Kuti ŵakondweske Yehova, ŵanthu awo tikusambira nawo Baibolo ŵakwenera kuŵa na chipulikano chakukhora. (Heb 11:6) Tingaŵawovwira kuŵa na chipulikano ichi mwakugwiliskira ntchito buku la Mungakondwa na Umoyo Kwamuyirayira! Mu buku ili muli malemba ghakovwira, fundo zakupulikikwa makora, mafumbo ghakukora mtima, mavidiyo na vithuzi viwemi. Para tikovwira ŵanthu awo tikusambira nawo Baibolo kuŵa na makhaliro Ghachikhristu na kuŵa paubwezi na Chiuta ndikuti tikuzenga na vinthu vyambura kukora moto.—1Ko 3:12-15.

Ŵanthu ŵanyake vikuŵasuzga kughanaghanira fundo yakuti ŵangaŵa paubwezi na Chiuta uyo ŵakuleka kumuwona. Ntheura tikwenera kuŵawovwira kuti ŵaŵe na chipulikano mwa Yehova na kumugomezga.

WONELERANI VIDIYO YA MUTU WAKUTI, KHOZGANI CHIPULIKANO CHINU MWA YEHOVA MWAKUGWILISKIRA NTCHITO BUKU LA “MUNGAKONDWA NA UMOYO KWAMUYIRAYIRA!” NDIPO PAMANYUMA ZGORANI MAFUMBO AGHA:

• Kasi tikumanya wuli kuti mudumbu wangunozgekera makora sambiro?

• Kasi wangugwiliskira wuli ntchito mafumbo ghakusazgirapo kuti wamanye ivyo msambiri wakughanaghana kweniso umo wakujipulikira na lemba la Yesaya 41:10, 13?

• Kasi vidiyo na mavesi gha mu Baibolo vyamovwira wuli msambiri?

Ŵanthu ŵanandi ŵakupulikiska makora yayi nkhani ya sembe yakuwombora kweniso ŵakuyiwona kuti ntchawanangwa chakufuma kwa Chiuta yayi. (Ga 2:20) Ntheura, tikwenera kuŵawovwira kuti ŵaŵe na chipulikano mu sembe yakuwombora ya Yesu.

WONELERANI VIDIYO YA MUTU WAKUTI KHOZGANI CHIPULIKANO CHINU MWA YESU MWAKUGWILISKIRA NTCHITO BUKU LA “MUNGAKONDWA NA UMOYO KWAMUYIRAYIRA!” NDIPO PAMANYUMA ZGORANI MAFUMBO AGHA:

• Kasi tikumanya wuli kuti mubali wangunozgekera makora sambiro?

• Kasi wangugwiliskira wuli ntchito makora chigaŵa cha “Sangani Fundo Zakusazgikira” kuti wawovwire msambiri?

• Chifukwa wuli lurombo ndwakuzirwa kwa msambiri?