Kuyowoya Chomene: Lekani kulongosora chilichose. Yesu wakafumbanga mafumbo agho ghakawovwiranga ŵanthu kughanaghana na kusanga zgoro launenesko. (Mt 17:24-27) Sambiro likunozga para mukufumba mafumbo ndipo ghangamovwirani kumanya ivyo msambiri winu wakumanya na kugomezga. (be peji 253 ndime 3-4) Para mwafumba fumbo, zikirani na kulindilira kuti wazgore. Usange msambiri wazgora vyautesi, lekani kumuphalira waka zgoro launenesko. Kweni mufumbani mafumbo ghanyake ghakuti ghamovwire kuti wafike yekha pa fundo. (be peji 238 ndime 1-2) Yowoyani makoramakora mwakuti msambiri wapulikiske fundo ziphya izo wakusambira.—be peji 230 ndime 4.

Kutimbanizga Munthu: Lekani kuyowoya vyose ivyo mukumanya pa nkhani iyo mukusambira. (Yoh 16:12) Longosorani waka fundo yikuru pa ndime. (be peji 226 ndime 4 m’paka peji 227 ndime 1) Fundo zinandi nanga zingaŵa ziwemi, zingajandizga fundo zikuru za mu nkhani. (be peji 235 ndime 3) Para msambiri wapulikiska waka fundo yikuru, lutani pa ndime yinyake.

Kumalizga Waka Buku: Khumbo lithu ndakuti tichonthe mtima wa ŵanthu, kumalizga waka buku yayi. (Lu 24:32) Gwiliskirani ntchito Mazgu gha Chiuta pakulongosora malemba ghakukhumbikwa mu sambiro ilo. (2Ko 10:4; Heb 4:12; be peji 144 ndime 1-3) Yowoyani viyelezgero vipusu. (be peji 245 ndime 2-4) Manyani ivyo msambiri winu vikumusuzga na ivyo wakugomezga, ndipo ghanaghanirani vya iyo pakusambira. Mufumbani mafumbo nga ni agha: “Kasi mukuti wuli na ivyo mukusambira apa?” “Kasi fundo iyi yikutisambizga vichi vya Yehova?” “Kasi mukuwona kuti kulondezga fundo iyi kuli na uwemi wuli?”—be peji 238 ndime 3-5; peji 259 ndime 2.