Tili mu charu icho chikuwona vinthu viwemi kuŵa viheni, ndipo viheni kuŵa viwemi. (Yes 5:20) Chachitima ntchakuti ŵanthu ŵanyake ŵakuchita vinthu ivyo Yehova wakutinkha, nga nkhugonana kwa ŵanalume panji ŵanakazi ŵekhaŵekha. Ŵanthu ŵanyake, kweniso ŵanyawo ŵa ku sukulu ŵanganyengelera ŵana ŵithu kuti nawo ŵachitengeko ivyo iwo ŵakuchita. Kasi mungaŵawovwira wuli ŵana ŵinu kunozgekera kuti ŵatonde chiyezgo ichi na vinyake vyakuyanako?

Ŵasambizgani ŵana ŵinu fundo za Yehova. (Le 18:3) Mwapachokopachoko kuyana na msinkhu wawo, ŵaphalirani ivyo Baibolo likuyowoya pa nkhani za kugonana. (Do 6:7) Jifumbani kuti: ‘Kasi naŵasambizga ŵana ŵane pa nkhani ya kulongorana chitemwa mwakwenelera, uwemi wa kuvwara mwantchindi, kweniso kuti ŵanji ŵakwenera kuŵa na mphaka pakuchita nawo vinthu? Kasi ŵana ŵane ŵangamanya chakuchita usange munthu wakukhumba kuŵalongora vyamsikuzi panji usange munthu mulara wakuŵatuma kuchita chinthu icho Yehova wakukana?’ Usange mwaŵasambizgirathu mwakukwana viŵawovwirenge kuti ŵagege masuzgo ghanandi. (Zi 27:12; Mu 7: 12) Para mukusambizga ŵana ŵinu, mukulongora kuti mukuzirwiska chiharo chakuzirwa icho Yehova wamupani.​—Sa 127:3.

WONELERANI VIDIYO YA MUTU WAKUTI, ZENGANI NYUMBA IYO YINGAZIZIPIZGA—VIKILIRANI ŴANA ŴINU KU “ICHO NTCHIHENI,” NA KUZGORA MAFUMBO GHAKULONDEZGAPO AGHA:

• Chifukwa wuli ŵanyake ŵakuchedwa kusambizga ŵana ŵawo nkhani zakukhwaskana na kugonana?

• Chifukwa wuli ŵapapi ŵakwenera ‘kuŵalanga ŵana ŵawo na kuŵasambizga maghanoghano gha Yehova’?—Efe 6:4

• Kasi gulu la Yehova lapeleka vichi ivyo vingawovwira ŵapapi kusambizga ŵana ŵawo pa nkhani zakukhwaskana na kugonana?—w19.05 12, bokosi

• Chifukwa wuli nyengo zose mukwenera kudumbiskana na ŵana ŵinu pambere ŵandasangane na masuzgo ghakuru?