Chitemwa chili nga ni guluu (vyakumatira), ndipo chikovwira kuti mbumba yiŵe yakukolerana. Kwambura chitemwa, ntchakusuzga kuti ŵanthu mu mbumba ŵalutilire kuŵa ŵakukolerana kweniso kuti ŵachitirenge lumoza vinthu. Kasi ŵafumu, ŵawoli, na ŵapapi, ŵangalongora wuli chitemwa mu mbumba?

Mfumu wachitemwa wakumanya ivyo muwoli wake wakukhumba, umo wakuwonera vinthu kweniso umo wakujipulikira. (Efe 5:28, 29) Wakupwelelera mbumba yake mwakuthupi kweniso mwauzimu nga nkhuchita Kusopa kwa Mbumba nyengo zose. (1Ti 5:8) Muwoli wachitemwa wakujilambika kwa mfumu wake na ‘kumuchindika chomene.’ (Efe 5:22, 33; 1Pe 3:1-6) Mfumu na muwoli ŵakwenera kugowokerana na mtima wose. (Efe 4:32) Ŵapapi ŵachitemwa, ŵakuwona mwana waliyose kuti ngwakuzirwa mu mbumba yawo, ndipo ŵana ŵawo wose ŵakuŵasambizga kutemwa Yehova. (Do 6:6, 7; Efe 6:4) Kasi ŵana ŵawo ŵakusangana na masuzgo wuli ku sukulu? Kasi ŵakuchita wuli para ŵakuchichizgika na ŵanyawo? Para mu mbumba muli chitemwa, waliyose wakujipulika kuti ngwakuvikilirika.

WONELERANI VIDIYO YA MUTU WAKUTI MUŴE NA CHITEMWA CHAMBURA KUMARA MU MBUMBA, NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi mfumu wachitemwa wakuchita wuli na muwoli wake kulongora kuti wakumuzirwiska na kumupwelelera?

• Kasi muwoli wachitemwa wakulongora wuli kuti wakumuchindika chomene mfumu wake?

• Kasi ŵapapi ŵachitemwa ŵakuchita wuli kuti ŵasambizge ŵana ŵawo Mazgu gha Chiuta?