Kasi Iwo Mbanjani?

NDI khumbo la Ŵakaboni ŵa Yehova lakuti imwe muŵamanye makora. Mutepanji muli kukumanapo nawo nga mbazengezgani ŵinu panji ŵanyinu ŵakugwira nawo ncito panjiso mu vyakucitika vinyake mu umoyo. Mutepanji muli kuŵawonapo mu misewu ŵakugaŵira magazini ghawo ku ŵantu awo ŵakukumana nawo. Panjiso muli kuyowoyapo nawo mwakudumura pa nyumba pinu.

Unenesko ngwakuti, Ŵakaboni ŵa Yehova mbakukondweskeka na imwe ndiposo na umoyo winu. Iwo ŵakukhumba kuti imwe muŵe ŵabwezi ŵawo ndiposo kuti ŵamuphalireni vintu vinandi vyakukhwaskana na iwo, vigomezgo vyawo, kendeskero ka gulu lawo, ndiposo umo iwo ŵakughanaghanira za ŵantu na caru ico ise tose tikukhalamo. Kuti ŵafiske cakulata ici, iwo ŵalemba brosha ili kuti muliŵazge.

Mu ntowa zinandi, Ŵakaboni ŵa Yehova ŵakuyana waka na waliyose. Iwo nawo ŵakukumana na masuzgo gha nyengo zose—gha vyacuma, gha matenda, ndiposo gha malanguruko. Iwo nawo ŵakubuda nyengo zinyake, ici ncifukwa cakuti mbambura ukongorekwa, mbakufunyilirika cara, ndiposo mbakuti ŵangacita ubudi. Kweni iwo ŵakuyezgayezga kutorapo sambiro pa vyakukumana navyo vyawo ndiposo ŵakusambira Baibolo mwakulimbikira comene na kupanga masintiro ghakukhumbikwira. Iwo ŵali kujipatulira kwa Ciuta kuti ŵacite khumbo lake, ndipo ŵakuyezgayezga kuti ŵakwaniriske kujipatulira uku. Mu milimo yawo yose, iwo ŵakugomezga pa urongozgi wakufuma mu Mazgu gha Ciuta na mzimu wake utuŵa.

Ncintu cakuzirwa comene kwa iwo kuti vigomezgo vyawo vizikike mu Baibolo, kuti mu masacizgo bweka gha ŵantu panji vigomezgo vya cisopo cara. Iwo nawo ŵakujipulika nga ndi umo wakacitira mpostole Paulos peneapo wakayowoya mwakufunyilirika kuti: “Ciuta ngwakuneneska, ndipo muntu yose wangaŵa mutesi.” (Ŵaroma 3:4, New World Translation *) Pa nkani ya visambizgo vyaunenesko vya mu Baibolo, Ŵakaboni ŵakukoleranako comene na ŵantu ŵa  ku Bereya awo ŵakategherezga upharazgi wa Paulos: “Ŵakapokera mazgu na pampu lose, na kupenjerezga mu Malembo zuŵa na zuŵa, usange vyeneivi ndimo vikaŵira.” (Milimo 17:11) Ŵakaboni ŵa Yehova ŵakugomezga kuti visambizgo vyose vya cisopo vikwenera kukoleranako na Malemba ghakufunyilirika, kwali cisambizgo ico cikusambizgika na iwo panji na muntu munyake. Iwo ŵakumupempani—ŵakumuciskani—kuti mucite nteura peneapo mukudumbiskana nawo.

Mwa ntowa iyi, ncakuwoneka makora kuti Ŵakaboni ŵa Yehova ŵakugomezga Baibolo nga ndi Mazgu gha Ciuta. Iwo ŵakuwona mabuku ghake 66 kuŵa ghakufunyilirika ndiposo ghakukonkoska mdauko mwakurondora . Ilo kanandi ŵantu ŵakulicema Testamenti Lipya iwo ŵakulicema kuti Malemba gha Cikristu Ghacigiriki, ndipo Testamenti Lakale ŵakulicema kuti Malemba Ghacihebere. Iwo ŵakuthemba pa ghose agha, Malemba Ghacigiriki na Ghacihebere ndipo ŵakughawona umo igho ghaliri, kulekapo kwekha usange mazgu panji malo ghalongoreka mwakuyerekezgera. Iwo ŵakugomezga kuti maucimi ghanandi gha Baibolo ghakwaniriskika, ghanji ghakukwaniriskika sono, ndipo ghanjiso ghakwaniriskikenge muntazi.

ZINA LAWO

Ŵakaboni ŵa Yehova? Inya, ndimo iwo ŵakumanyikwira nteura. Ili ndi zina lakurongora ncito, likurongora kuti ŵakucitira ukaboni Yehova Ciuta, na vilato vyake. Mazgu ghakuti “Ciuta,” “Fumu,” na “Mlengi”—kuyanaso na mazgu ghakuti “Pulezidenti,” “Themba,” ndiposo “Murara”—agha ndi mazina gheneagho tingazunulira ŵantu ŵakupambana-pambana. Kweni “Yehova” ndi zina lapadera ndipo nda Ciuta Wankongono-zose uyo ndi Mlengi wa cilengiwa cose. Ici carongoreka pa Salmo 83:18, mwakuyana na Baibolo la King James Version: “Kuti ŵantu ŵamanye kuti imwe, mwaŵeneimwe zina linu mwekha ndimwe YEHOVA, wapacanya nkanira mu caru cose capasi.”

Zina lakuti Yehova (panji Yahweh, nga ndi umo Jerusalem Bible la Roma Katolika likuyowoyera ndiposo umo ŵasambiri ŵanji ŵakutemwa kuzunulira) likusangika malo ghakukwana 7,000 mu Malemba Ghacihebere ghakwambilira. Mabaibolo ghanandi mulije zina ili, kweni mu malo mwake mukusangika zina lakuti “Ciuta” panji “Fumu.” Ndipouli, nanga mungaŵa mu Mabaibolo agha, muntu wangamanya kurongora apo pakalembeka zina lakuti Yehova mu malemba Ghacihebere ghakwambilira, ici ncifukwa cakuti, mu malo agho mukalembeka zina ili mwalembeka mazina ghakuti: CIUTA, FUMU mu vilembo vikuruvikuru. Mabaibolo agho ghang’anamurika sono-sono ghakugwiriskira ncito zina lakuti Yehova panji zina  lakuti Yahweh. Ici ndico cifukwa cake, Baibolo la Citumbuka pa Yesaya 42:8 likuphara kuti, “Ine ndine Yehova; ili ndilo zina lane.”

Lemba ilo pazikika zina la Ŵakaboni ŵa Yehova likusangika mu cipaturo 43 ca Yesaya. Mu cipaturo ici tikuwona kuti mitundu yili mu mphara ya mrandu: Ŵaciuta ŵamitundu ŵakucemeka kuti ŵize na ŵakaboni ŵawo kuti ŵapereke ukaboni waurunji panji kuti ŵategherezge ku ŵakaboni ŵa Yehova na kuzomerezga unenesko. Yehova wakuphara nteura ku ŵantu ŵake: “Imwe ndimwe ŵakaboni ŵane, wakuphara nteura Yehova, ndiposo ndimwe ŵateŵeti ŵane mwaŵeneimwe ndamusankani; kuti mundimanye na kundigomezga, ndiposo kuti mupulikiske kuti ine ndine: kukaŵavya Ciuta munyake pambere ine nkaŵa nindaŵeko, ndipo kuzamuŵavya munyakeso kuntazi kwane. Ine, ndine Yehova; ndipo padera pa ine palijeso muponoski.”—Yesaya 43:10, 11, American Standard Version.

Yehova Ciuta wakaŵa na ŵakaboni pa caru capasi virimika vikwi vinandi pambere Yesu wakaŵa wandababike. Panyuma pakuzunura ŵantu ŵa cipulikano mu Ŵahebere cipaturo 11, Ŵahebere 12:1 wakuphara kuti: “Nteura ise nase, pakuzingirizgika mose mose na cibingu cikuru ca nteura ca ŵapanikizgi, tisezge ku mpepete uzitu wose, na kwananga uko kukudemerera kwa ise, ndipo ticimbire mu uzizipizgo ciparizgano ico caŵikika pa ntazi zitu.” Yesu wakaphalira Pontiyo Pilato kuti: “Ceneici ndico nkababikira, ndipo ndico nkizira mu caru, mwakuti ndipanikizge na unenesko.” Iye wakucemeka “Kaboni wakugomezgeka na wakuneneska.” (Yohane 18:37; Civumbuzi 3:14) Yesu wakaphalira ŵasambiri ŵake kuti: “Muti mupokere nkongono, para mzimu mutuŵa wizira pa imwe: ndipo muti muŵenge ŵapanikizgi ŵane na mu Yerusalemu na mu Yudeya, na mu Samariya, na ku vigoti vya caru wuwo.”—Milimo 1:8.

Mwanteura, lero pali ŵantu 6,000,000 ŵeneawo ŵakupharazga makani ghaweme gha Ufumu wa Yehova uwo wuli mu mawoko gha Kristu Yesu mu vyaru vyakujumpa 230, ndipo mwakwenelera ŵakumanyikwa na zina lakuti Ŵakaboni ŵa Yehova.

[Mazgu ghamusi]

[Mazgu Ghakukhozgera pa peji 4]

Iwo ŵali kujipatulira kwa Ciuta kuti ŵacite khumbo lake

[Mazgu Ghakukhozgera pa peji 4]

Iwo ŵakugomezga kuti Baibolo ndi Mazgu gha Ciuta

[Mazgu Ghakukhozgera pa peji 5]

Nga ndi umo zina ilo likarongosorekera mu mphara ya mrandu

[Mazgu Ghakukhozgera pa peji 5]

Ŵanji mwa Ŵakaboni 6,000,000 mu vyaru vyakujumpa 230

[Cithuzithuzi pa peji 3]

Iwo mbakukondweskeka na imwe

[Cithuzithuzi pa peji 4]

Zina la Ciuta mu Cihebere camwaka