Makani Ghaweme Gheneagho Ŵakukhumba Kuti Imwe Mughapulike

PANYENGO iyo Yesu wakaŵira pano pa caru capasi, ŵasambiri ŵake ŵakiza kwa iye na kumufumba kuti: “Mutiphalire, vyeneivi vizamkuŵako pa uli, ndipo ncici cimanyikwiro ca kwiza kwinu, na ca umariro wa mgonezi?” Iye wakazgora kuti kuzamuŵa nkondo pakati pa mitundu yinandi, njala, vilengo, vindindindi, ndiposo kwandana kwa ucikana-marango, ŵasambizgi ŵa visopo ŵazamupusika ŵanandi, kutinkika ndiposo kuzikizgika kwa ŵarondezgi ŵake ŵaunenesko, ndiposo kuŵavya citemwa caurunji pakati pa ŵantu ŵanandi. Peneapo vintu ivi vikeneranga kucitika, ici cikeneranga kuŵa cimanyikwiro cakuti Kristu walipo mwambura kuwoneka ndiposo kuti Ufumu wa kucanya waneng’enera. Agha ghakeneranga kuŵa makani—inya, makani ghaweme! Ndipo Yesu wakasazgirapo mazgu ghakurondezgapo agha nga ncigaŵa ca cimanyikwiro: “Makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umariro uti wizenge.”—Mateyu 24:3-14.

Mbunenesko nadi kuti vintu ivyo sono vikucitika pa caru ndi viheni, kweni ng’anamuro lake ndiweme cifukwa likutimanyiska za kuŵapo kwa Kristu. Vyakucitika ivyo vyalongosoreka pacanya apa vikayamba kucitika mu cirimika ico cikapharazgika comene ca 1914! Ico cikaŵa cimanyikwiro ca umariro wa Nyengo za Ŵamitundu ndiposo yikaŵa nyengo ya pakusintira vintu kufuma ku muwuso wa ŵantu kurazga ku Muwuso wa Virimika Cikwi wa Kristu.

Pazamuŵa nyengo yakusintira vintu yeneiyo yikalongoreka mu 110:1, 2, ndiposo Civumbuzi 12:7-12. Pano tikuwona kuti Kristu wakwenera kukhala ku woko lamaryero la Ciuta kucanya mupaka panyengo yakuŵira Themba. Ndipo panyuma pake nkondo kucanya yikenera kuyamba ndipo Satana wakuponyekera pa caru capasi, kwiziska soka pa caru, ndipo Kristu wakenera kuwusa pakati pa ŵarwani ŵake. Umariro wose wa uheni wukwenera kumara pa “suzgo yikuru,” nkondo yizamufika pacinyina pa Haramagedoni ndipo panyuma pake Muwuso wa Virimika Cikwi wa Kristu uwo ngwa mtende uzamuyamba.—Mateyu 24:21, 33, 34; Civumbuzi 16:14-16.

 “Kweni umanye ceneici,” likuphara nteura Baibolo, “kuti mu mazuŵa gha ku umariro nyengo zinonono ziti zizenge. Cifukwa ŵantu ŵati ŵaŵenge ŵakujitemwa, ŵakutemwa ndrama, ŵakujituntumuska, ŵakujiŵikamo, ŵakutuka, ŵambura kupulikira ŵapapi, ŵambura kuwonga, ŵaheni, ŵambura kutemwa ŵanyaŵo, ŵanonono, ŵakusesa, ŵambura kujikora, ŵakali, ŵambura kutemwa uweme, ŵa ciŵembu, ŵakajilangi, ŵakutukumuka, ŵakutemwa vyakusekereska kwakuruska kutemwa Ciuta; ŵakukora kawonekero ka kusopa-Ciuta, kweni ŵakukana nkongono zake: kwa ŵeneaŵo naŵo razgako nkonto.”—2 Timote 3:1-5.

Ŵantu ŵanji ŵangasuska kuti vintu ivi vyaŵa vikucitika na kale mu mdauko wose wa ŵantu, kweni unenesko ngwakuti, ivyo kuti vyacitika pa ukuru uwo vikucitika sono cara. Nga ndi umo ŵakulemba mdauko na ŵamutora makani ŵakuyowoyera, palijirethu nyengo pano pa caru capasi yakuyana na yira yakwambira mu cirimika ca 1914 mupaka kuntazi kose uku. (Wonani peji 7.) Masoka ghaŵa ghanandi comene kuruska kunyuma kose uku. Mwakusazgirapo pa vimanyikwiro vinyake ivyo Kristu wakayowoya vya mazuŵa gha ku umariro, fundo izi zikukhumbikwira pwererero lithu: Cipharazgo ca kuŵapo kwa Kristu na Ufumu caŵa cakuzirwa comene mu mdauko. Palije ntambuzgo iyo yayana na iyo yaŵikika pa Ŵakaboni ŵa Yehova cifukwa ca kupharazga kwawo. Ŵanandi ŵa iwo ŵakakomekera mu misasa yakusuzgirako ŵantu ya Nazi. Mupaka lero, mu vigaŵa vinyake Ŵakaboni ŵa Yehova mbakukanizgika,  ndipo mu malo ghanji ŵakukakika, ŵakuŵikika mu gadi, ŵakuyuzgika ndiposo ŵakukomeka. Ici cose ncigaŵa ca cimanyikwiro ico Yesu wakapereka.

Nga ndi umo kukaroskekera pa Civumbuzi 11:18, ‘mitundu njakukwiya’ na Ŵakaboni ŵa Yehova ŵamagomezgeko, ndipo ici cilongorenge kuti ‘ukali wake’ wa Yehova uŵenge pa mitundu iyi. Lemba leneliri pera likupharaso kuti Ciuta ‘waparanyenge aŵo ŵakuparanya caru.’ Mu mdauko wose wa ŵantu paŵavya nyengo pa caru capasi iyo umoyo waŵa pangozi yanteura. Ndipouli, sono pali mpambano! Ŵasayansi ŵanandi ŵacenjezga kuti usange ŵantu ŵarutirizgenge kwananga caru capasi, ico mbwenu ciŵenge cakukhalika cara. Kweni Yehova “wakaciwumba kuti ciŵenge cakukhalamo,” ndipo iye waparanyenge ŵantu awo ŵakunanga caru capasi pambere ŵandacinangirethu.—Yesaya 45:18.

VITUMBIKO IVYO UFUMU UKWIZA NAVYO PA CARU CAPASI

Ghanoghano lakuti ŵantu ŵakhalenge pa caru capasi mwakuwusika na Ufumu wa Ciuta lingawoneka la cilendo kwa ŵantu ŵanandi awo ŵakugomezga Baibolo, ici ncifukwa cakuti iwo ŵakughanaghana kuti wose awo ŵazamuponeskeka ŵazamuŵa kuti ŵali kucanya. Baibolo likurongora kuti mbantu ŵacoko waka awo ŵarutenge kucanya, peneapo kuli kwakuti awo ŵazamukhala  na umoyo kwamuyirayira pa caru capasi ŵazamuŵa mzinda ukuru wambura mapendeko. (Salmo 37:11, 29; Civumbuzi 7:9; 14:1-5) Fundo yakuti Ufumu wa Ciuta wakuwusika na Kristu wuzamuwusa caru cose capasi, njakurongoreka mu ucimi wa mu Baibolo mu buku la Daniel.

Mu buku ili Ufumu wa Kristu wayerezgereka na libwe ilo likacekeka kufumira ku muwuso wa Yehova wakuyana na lupiri. Ilo likutimba na kuparanya cikozgo ico cikwimira mitundu yankongono ya caru capasi, ndipo “libwe ilo likatimba cikozgo likazgoka lupiri lukuru na kuzuzga caru cose capasi.” Ucimi uwo ukurutirizga kuphara kuti: “Mu mazuŵa gha mathemba agha Ciuta wa kucanya wati wimike uthemba, uwo kuti wamkuparanyika cara muyirayira, panji mazaza ghake ghasidike ku fuko linyake cara. Wamkuteketa mauthemba ghose agha na kughamara kweni uwu tiwimirire muyirayira.”—Daniel 2:34, 35, 44.

Ndi Ufumu weneuwu ndiposo na cilindizga cakuzikika mu Malemba ca kuzakakhala na umoyo wamuyirayira mu caru capasi cakutozgeka ndivyo Ŵakaboni ŵa Yehova ŵakukhumba kumuphalirani. Mamiliyoni ghanandi gha ŵantu awo sono mbamoyo, ndiposo na mamiliyoni ghanandi gha ŵantu awo ŵali mu madindi ŵazamuŵa na mwaŵi wakuzakakhala mu caru ici. Panyuma pake, pasi pa Muwuso wa Virimika Cikwi wa Kristu Yesu, cilato cakwambilira ca Yehova cakulengera caru capasi ndiposo na kuŵikamo ŵantu ŵaŵiri ŵakutorana mu caru ici cizamufiskika. Paradiso wa caru capasi uyu kuti wazamuŵa wakuvuska cara. Nga ndi umo Adamu wakapikira ncito mu munda wa Edeni, mwanteura pera mtundu wa ŵantu wuzamuŵaso na ncito zinandi za kupwererera caru capasi, vyakumera na vinyama ivyo vilimo. Iwo “ŵazamusangwa kwa nyengo yitari pakugwira ncito na mawoko ghawo.”—Yesaya 65:22, Revised Standard Version; Genesis 2:15.

Ndi malemba ghanandi agho ghangaperekeka kuti ghalongore umo vintu vizamuŵira panyengo iyo zgoro la pempero ilo Yesu wakatisambizga lizamuzgoreka: “Ufumu winu wize. Khumbo linu licitike pano pasi, nga nkucanya.” (Mateyu 6:10) Ndipouli, panyengo yasono ili litikwanire: “Nkapulika lizgu likuru lakufuma ku cizumbe lakuti, ‘Ehena, hema la Ciuta liri na ŵantu, ndipo wati wakhalenge naŵo, ndipo iŵo ŵati ŵaŵenge ŵantu ŵake. ndipo Ciuta Iyo wati waŵenge pamoza naŵo, na kuŵa Ciuta waŵo: ndipo wati wafyurenge sozi lose ku maso ghawo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.’ Ndipo Uyo wakukhala pa cizumbe wakati, ‘Ehena, vintu vyose nkuvizgora vipya.’ Ndipo wakati, ‘Lemba: pakuti mazgu gheneagha ngakugomezgeka na ghakuneneska.’”—Civumbuzi 21:3-5.

[Mazgu Ghakukhozgera pa peji 15]

“Nyengo zinonono”

KWENI “umariro uti wizenge”

[Cithuzithuzi pa peji 18]

Netherlands

[Cithuzithuzi pa peji 18]

Nigeria