Sonosono apa Yehova walekenge kuzikira na charu chiheni ichi. Chisopa chautesi chizamuparanyika, mitundu yizamuwukira ŵanthu ŵa Chiuta, ndipo Yehova wazamuparanya ŵanthu ŵaheni pa Aramagedoni. Ŵakhristu ŵakulindilira mwakunweka nyengo iyo vinthu ivi vizamuchitikira.

Mbunenesko kuti tikumanya vyose yayi vyakukhwaskana na suzgo yikuru. Mwachiyelezgero, tikumanya yayi nyengo yeneko iyo yizamwambira. Tikumanya yayi vifukwa ivyo ŵandyali ŵazamuyowoya kuti ŵawukire chisopa. Tikumanya yayi utali wa nyengo iyo mitundu yizamuwukira ŵanthu ŵa Chiuta nakuti tikumanya yayi kuti chizamuchitika ntchivichi pamanyuma. Kweniso tikumanya yayi kuti Yehova wazamugwiliskira ntchito vichi pa kuparanya ŵanthu ŵaheni pa Aramagedoni.

Kweni Malemba ghakutiphalira ivyo vizamuchitika kuti tiŵe na chigomezgo na chikanga apo tikulindilira ivyo vichitikenge munthazi. Mwachiyelezgero, tikumanya kuti tili kuumaliro chomene wa “mazuŵa ghaumaliro.” (2Ti 3:1) Tikumanya kuti kuwukilika kwa chisopa ‘kuzamudumulizgika’ kuti chisopa chaunenesko chizaleke kuparanyika. (Mt 24:22) Tikumanya kuti Yehova wazamuthaska ŵanthu ŵake. (2Pe 2:9) Ndipo tikumanyaso kuti uyo Yehova wamusora kuti wazakaparanye ŵanthu ŵaheni na kuponoska mzinda ukuru pa Aramagedoni, ni murunji kweniso ngwankhongono.—Chiv 19:11, 15, 16.

Vinthu ivyo vizamuchitika munthazi vizamupangiska ŵanthu kufwa “chipoyo.” Kweni para tikuŵazga na kughanaghanira pa umo Yehova wakaponoskera ŵanthu ŵake kumanyuma kweniso ivyo wativumbulira kuti wazamuchita munthazi, ‘tingimilira na kwinuska mitu yithu’ na kuŵa na chigomezgo chose kuti kuwombokwa kwithu kuli pafupi.—Lu 21:26, 28.