Kufuma mu 2018, mu magazini ghithu ghakugaŵira mukuŵa waka nkhani yimoza pera. Magazini agha nagho ntchigaŵa cha vinthu ivyo tikusambizgira Baibolo. Ntheura tikwenera kughagwiliskira ntchito mu uteŵeti. Tingayeghakoso magazini ghachoko waka para tili paulendo panji para tikuluta ku msika. Magazini agha ghali kupangika kuti tisambizgirenge ŵanthu Baibolo yayi, kweni ghangawovwira munthu kuti wanweke kumanya vinandi vya Chiuta.

Para mwamba kudumbiskana na munthu, dumbiskanani lemba na kumulongora nkhani mu magazini iyo yingamufika pamtima. Mwachiyelezgero, para munthu wali na mbumba, panji wali na chitima panjiso wakusuzgika maghanoghano, mungayowoya kuti: “Sonosono apa nkhaŵerenga nkhani yiwemi iyo yikukolerana na nkhani iyi. Ningamulongorani?” Para mukuwona kuti munthu uyo ngwakunweka, mungamupa magazini ghakupulinta panji kumutumizgira kwizira pa foni panji pa kompyuta. Mungachita nthena nanga pangaŵa paulendo wakwamba. Nangauli chilato chithu nkhugaŵira waka magazini yayi, kweni magazini agha ghakutovwira kuti tisange ŵanthu awo mbakukhumbisiska kuchitapo kanthu pa ivyo ŵakusambira.—Mil 13:48.