FUMBO 10
Kasi Baibolo Linganovwira Wuli?
KASI IMWE MUNGACHITA WULI?
Wonani ivyo vyachitikira Davide: Iyo wakuluta ku malo ghanyake nausiku. Ndipo chifukwa chakuti kuli mdima, wakutondeka kuwona vikhwangwani kuti vimovwire kumanya apo wali. Pamanyuma, wamanya kuti wangutora nthowa yiheni ndipo wasoŵa.
Kasi imwe muŵenge Davide, mwate muchitenge wuli?
YIMANI NA KUGHANAGHANA!
Pali vinandi ivyo mungachita:
-
Mungafumba nthowa.
-
Mungabuska tochi.
-
Mungalutilira kwenda, kughanaghana kuti panyake mwamusanga nthowa.
Unenesko ngwakuti para mungagwiliskira ntchito fundo yachitatu, mbwenu njambura kukora.
Fundo yachiŵiri njakovwira kujumpha yakwamba chifukwa mubuskenge waka tochi na kutora nthowa yakwenera m’paka mukafike uko mukuluta.
Baibolo nalo lingamovwirani munthowa yakuyana waka.
Buku lakumanyikwa chomene ili
-
lingamovwirani para muli mu suzgo
-
lingamovwirani kuti mujimanye makora na kuŵa munthu muwemi
-
lingamovwirani kuti mumanye ivyo mungachita kuti muŵe na umoyo wakukondweska
Kuzgora Mafumbo Ghakuzirwa
Para tamanya waka kuyowoya, tikufumba mafumbo nga agha:
-
Chifukwa wuli mtambo ukuwoneka nthena?
-
Kasi nyenyezi zili kupangika wuli?
Pamanyuma tikwamba kufumba mafumbo ghakukhwaskana na umoyo withu.
Mazgoro gha mafumbo agha ghali mu Baibolo.
Ŵanthu ŵanandi ŵakuti mu Baibolo muli waka vidokoni, ndakale chomene, panji ndakusuzga chomene kupulikiska. Kweni kasi suzgo ni Baibolo, panji ni vinthu vyautesi vyakukhwaskana na Baibolo ivyo ŵanthu ŵakuyowoya? Kasi ŵangaŵa kuti ŵali kupusikika?
Mwachiyelezgero, ŵanthu ŵakughanaghana kuti Baibolo likuti Chiuta ndiyo wakulamulira charu. Kweni kasi ichi ntchakupulikikwa? Sono charu chafika paheni chomene. Muli masuzgo na vyakuŵinya vinandi, ŵanthu ŵakulwara na kufwa, kweniso muli ukavu na masoka. Kasi ntchakupulikikwa kuti Chiuta wachitemwa ndiyo wakulamulira charu chanthena?
Kasi mungatemwa kumanya zgoro? Mungazizwa kumanya ivyo Baibolo likuyowoya pa nkhani ya uyo wakulamulira charu.
Mukwenera kuti mwawona kuti ulongozgi wa mu kabuku aka wafuma mu Baibolo. Ŵakaboni ŵa Yehova ŵakugomezga kuti mu Baibolo muli ulongozgi wakovwira. Chifukwa ntchakuti, Baibolo ‘ndakupelekeka na Chiuta kwizira mwa mzimu ndipo ndachandulo pa kusambizga, kuchenya, na kunyoloska vinthu.’ (2 Timote 3:16, 17) Tikumupemphani kuti mulisande panji kuti muliŵerenge.