Yesu wakamba kupharazgira mwamwaŵi mwanakazi Musamariya mwa kwamba kuchezga nayo. Kasi tingachita wuli kuti tambe chidumbirano mwaluso na ŵanthu awo tikuŵamanya yayi?

• Tikwenera kuŵa ŵaubwezi para tikuyowoya na ŵanthu. Nangauli Yesu wakavuka chomene, wakamba chidumbirano mwa kupempha maji ghakumwa. Tingamba chidumbirano na munthu mwa kumutawuzga mwaubwezi, ndipo pamanyuma tingamba kuyowoyapo na umo kwachira zuŵa ilo, tingayowoyapo para basi yatchedwa, panji para kwachitika chithu chinyake mwasonosono. Kumbukani kuti chilato chithu nkhwambiska chidumbirano, ntheura mungayowoya nkhani yiliyose iyo munthu wanganweka nayo. Para uyo mukuyowoyeskana nayo wakutegherezga yayi, yezgani munthu munyake. Lombani Yehova kuti wamupani chikanga.—Ne 2:4; Mil 4:29.

• Ŵani ŵakunozgeka pa mpata uliwose uwo wasangika kuti mupharazge makani ghawemi, kweni kuchimbilira yayi. Yezgayezgani kuyowoya mwakufwatuka. Para mukulutizga kuyowoya nkhani iyo munthu wandakondwe nayo, wafwatukenge yayi kweniso chidumbirano chimalirenge munthowa. Kukwiya yayi para chidumbirano chamalira munthowa pambere mundamupharazgire. Para vikumusuzgani kupharazga makani ghawemi, yambani chidumbirano mwakuchezga waka pambere mundamupharazgire. [Woneskani na kudumbiskana vidiyo 1.]

• Para mukuchezga, mungayowoya nkhani yinyake yakukopa iyo yingapangiska munthu kuti wafumbe ivyo mukugomezga ndipo imwe vingamupani mwaŵi wakuti mumupharazgire. Yesu wakayowoya nkhani yakukopa iyo yikapangiska kuti mwanakazi wambe kufumba mafumbo. Apo Yesu wakamba kupharazgira mwanakazi Musamariya makani ghawemi, pachoko na pachoko wakamba kuzgora mafumbo ghake. [Woneskani na kudumbiskana vidiyo 2, ndipo pamanyuma woneskani na kudumbiskana vidiyo 3.]