Ntowa Izo Ŵakugwiriskira Ncito Kuti Ŵamuphalireni

ŴAKRISTU ŵakulangurika kuti “ŵapange ŵasambiri mu ŵantu ŵamitundu yose,” kweni ici kuti cikung’anamura kuti iwo ŵakwenera kucicizga ŵanji kuti ŵaŵasinte cara. Languro la Yesu likaŵa lakuti ‘ŵapharazge makani ghaweme ku ŵakuzika,’ ‘kukurunga ŵakupyoka-mtima,’ ndiposo “kusanguruska ŵose aŵo ŵakutengera.” (Mateyu 28:19, NW; Yesaya 61:1, 2; Luka 4:18, 19) Ŵakaboni ŵa Yehova ŵakukhumba kucita mwanteura mwakupharazga makani ghaweme ghakufuma mu Baibolo. Nga ndi umo kukaŵira mu nyengo ya Ezekiel, Ŵakaboni ŵa Yehova mazuŵa ghano ŵakuyezgayezga kuti ŵasange awo “ŵakucincima na kulira cifukwa ca maunyankasi ghose agho ghakucitika.”—Ezekiel 9:4.

Ntowa yiweme yakumanyikwa makora iyo iwo ŵakugwiriskira ncito kuti ŵasange awo mbakusuzgika cifukwa ca mikhaliro iyo yiriko sono, ndiyo mwakuruta kunyumba na nyumba. Mwanteura, iwo ŵakuyezgayezga kuti ŵafikire ŵantu, kuyana na umo wakacitira Yesu peneapo “wakendendekanga mu mizi na mu vikaya, na kupharazga na kuwuzga makani ghaweme gha Ufumu wa Ciuta.” Ŵasambiri ŵake ŵakutendekera ŵakacita mwakuyana waka. (Luka 8:1; 9:1-6; 10:1-9) Mazuŵa ghano, kweneuko ncamacitiko, Ŵakaboni ŵa Yehova ŵakuyezgayezga kufika panyumba yiliyose nyengo zinandi pa cirimika, ndipo ŵakukhumbisiska kuti ŵadumbirane na mweneko wa nyumba kwa maminiti ghacoko waka pa nkani iyo yacitika ku cigaŵa ico panji pa nkani yiliyose iyo yacitika pa caru cose, iyo yakondweska ŵantu panji iyo njakufipiska mtima kwa iwo. Lemba limoza panji ghaŵiri ghangaŵazgika pa cidumbirano ico, ndipo para mweneko wa nyumba walongora kukondweskeka, Kaboni uyo wangapanga manozgero ghakuti wazakizeso panyengo yinyake kuti ŵazakarutirizge cidumbirano ico. Mabaibolo na mabuku ghakurongosora Baibolo ghakugaŵirika, ndipo para mweneko wa nyumba wakhumba, sambiro la Baibolo la panyumba likucitika kwambura kulipira. Mamiliyoni ghanandi gha masambiro gha Baibolo ghacandulo agha ghakucitiskika mwa nyengo na nyengo kwa muntu payekha ndiposo na ku mbumba zinandi pa caru cose capasi.

Ntowa yinyake iyo “makani ghaweme gha Ufumu” ghakupharazgikira ku ŵanji ndiyo kwizira pa maungano agho ghakucitikira mu Nyumba za Ufumu. Ŵakaboni ŵakuwungana pa malo agha katatu pa sabata yiliyose. Ungano umoza ndi nkani iyo yikudumbika ku ŵategherezgi ndipo mutu wake ukuzikika pa nkani zipya izo zikukhwaska ŵantu, panyuma pake pakuŵa sambiro la nkani ya mu Baibolo panji pa ucimi, ndipo magazini ya Gongwe la Mulinda  yikugwiriskirika ncito nga ndi citopoko cake. Ungano unyake ukuŵa sukulu iyo yikusambizga Ŵakaboni kuti ŵaŵe ŵapharazgi ŵaweme ŵa makani ghaweme, mwakurondezgapo cikuŵa cidumbirano ca ncito yakucitira ukaboni mu cigaŵa ico. Mwakusazgirapo, kamoza pa sabata, Ŵakaboni ŵakuwungana mu nyumba, mu tumagulu tucokotucoko cifukwa ca masambiro gha Baibolo.

Muntu waliyose wangafikapo pa maungano agha. Pakuŵavya kusonkeska ndrama. Maungano agha ghakuŵa ghacandulo kwa waliyose. Baibolo likuphara kuti: “Tikwenera kuwoneseska umo tingaciskirana yumoza na munyake pakutemwa ndiposo pakucita uweme, kukhala cara ku maungano ghithu, nga ndi umo ŵanji ŵakucitira, kweni mu malo mwake tikhuŵirizgane yumoza na munyake, comene-comene sono cifukwa Zuŵa laneng’enera.” Kuŵazga ndiposo kupanga kafukufuka kwa muntu waliyose payekha nkhwakuzirwa, kweni kuwungana pamoza na ŵanji nkhwakuciska: “Nga ndi umo cisulo cikunolera cisulo cinyake, anteura pera muntu naye wakunora muntu munyake.”—Ŵahebere 10:24, 25; Zintharika 27:17, The New English Bible.

Ŵakaboni ŵakugwiriskiraso ncito mipata yiweme yakupharazgira makani ghaweme peneapo ŵakukumana na ŵantu mu vyakucita vyawo vya zuŵa na zuŵa. Mutepanji ŵangadumbiskana mwakudumura na mzengezgani panji na mulendo uyo ŵali naye lumoza mu basi panji mu ndege, ŵakuŵaso na cidumbirano ca nyengo yitari na mubwezi panji mbali wawo wakuthupi, panji cidumbirano na munyawo wa pa ncito panyengo ya nkomaliro. Cigaŵa cikuru ca kucitira ukaboni ico Yesu wakacita panyengo iyo wakaŵira pano pasi cikaŵa ca mtundu uwu—wakenda mu mpepete mwa nyanja, wakakhala pa lupiri, wakarya cakurya mu nyumba ya muntu yunji, wakaruta ku ukwati, ndiposo wakakwera ngaraŵa yakukolera somba mu Nyanja ya Galileya. Iye wakasambizga mu masunagoge ndiposo mu tempele mu Yerusalemu. Kulikose uko wakaŵa, wakasanga mipata yakuti wayowoye za Ufumu wa Ciuta. Ŵakaboni ŵa Yehova ŵakuyezgayezga kurondezga marwayo ghake pa nkani iyi.—1 Petros 2:21.

 KUPHARAZGA KWIZIRA MU NKARO YIWEME

Ntowa izo iwo ŵakumuphalirani makani ghaweme zingaŵavya candulo usange muntu uyo wamufikirani wakuleka kugwiriskira ncito iyemwene visambizgo ivyo. Kuyowoya cintu cinyake na kucita cintu cakupambana naco mbutesi, ndipo utesi wa visopo wapangiska mamiliyoni gha ŵantu kuleka kugomezga Baibolo. Kuti tingasuska Baibolo ilo lene cara. Ŵalembi na Ŵafarisi ŵakaŵa nagho Malemba Ghacihebere, kweni Yesu wakaŵasuska iwo kuti mbatesi. Iye wakayowoya kuti iwo nawo ŵakaŵazganga mu Dango la Moses, kweni wakaŵaphalira ŵasambiri ŵake kuti: “Vyeneivyo vyose ŵakumuphalirani, mucitenge ndipo musungirirenge: kweni mungarondezganga milimo yaŵo: cifukwa ŵakuyowoya, ndipo kuti ŵakucita cara.” (Mateyu 23:3) Nkaro yiweme ya Mkristu njakuzirwa comene kuruska maora ghanandi agho wakupharazgira. Ici cikayowoyeka ku ŵawoli Ŵacikritstu awo ŵafumu ŵawo mbambura cipulikano: “Ŵangawojeka na kakhaliro ka ŵawoli ŵaŵo kwambura mazgu; uku ŵakuwona kakhaliro kinu katuŵa.”—1 Petros 3:1, 2.

Mwanteura, Ŵakaboni ŵa Yehova ŵakuyezgayezga kupharazga makani ghaweme ku ŵanji kwizira mu ntowa iyiso: mwakuŵa na nkaro yiweme ya Cikristu iyo iwo ŵakupharazga ku ŵanji. Iwo ŵakuyezgayezga ‘kucitira ŵantu vyeneivyo iwo nawo ŵakutemwa kuti ŵantu ŵaŵacitire.’ (Mateyu 7:12) Iwo ŵakuyezgayezga kucita nteura ku ŵantu wose, kuti ku Ŵakaboni ŵanyawo pera cara, nesi ku mabwezi, ŵazengezgani, panji ŵabali ŵawo. Cifukwa cambura kuŵa ŵakongorekwa, nyengo zinyake ŵakubuda mukacitiro. Ndipouli, liri khumbo lawo lakuti ŵacitire ŵantu wose uweme, kuti mwakuŵaphalira pera za makani ghaweme gha Ufumu cara, kweniso mwakupereka covwiro apo mpakukhumbikwira.—Yakobe 2:14-17.

[Cithuzithuzi pa peji 19]

Hawaii

[Cithuzithuzi pa peji 19]

Venezuela

[Cithuzithuzi pa peji 19]

Yugoslavia

[Vithuzithuzi pa peji 20]

Nyumba za Ufumu izo kalinganizgiro kake nkapadera, ndi malo ghakudumbiskiranamo Baibolo

[Vithuzithuzi pa peji 21]

Mu umoyo wawo wa mbumba, ndiposo mu vidumbirano vyawo na ŵanji, mwaunenesko mtima, Ŵakaboni ŵakuyezgayezga kucita vintu ivyo ŵakupharazga ku ŵanji