
10 Apo ndipo nthamba zako zizurenge na vinthu vinandi,+Ndipo vyakuthandizgira* vyako vifulukenge na vinyo liphya.
11 Mwana wane, ungakananga yayi para Yehova wakukulanga.+Ndipo unganyanyaranga chara para wakukuchenya,+
12 Chifukwa awo Yehova wakuŵatemwa wakuŵachenya,+Nga umo dada wakuchitira na mwana wake uyo wakukondwa nayo.+
13 Ngwakukondwa munthu uyo wakusanga vinjeru,+Na munthu uyo wakusanga umanyi.
14 Nkhuwemi kusanga ivi kuluska kusanga siliva,Ndipo kuŵa navyo nga ni chandulo nkhuwemi kuluska kuŵa na golide.+
15 Ni vyakuzirwa chomene kuluska malibwe gha korali,*Pa ivyo ungadokera, palije icho chingayana navyo.
16 Mu woko lake lamalyero muli umoyo utali.Usambazi na uchindami vili mu woko lake lamazere.
17 Nthowa zake ni zakukondweska,Mendero ghake ghose ngamtende.+
18 Ni khuni la umoyo ku awo ŵakuskepelera kwa ivyo,Ndipo awo ŵakuvikoleska ŵachemekenge ŵakukondwa.+
19 Yehova wali kujintha charu chapasi mu vinjeru.+
Wali kukhozga machanya mu umanyi.+
20 Ndimba za maji zikasweka chifukwa cha kumanya kwake,Ndipo mabingu ghakakhizga jumi.+
21 Mwana wane, ungavitayanga yayi.*
Sungilira vinjeru na kaghanaghaniro kawemi,
22 Vikupenge umoyoNdipo viŵenge vitoweskero mu singo yako.
23 Penepapo wendenge mwakufwasa mu nthowa yako,Lundi lako likhuŵarenge yayi.*+
24 Para wagona pasi, uwopenge yayi.+Ugonenge pasi, ndipo tulo twako tuŵenge twakunowa.+
25 Uwopenge chara chakofya chilichose chamabuchi,+Panji chimphepo icho chikwiza pa ŵaheni.+
26 Pakuti Yehova waŵenge chigomezgo chako,+Wavikilirenge lundi lako kuti lileke kukoleka.+
27 Ungaŵanoranga yayi viwemi awo ukwenera kuŵapa,*+Usange uli na nkhongono* kuŵawovwira.+
28 Ungayowoyanga yayi kwa mzengezgani wako kuti: “Lutanga, wizeso! Namachero ndipo nizamukupa,”
Usange ungamupa penepapo.
29 Ungamwatiranga chiheni yayi mzengezgani wako,+Para wakukhala nawe mwakufwasa.
30 Ungambananga na munthu kwambura chifukwa yayi+Usange wandakuchitirepo chiheni.+
31 Ungachitiranga sanji munthu wankhaza yayi+Nanga nkhusankha mendero ghake ghalighose,
32 Pakuti Yehova wakuseluka nayo munthu muryarya,+Kweni wakuŵa mubwezi wa ŵakunyoloka.+
33 Yehova wakutemba nyumba ya muheni,+Kweni wakutumbika chikaya cha ŵarunji.+
34 Wakuseka awo ŵakugoska,+Kweni ŵakuzika wakuŵachitira uwemi.+
35 Ŵavinjeru ŵaharenge ntchindi,Kweni vindere vikuhaya soni.+
Mazgu Ghamusi
^ Panji kuti, “dango lane.”
^ Panji kuti, “Chitemwa chakugomezgeka.”
^ Panji kuti, “unenesko.”
^ Mazgu gheneko, “Ungayegamiranga.”
^ Mazgu gheneko, “mudoto wako.”
^ Panji kuti, “vyose ivyo ukusanga.”
^ Panji kuti, “viwemi chomene.”
^ Panji kuti, “vyakukamiramo mpheska.”
^ Wonani Mang’anamuro gha Mazgu.
^ Ŵakwenera kuti ŵakunena makhaliro gha Chiuta agho ghayowoyeka mu mavesi ghakumasinda.
^ Panji kuti, “litimbenge ku chilichose yayi.”
^ Panji kuti, “kuli mu nkhongono za woko lako.”
^ Panji kuti, “awo vikuŵenelera.”
