Viyezgo vingatigongoweska, chomenechomene para vyatora nyengo yitali. (1Sa 16:13) Davide wakamanyanga kuti chiyezgo icho wakakumana nacho chakukhwaskana na Themba Sauli chizamumara, ndipo paumaliro wazamuŵa themba nga umo Yehova wakamulayizgira. Chipulikano chikamovwira Davide kuti waŵe wakuzikira na kulindilira Yehova.

Para takumana na chiyezgo, tingagwiliskira ntchito mahara, vinjeru panji kaghanaghaniro kawemi kuti vinthu visinthe. (1Sa 21:12-14; Zi 1:4) Ndipouli, nyengo zinyake masuzgo ghakulutilira nanga tingaŵa kuti tayezga nthowa zakupambanapambana mwakukolerana na fundo za mu Baibolo. Para vyaŵa nthena, tikwenera kuzikira na kulindilira Yehova. Sonosono apa, Yehova wazamumazga masuzgo ghithu ghose, kweniso “wazamufyura masozi ghose” mu maso ghithu. (Chiv 21:4) Kwali masuzgo ghithu ghamara chifukwa chakuti Yehova wachitapo kanthu, kwali mpha chifukwa chinyake, kweni fundo iyo tikumanya njakuti: Viyezgo vyose ivi vili na zuŵa ilo vizamumalira. Fundo iyi yikutikhozga chomene.

WONELERANI VIDIYO YA MUTU WAKUTI, ŴANTHU ŴAKUKOLERANA MU CHARU CHAMBURA KUKOLERANA, NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi ni masuzgo wuli agho Ŵakhristu ŵanyake ŵakakumana nagho kumwera kwa United States?

• Kasi ŵakalongora wuli kuzikira kweniso chitemwa?

• Kasi ŵakachita wuli kuti ŵalutilire kuŵika mtima pa “vinthu vyakuzirwa chomene”?​—Fil 1:10