Para ndimwe mupharazgi wambura kubatizika panji mukusambira Baibolo, kasi muli na chilato chakuti mubatizike? Chifukwa wuli mukukhumba kubatizika? Para mwajipeleka kwa Yehova na kubatizika, ndikuti mwamba kuŵa paubwezi wapadera na Iyo. (Sa 91:1) Kweniso vingawovwira kuti muzakaponoskeke. (1Pe 3:21) Kasi mungachita wuli kuti mujipeleke na kubatizika?

Mukwenera kukhorwa kuti ivyo mukusambira ni vyaunenesko. Para pali vinyake ivyo mukuvipulikiska yayi, fufuzani kuti muvimanye makora. (Ro 12:2) Manyani ivyo mukukhumbikwira kusintha. Ndipo apo mukusintha, kumbukani kuti chilato chinu ntchakuti mukondweske Yehova. (Zi 27:11; Efe 4:23, 24) Nyengo zose mulombenge kwa Yehova kuti wamovwirani. Manyani kuti wamukhozganinge na kumovwirani na mzimu wake utuŵa uwo ngwankhongono chomene. (1Pe 5:10, 11) Manyani kuti kuyezgayezga kwinu nkhwakukhumbikwa chomene. Kuteŵetera Yehova ndicho chinthu chakuzirwa chomene pa umoyo withu!​—Sa 16:11.

WONELERANI VIDIYO YA MUTU WAKUTI, IVYO VIKAŴAWOVWIRA KUTI ŴABATIZIKE, NDIPO PAMANYUMA ZGORANI MAFUMBO AGHA:

• Kasi ni masuzgo wuli agho ŵanyake ŵatonda kuti ŵabatizike?

• Kasi mungachita wuli kuti muŵe na chipulikano kuti mujipeleke kwa Yehova?

• Kasi ni vinthu wuli ivyo vikapangiska ŵanji kuti ŵabatizike?

• Kasi awo ŵasankha kuteŵetera Yehova ŵakutumbika wuli?

• Kasi kujipeleka na kubatizika vikung’anamurachi?