Mu Seputembala, tizamuŵikapo mtima kwambiska masambiro gha Baibolo panyumba yiliyose na kaburosha ka Mungakondwa na Umoyo Kwamuyirayira! Ŵapharazgi wangazakasankha kuchitako upayiniya wakanyengo wa maora 30. Kasi tizamuchita wuli upharazgi wapadera uwu?

• Paulendo Wakwamba: Gwiliskirani ntchito ivyo vili kuumaliro wa chikopi cha burosha ili kuti munthu wanweke, ndipo mulongorani umo tikusambilira Baibolo. Kuŵaluwa yayi ŵanthu awo ŵakalongora kunweka, kusazgapo awo mukawelerako. Nanga ni awo kale ŵakakana kusambira Baibolo, ŵanganweka na nthowa yiphya yakusambizgira ŵanthu Baibolo kweniso ŵanganweka na burosha ili. Burosha tingazakalilekanga yayi panyumba apo tindasangepo ŵanthu, panji kutumizga mu makalata ku ŵanthu awo ŵakalongora kuti mbambura kunweka. Komiti ya Uteŵeti ya Mpingo yinganozga ndondomeko ya maungano ghakunozgekera uteŵeti mukati mwa mwezi uwu.

• Mipata Yinyake: Usange pa mpingo winu mukuchitako upharazgi wa mashelufu, mungazakaŵikapo pa shelufu kaburosha ka Mungakondwa na Umoyo Kwamuyirayira! Ŵaphalirani awo ŵanweka na kaburosha aka kuti mungasambiraso nawo Baibolo kwaulere. Mungaŵalongora mwakudumura umo tikusambilira Baibolo, panji mungapangana kuti muzakaŵalongore nyengo yinyake. Mulaŵiliri wa uteŵeti wanganozga ndondomeko yakuti ŵapharazgi awo mbakwenelera ŵazakalute ku malo gha bizinesi mu chigaŵa chawo na kwambiska masambiro gha Baibolo. Mungambiskaso masambiro gha Baibolo ku awo mukugwira nawo ntchito panji ŵanthu awo mungaŵapharazgira mwamwaŵi.

Yesu wakatituma kuti ‘tikazgore ŵanthu kuŵa ŵasambiri,’ na “kuŵasambizga.” (Mt 28:19, 20) Mphanyi upharazgi wapadera uwu watovwira kuti tifiske chilato chithu ichi cha kwambiska masambiro gha Baibolo, mwakugwiliskira ntchito burosha la Mungakondwa na Umoyo Kwamuyirayira!