Kasi Ncici Ico Iwo Ŵakugomezga?
Kasi Ncici Ico Iwo Ŵakugomezga?
ŴAKABONI ŴA YEHOVA ŵakugomezga mwa Ciuta Wankongono zose, Yehova, Mlengi wa kucanya na caru capasi. Cilengiwa cakuzizwiska ico cikutizingirizga cikuvumbura pakweru kuti cikalengeka na Mlengi wapacanya ndiposo wa vinjeru vinandi comene. Nga ndi umo ncito za ŵanarumi na ŵanakazi zikurongolera luso lawo, ndi nteuraso pera na vintu ivyo vili kulengeka na Yehova Ciuta. Baibolo likutiphalira kuti ‘kufuma ku mtendeko wa caru, kaŵiro kake ako nkambura kuwoneka kakumanyikwa mu ivyo viri kulengeka.’ Mwakusazgirapo, mwambura kufumiska mazgu, “mtambo kucanya ukupharazga ucindami wa Ciuta.”—Ŵaroma 1:20; Salmo 19:1-4.
Ŵantu kuti ŵakuwumba miphika panji kupanga mawayilesi gha sinema panjiso kupanga makompyuta kwambura cilato cara. Caru capasi pamoza na vintu ivyo vili kulengeka vya nga ndi vyakumera na vinyama ndi vintu vyakuzizwiska comene. Kapangikiro ka thupi la muntu pamoza na maselo ghake ghambura mapendeko ndi cintu cakusuzga kucipulikiska mwakufikapo—ndipo nanga ungaŵa wongo uwo tikuwugwiriskira ncito pakughanaghanira ngwakuzizwiska comene nkanira! Usange ŵantu ŵali na cilato ca kupangira vintu vyakuzirwa kucoko ivyo ŵakupanga, mwanadi ipo Yehova Ciuta wakaŵa na cakulata pa vilengiwa vyake vyakuzizwiska! Pakuyowoya za fundo iyi, pa Zintharika 16:4 pakuphara kuti: “Yehova walenga vyose vya ncito yake na yake.”
Yehova wakalenga caru capasi na cakulata, nga ndi umo wakalongosolera ku ŵantu ŵakutorana ŵakudanga: “Babanani, mwandane, muzuzge caru, . . . muŵe na mazaza pa somba zamu nyanja, na pa viyuni vyamu dera, na pa vyamoyo vyose ivyo vikwenda pa caru.” (Genesis 1:28) Cifukwa cakuti ŵakaleka kupulikira, ŵantu ŵakutorana aŵa ŵakatondeka kuzuzga caru na mbumba zaurunji, zeneizo ntena zikapwererera caru na vyakumera ndiposo na vinyama. Ndipouli, kutondeka kwawo kuti kukasintiska cilato ca Yehova cara. Virimika vikwi vinandi panyuma pake, mazgu ghakalembeka ghakuti: “Ciuta uyo wakawumba caru; . . . kuti wakacilenga waka cara.” Iye “wakaciwumba kuti ciŵenge cakukhalamo!” Ico cikwenera kuparanyika cara, kweni kuti “caru cikhalenge kwamuyirayira.” (Yesaya 45:18; Mupharazgi 1:4, The New English Bible) Cilato ca Yehova kurazga ku caru capasi cizamufiskika: “Fundo yane tiyimirirenge, tindifiskenge vyose ivyo nkuca navyo.”—Yesaya 46:10.
Ndico cifukwa cake Ŵakaboni ŵa Yehova ŵakugomezgera kuti caru capasi cikhalenge kwamuyirayira ndiposo kuti ŵantu wose, ŵamoyo na ŵakufwa, ŵeneawo ŵazamwenerana na cilato ca Yehova ca kuzakakhala mu caru cakutowa, ŵazamukhala mwenemumo kwamuyirayira. Mtundu wose wa ŵantu wuli kuhara kwananga kufuma kwa Adamu na Heva, ndipo ici ndico cifukwa cake ndise ŵakwananga. (Ŵaroma 5:12) Baibolo likutiphalira kuti: “Njombe ya kwananga ndi nyifwa.” “Ŵamoyo ŵakumanya kuti ŵafwenge, kweni ŵakufwa kuti ŵakumanya kantu cara.” “Mzimu uwo ukwananga utiufwenge.” (Ŵaroma 6:23; Mupharazgi 9:5; Ezekiel 18:4, 20) Anteura, kasi ndi mwauli umo iwo ŵangakhaliraso ŵamoyo kuti ŵazakasangwe na vitumbiko vya pa caru capasi? Kwizira kwekha mu sembe ya ciwombolero ya Kristu Yesu, cifukwa iye wakayowoya kuti: “Ine ndine ciwuka na umoyo: uyo wakupulikana na Ine, nanga wafwe, wati waŵenge wamoyo.” “Ŵose aŵo ŵali mu mararo [ghacikumbukiro, NW] ŵati ŵapulike mazgu ghake, ndipo ŵati ŵafumengemo.”—Yohane 5:28, 29; 11:25; Mateyu 20:28.
Kasi ici cizamucitika wuli? Ici calongosoreka mu “makani ghaweme gha Ufumu,” gheneagho Yesu wakayamba kughapharazga panyengo iyo wakaŵira pano pa caru capasi. (Mateyu 4:17-23) Ndipouli, mazuŵa ghano Ŵakaboni ŵa Yehova ŵakupharazga makani ghaweme mu ntowa yapadera comene.
[Chati pa peji 13]
IVYO ŴAKABONI ŴA YEHOVA ŴAKUGOMEZGA
Cigomezgo Cifukwa ca mu Malemba
Baibolo ndi Mazgu gha Ciuta 2 Tim. 3:16, 17;
ndiposo ndi unenesko 2 Pet. 1:20, 21; Yoh. 17:17
Baibolo ndakugomezgeka comene Mat. 15:3; Kol. 2:8
kuruska midauko ya ŵantu
Zina la Ciuta ndi Yehova Sal. 83:18; Yes. 26:4; 42:8, AS; Ex. 6:3
Kristu ndi Mwana wa Ciuta Mat. 3:17; Yoh. 8:42;
ndiposo ndi mucoko kwa Iye 14:28; 20:17;
Kristu wakaŵa cilengiwa cakudanga Kol. 1:15; Civ. 3:14
ca Ciuta pa vilengiwa vyose
Kristu wakafwira pa khuni Gal. 3:13; Mil. 5:30
lakunyoroka, pa mpinjika cara
Thupi la wuntu la Kristu Mat. 20:28; 1 Tim. 2:5, 6;
likaperekeka nga nciwombolero 1 Pet. 2:24
ca ŵantu ŵakupulikira
Sembe yimoza pera ya Kristu Rom. 6:10; Heb. 9:25-28
yikaŵa yakukwanira
Kristu wakawuskika ku 1 Pet. 3:18; Rom. 6:9;
ŵakufwa nga ndi muntu Civ. 1:17, 18
wa thupi la kumzimu
lambura kufwa
Kuŵapo kwa Kristu nkwa kumzimu Yoh. 14:19; Mat. 24:3;
Sono tikukhala mu ‘nyengo Mat. 24:3-14; 2 Tim. 3:1-5;
ya ku umariro’ Luka 17:26-30
Ufumu wakuwusika na Kristu Yes. 9:6, 7; 11:1-5;
wuzamuwusa caru capasi mu Dan. 7:13, 14; Mat. 6:10
urunji na mtende
Ufumu uwo wizenge na vintu Sal. 72:1-4;
viweme pano pa caru capasi Civ. 7:9, 10, 13-17; 21:3, 4
Caru kuti cizamuparanyika
cara nesi kuŵavya ŵantu Muph. 1:4; Yes. 45:18; Sal. 78:69
Ciuta wazamuwuskapo kaŵiro Civ. 16:14, 16; Zef. 3:8;
ka vintu aka pa nkondo ya Dan. 2:44; Yes. 34:2; 55:10, 11
Haramagedoni
Ŵantu ŵaheni ŵazamuparanyika Mat. 25:41-46; 2 Tes. 1:6-9
kwamuyirayira
Ŵantu ŵakuzomerezgeka Yoh. 3:16; 10:27, 28; 17:3;
na Ciuta ŵazamupokera Mrk. 10:29, 30
umoyo wamuyirayira
Pali ntowa yimoza pera Mat. 7:13, 14; Efe. 4:4, 5
yakurongozgera ku umoyo
Ŵantu ŵakufwa cifukwa ca Rom. 5:12; 6:23
kwananga kwa Adamu
Umoyo wa muntu ukuleka Ezek. 18:4; Muph. 9:10;
kuŵakoso para wafwa Sal. 6:5; 146:4; Yoh. 11:11-14
Helo ndi mararo Job 14:13, Dy;
Civ. 20:13, 14, AV (mu marijini)
Cilindizga ca ŵakufwa ndi ciwuka 1 Kor. 15:20-22;
Nyifwa yakwambiskika na 1 Kor. 15:26, 54; Civ. 21:4;
Adamu yizamkumara Yes. 25:8
Ndi kamskambo kacoko waka Luka 12:32; Civ. 14:1, 3;
ka ŵantu 144,000 awo ŵakuruta 1 Kor. 15:40-53; Civ. 5:9, 10
kucanya kukawusa na Kristu
Ŵantu 144,000 aŵa ŵakubabikaso 1 Pet. 1:23; Yoh. 3:3;
kuŵa ŵana ŵakumzimu ŵa Ciuta Civ. 7:3, 4
Pangano lipya likugwira Yer. 31:31; Heb. 8:10-13
ncito pa Israyeli wakumzimu
Mpingo wa Kristu ngwakuzengeka Efe. 2:20; Yes. 28:16;
pa iyemwene Mat. 21:42
Malurombo ghakwenera Yoh. 14:6, 13, 14;1 Tim. 2:5
kulutanga kwa Yehova
pera kwizira mwa Kristu
Vikozgo vingagwiriskirikanga Ex. 20:4, 5; Lev. 26:1;
ncito cara pa kusopa 1 Kor. 10:14; Sal. 115:4-8
Kugomezga mizimu Dute. 18:10-12; Gal. 5:19-21;
kukwenera kutceŵeka Lev. 19:31
Satana ndiye muwusi wa caru 1 Yoh. 5:19; 2 Kor. 4:4;
wambura kuwoneka Yoh. 12:31
Mkristu wakwenera cara kusopera 2 Kor. 6:14-17; 11:13-15;
lumoza na mawupu agho Gal. 5:9; Dute. 7:1-5
wakupambana nagho cipulikano
Mkristu wakwenera Yak. 4:4; 1 Yoh. 2:15;
kujipatura ku caru Yoh. 15:19; 17:16
Marango gha ŵantu agho Mat. 22:20, 21;
ghakuleka kwimikana na 1 Pet. 2:12; 4:15
marango gha Ciuta
ghakwenera kurondezgeka
Kupokera ndopa mu thupi Gen. 9:3, 4; Lev. 17:14;
kwizira mu mlomo panji Mil. 15:28, 29
mu misipa nkwanangira
marango gha Ciuta
Marango gha Baibolo 1 Kor. 6:9, 10; Heb 13:4;
ghakuyowoya za kakhaliro 1 Tim. 3:2; Zinth. 5:1-23
ghakwenera kurondezgeka.
Kusunga sabata kukarangurika Dute. 5:15; Ex. 31:13; Rom. 10:4;
ku Ŵaisrayeli pera ndipo Gal. 4:9, 10; Kol. 2:16, 17
kuli kumalira pamoza na
Dango la Moses
Kuŵa na gulu la ŵaliska ndiposo Mat. 23:8-12; 20:25-27;
kuŵa na mazina ghapadera Job 32:21, 22
nvyambura kwenelera
Muntu wakacita kusintika cara Yes. 45:12; Gen. 1:27; Mat. 19:4
kweni wakacita kulengeka
Kristu wali kuŵika bambiro 1 Pet. 2:21; Heb. 10:7;
lakuti lirondezgeke Yoh. 4:34; 6:38
pakuteŵetera Ciuta
Ubapatizo wakubizgika thupi lose Mrk. 1:9, 10; Yoh. 3:23;
ncilongolero ca kujipatulira Mil. 19:4, 5
Mwacimwemwe Ŵakristu Rom. 10:10; Heb. 13:15;
ŵakupharazga pakweru Yes. 43:10-12
unenesko wa mu Malemba
[Cithuzithuzi pa peji 12]
CARU . . . cikalengeka na Yehova . . . kuti cipwerereke na muntu . . . ndiposo kuti cikhalike kwamuyirayira
