Tili na mavidiyo ghanayi agho tingagwiliskira ntchito pakusambira Baibolo na ŵanthu mu uteŵeti. Kasi vidiyo yiliyose yili kupangika na chilato wuli?

• Chifukwa Wuli Mukwenera Kusambira Baibolo?—Vidiyo Yose. Vidiyo iyi yili kunozgeka kuti yipangiske munthu kunweka na Baibolo nanga wangaŵa kuti ngwa chigomezgo chinyake. Yikuchiska ŵanthu kuti ŵafufuze mazgoro mu Baibolo gha mafumbo ghakuzirwa agho ŵangaŵa nagho, kweniso yikulongosora mafumbo ghanyake agho Baibolo likuzgora mwakupulikikwa makora. Yikulongosoraso umo munthu wangapemphera sambiro la Baibolo.

• Chifukwa Wuli Mukwenera Kusambira Baibolo? (yakudumura). Vidiyo iyi yikuyana waka na yitali yira, kweni kuti waka iyi njakudumura. Vidiyo yakudumura iyi, njakovwira chomene ku malo uko ŵanthu mbakutangwanika chomene.

• Kasi Ŵakaboni ŵa Yehova Ŵakuchita Wuli Pakusambizga Munthu Baibolo? Vidiyo iyi chilato chake nkhovwira munthu kuti wanweke kwamba kusambira Baibolo kwaulere na kuzgora mafumbo ghanyake agho ŵanthu ŵangaŵa nagho, kweniso umo ŵangapemphera sambiro la Baibolo.

• Tamupokelerani ku Sambiro la Baibolo. Vidiyo iyi yili kunozgeka kuti tilongorenge ŵasambiri ŵithu ŵa Baibolo. Nangauli vidiyo iyi yili pa peji lachiŵiri mu buku la Mungakondwa na Umoyo Kwamuyirayira!, kweni tingamulongora munthu para tikudumbiskana nayo mu burosha la Mungakondwa na Umoyo Kwamuyirayira! Vidiyo iyi yikulongosora ivyo vili mu buku kweniso ivyo msambiri wakwenera kukhazga pa nyengo iyo wakusambira.

Nangauli vidiyo yiliyose yili na chilato chake, kweni tingamulongora munthu panji kumutumizgira usange ntchakwenelera. Ŵapharazgi ŵakuchiskika kuti ŵaghamanye makora mavidiyo agha na kughagwiliskira ntchito makora mu uteŵeti.