Apo umaliro wa charu ichi ukusendelera, tikukhazga kuti viwawa, uchigeŵenga na nkhondo visazgikirenge. (Chiv 6:4) Kasi tinganozgekera wuli masuzgo agha?

• Nozgekani mwauzimu: Sangani fundo na nkhani za mu Baibolo izo zingamovwirani kukhozga chigomezgo chinu mwa Yehova na gulu lake kweniso kumovwirani kuti mulutilire kuleka kuŵa ku chigaŵa cha charu. (Zi 12:5; jr 125-126 ¶23-24) Sono ndiyo ni nyengo yakukhozga ubwezi withu na ŵanyithu mu mpingo.—1Pe 4:7, 8

• Nozgekani mwakuthupi: Nozgekani kuzakakhala panyumba usange vinthu vyazakasuzga, ndipo sunganipo vinthu vyakukhumbikwira. Kweniso manyani ivyo mungachita usange muzamukhumbikwira kuti mufumepo pa nyumba. Wonaniso vinthu vyakukhumbikwa ivyo muli kupakira mu chikwama ivyo vingamovwirani para kwachitika soka, ndipo ŵikanimo vinthu ivyo vingamuvikilirani nga maski, magulovu kweniso ndalama. Manyani umo mungayowoyeskerana na ŵalara kweniso simikizgani kuti nawo ŵakumanya umo ŵangayowoyera namwe.—Yes 32:2; g17.5 3-7

Pa nyengo ya viwawa, lutilirani kuchita vinthu vyauzimu. (Fil 1:10) Lekani kwendendeka kufuma malo ghanyake kuluta ghanyake, pekha usange ntchakukhumbikwa nadi. (Mt 10:16) Gaŵanani na ŵanyinu vyakurya na vinthu vinyake vyakukhumbikwa.—Ro 12:13.

WONELERANI VIDIYO YA MUTU WAKUTI, KASI NDIMWE ŴAKUNOZGEKA USANGE KUNGACHITIKA SOKA LACHILENGIWA? NDIPO PAMANYUMA ZGORANI MAFUMBO AGHA:

• Kasi Yehova wangatovwira wuli panyengo iyo kwachitika soka?

• Kasi ni vinthu wuli vyakuzirwa ivyo tingachita kuti tinozgekere?

• Kasi tingawovwira wuli ŵanji awo ŵakhwaskika na masoka?