CHIFUKWA WULI NTCHAKUZIRWA? Ŵanthu ŵakwenera kuchema pa zina la Yehova kuti ŵazakaponoskeke. (Ro 10:13, 14) Ndipouli, ni wose yayi awo tikusambira nawo Baibolo ŵakukhumba kusintha nkharo zawo kuti zikolerane na fundo za Yehova. Tikugwiliskira ntchito makora nyengo yithu mu uteŵeti para tikovwira awo ŵakukhumba nadi kusintha nkharo zawo kuti ŵakondweske Yehova. Para uyo tikusambira nayo Baibolo wakukura yayi mwauzimu pamasinda pakuti tasambira nayo nyengo yitali, tikwenera kumuleka dankha na kupenja ŵanyake awo Yehova wakuŵaguzira kwa iyo na gulu lake. (Yoh 6:44) Ndipouli, para munthazi munthu uyu walongora kuti wali na “maghanoghano ghakwenelera umoyo wamuyirayira,” tingambaso kusambira nayo Baibolo.—Mil 13:48.

UMO MUNGACHITIRA:

• Mulumbani chifukwa chakuti wakukhumba kumanya makora unenesko.—1Ti 2:4

• Muphalirani uwemi wakulondezga ivyo wakusambira.—Lu 6:46-49

• Dumbiskanani nayo mwalusungu ntharika ya Yesu ya mumiji, na kumufumba icho chikumutondeska kuchitapo kanthu.—Mt 13:18-23

• Mulongosolerani mwaluso chifukwa icho mulekerenge kusambira nayo Baibolo

• Muphalirani kuti nyengo zinyake mumwenderenge kuti mumukhozge kweniso kuti munthazi mungazakayambaso kusambira nayo para wamba kuchitapo kanthu

WONELERANI VIDIYO YAKUTI, KULEKA DANKHA KUSAMBIRA BAIBOLO NA MUNTHU, NDIPO PAMASINDA ZGORANI MAFUMBO GHAKULONDEZGAPO AGHA:

• Kasi ntchivichi icho chalongora kuti msambiri watondekanga kukura mwauzimu?

• Kasi mupharazgi wangumovwira wuli msambiri kuti wamanye kuti wakwenera kuchitapo kanthu?

• Kasi mupharazgi wanguchita wuli kuti munthazi chizakaŵe chipusu kwambiraso kusambira nayo?