Kuzirwa kwa Makani Ghaweme mu Cikaya Cinu

MAZUŴA ghano kanandi tikupulika ŵantu ŵakuyowoya kuti: “Visambizgo vya Cikristu vikugwira ncito cara. Vingagwira cara ncito mu caru cakuzara na masuzgo.” Ndipouli, mu cidumbirano ico cikaŵapo pakati pa murongozgi wa Cihindu, Mohandas K. Gandhi, na mwimiliri wakale wa Boma la Britain ku India, Lord Irwin, ghanoghano lapadera likayowoyeka pa cidumbirano ico. Kukapulikikwa kuti Lord Irwin wakafumba Gandhi kuti wayowoye ico iye wakaghanaghananga kuti cingaŵa cakumazgira vyakumara-mahara ivyo vikaŵapo pakati pa Great Britain na India. Gandhi wakatora Baibolo na kujura pa cipaturo ca cinkondi ca Mateyu ndipo panyuma pake wakayowoya kuti: “Kuŵenge kuti caru cako na cane vyagwiriskira ncito visambizgo ivyo Kristu wakayowoya pa Cisambizgo ca pa Lupiri ici, ipo ntena vyakumara-mahara vyose tamazga, kuti vya vyaru vithu pera cara, kweniso na vya caru cose capasi.”

Cisambizgo ici cikuyowoya za kupenja vintu vyakumzimu ndiposo kuŵa wakuzika, wambura zawe, wa lusungu, ndiposo wakutemwa urunji. Ico kuti cikususka ucikozi pera cara, kweniso cikususkaso kukwiyira ŵanji, kuti cikususka ureŵi pera cara, kweniso cikususkaso maghanoghano ghaheni. Ico cikususkaso kupatana kwambura kuzomerezgeka na dango kweneuko kukutimbanizga mbumba ndiposo kukuyuziska ŵana. Ico cikutiphalira ise kuti: ‘Temwanani na awo ŵakumutinkani, wovwirani ŵakusoŵerwa, lekani kweruzga ŵanji mwambura lusungu, ndiposo citirani ŵantu wose uweme nga ndi umo imwe mukukhumbira kuti iwo ŵamucitireni.’ Usange urongozgi wose uwu ungagwiriskirika ncito, pangaŵa vyandulo vinandi comene. Usange ŵantu ŵanandi mu cikaya cinu ŵangarondezga urongozgi uwu, mbwenu cikaya cinu ciŵenge ciweme comene!

Ŵakaboni ŵa Yehova mbalondezgi ŵa urongozgi uwu. Baibolo likuŵasambizga iwo kuzirwiska ntengwa. Ŵana ŵawo ŵakusambizgika na marango ghakwenelera. Kuzirwa kwa mbumba kukudidimizgirika. Mbumba yakukolerana ndi thumbiko mu cikaya cinu, ndiposo nanga mungaŵa mu caru cinu. Mdauko wuli na viyerezgero vinandi vya vyaru vya mazaza ghakuru ivyo vikubwanganduka para cikolerano ca mbumba cikuleghalegha ndiposo para ukhaliro uheni wukusazgikira-sazgikira. Para ŵantu na mbumba zinandi zakhuŵirizgika na Ŵakaboni ŵa Yehova kuti zigwiriskire ncito mu umoyo wawo marango gha Cikristu, ukhaliro uheni ukucepa, uzaghali na kuswa-marango vingacepaso mu cikaya cinu.

 Cimoza mwa vyakumara-mahara ivyo vikaya na vyaru vikukumana navyo ndi kusankana mitundu. Mwakupambana, mpostole Petros wakayowoya kuti: “Nkuwona kuti Ciuta ndi murumbacisko cara: kweni mu mitundu yose uyo wakumopa nakucita urunji ngwa mapokereko na Iyo.” Ndipo Paulos wakalemba kuti: “Mwa Kristu mulive Muyuda panji Mugriki, mulive muzga panji mwanangwa, mulive mwanarumi na mwanakazi: cifukwa mose muli yumoza mwa Kristu Yesu.” (Milimo 10:34, 35; Ŵagalatiya 3:28) Ŵakaboni ŵa Yehova ŵakuzomerezgana nagho mazgu agha. Mafuko na mitundu yose yikukhalira pamoza na kugwiliraso ncito pamoza pa cinyina cawo ca pacaru cose, mu mintavi, ndiposo mu mipingo.

Mafuko ghanji muno mu Africa ghangasazgana pamoza cara kwambura kutimbana. Ndipouli, pa maungano gha Ŵakaboni ŵa Yehova, ŵantu ŵa mafuko ghakupambana-pambana ŵakuryera pamoza, kugona pamoza, na kusopera pamoza mwakukolerana ndiposo ŵakufwasa na mendezgano gha cimwemwe. Awo ŵakugwira ncito za boma ŵakuzizwa para ŵakuwona ici cikucitika. Ciyerezgero cimoza ca cikolerano ca Cikristu caunenesko cikayowoyeka mu  Amsterdam News ya pa August 2, 1958 ya ku New York. Fundo iyi yikalembeka cifukwa ca kulaŵiska ico cikacitika pa ungano wa mitundu yose, uwo ukapharazgika zuŵa la panyuma pake, peneapo Ŵakaboni ŵakujumpa pa 25,000 ŵakawungana pamoza mu Msumba wa New York.

“Palipose, Ŵakaladi, Ŵazungu, ndiposo ŵantu Ŵakuvuma, ŵantu ŵa ukhaliro wakupambana-pambana ndiposo ŵakufumira mu vyaru vyakupambana-pambana ŵakasazgikana pamoza mwa cimwemwe ndiposo mwa mtende. . . . Ŵakaboni awo ŵakapemperanga ŵakufumira mu vyaru 120, ŵakhaliranga pamoza na kupempera mwa mtende, ŵaŵarongora ŵantu ŵa ku America umo ici cingaŵira cipusu kucitika. . . . Ungano uwu nciyerezgero ciweme comene ca umo ŵantu ŵangagwilira ncito pamoza ndiposo umo ŵangakhalira pamoza.”

Ŵantu ŵanandi ŵangayowoya kuti marango gha Cikristu ghakugwira ncito cara mu nyengo yithu yino. Ndipouli, ncici ico caŵa cakugwira ncito panji ico cingagwira ncito? Marango gha Cikristu ghangaŵa ghacandulo comene usange ghangagwiriskirika ncito mu cikaya cinu sono, ndipo ghangaŵa lufura lwa kugumatiskira pamoza ‘mitundu yose, mafuko, na ŵantu’ pa caru cose capasi, pasi pa muwuso wa Ufumu wa Ciuta kurazga ku mtundu wa ŵantu.—Civumbuzi 7:9, 10.

[Mazgu Ghakukhozgera pa peji 23]

Ŵantu ŵa mafuko na mitundu yose ŵakugwilira ncito pamoza

[Mazgu Ghakukhozgera pa peji 24]

Cikristu cikugwira ncito. Ncici cinyake caŵa cakugwira ncito?