Cipangeni Ico Kuŵa Cakulatapo Cinu Kumteŵetera Ciuta Kwamuyirayira
Cipaturo 18
Cipangeni Ico Kuŵa Cakulatapo Cinu Kumteŵetera Ciuta Kwamuyirayira
1, 2. Kasi cinyake cakukhumbikwa ncivici padera pa kuŵa na cimanyisko ca Ciuta?
YEREZGERANI kuti imwe mwayimirira pa muryango wakukiya wakunjilira ku cipinda uko kuli usambazi unandi comene. Tiyowoye kuti mweneco wamupani makiyi ndipo wamuphalirani kuti mutoremo vintu vyakuzirwa ivi. Kiyi uyo nta wamucitiraninge kaweme kwekha usange mwamugwiriskira ncito. Mwakuyanawaka, imwe mukwenera kugwiriskira ncito cimanyisko usange nkwakuti cimwandulireni.
2 Ici ncaunenesko comene na cimanyisko ca Ciuta. Mwanadi, cimanyisko cakurongosoka ca Yehova Ciuta na Yesu Kristu cikung’anamura umoyo wamuyirayira. (Yohane 17:3) Kweni, cirindizga ico kuti cingakwaniriskika cara mwakuŵa waka na cimanyisko. Nga ndi umo mwate mugwiriskire ncito kiyi wakukhumbikwa uyo, mwakuyana waka mukukhumbikwira kugwiriskira ncito cimanyisko ca Ciuta mu umoyo winu. Yesu wakayowoya kuti aŵo ŵakucita khumbo la Ciuta “ŵati ŵanjirenge mu Ufumu wa kucanya.” Ŵantu ŵangati ndi aŵa ŵamkuŵa na mwaŵi wakuteŵetera Ciuta kwamuyirayira!—Mateyu 7:21; 1 Yohane 2:17.
3. Kasi khumbo la Ciuta kwa ise ndakuti uli?
3 Pamanyuma pakuti mwasambira ico ndi khumbo la Ciuta, ncakuzirwa kulicita. Kasi mukughanaghana kuti khumbo la Ciuta kwa imwe ndakuti uli? Lingarongosoleka mwakudumura mu mazgu agha: Muyezgani Yesu. 1 Petros 2:21 wakutiphalira ise kuti: “Cifukwa mukacemekera ceneici: pakuti Kristu nayo wakakomwera imwe, na kumusidirani bambiro, mwakuti murondezgenge marwayo ghake.” Nteura, kuti mucite khumbo la Ciuta, mukwenera kurondezga ciyerezgero ca Yesu fikepo nkanira. Umo ndimo mungagwiriskira ncito cimanyisko ca Ciuta.
MWENEUMO YESU WAKACIGWIRISKIRA NCITO CIMANYISKO CA CIUTA
4. Kasi cifukwa ncici Yesu wakumanya vinandi pakunena za Yehova, ndipo kasi ndi mwauli mweneumo wagwiriskira ncito cimanyisko ici?
4 Yesu Kristu wali na cimanyisko cikuru comene ca Ciuta kwakuruska munyake waliyose. Iye wakakharanga nakuteŵetera pamoza na Yehova Ciuta kucanya kwa vilimika vyambura kupendeka pambere wandize pano pacaru ca pasi nga ndi muntu. (Ŵakolose 1:15, 16) Ndipo kasi Yesu wakacitaci na cimanyisko cose ico? Kuti wakakhorweskeka nakuŵa waka naco ntena cara. Yesu wakakhala na umoyo kwakuyana na cimanyisko ico. Ndico ncifukwa wakaŵa walusungu comene, wakuzika, ndipo wakacita nawo mwakutemwa ŵantu ŵanyake. Mwanteura Yesu wakayezganga Ŵadada ŵake ŵakucanya nakucita mwakukorereranako na cimanyisko cake ca ntowa za Yehova na wuntu wake.—Yohane 8:23, 28, 29, 38; 1 Yohane 4:8.
5. Kasi cifukwa ncici Yesu wakababatizika, ndipo kasi ndimwauli mweneumo wakakhalira kwakuyana na cing’anamuro ca ubabatizo wake?
5 Cimanyisko ico Yesu wakaŵa naco cikamucitiskaso kutora ntowa yakukhumbikwa comene. Wakafuma ku Galileya kwiza ku Mronga wa Yordani, kweneuko Yohane wakamubabatiza iye. (Mateyu 3:13-15) Kasi ubabatizo wa Yesu ukarongoraci? Nga ndi Muyuda, wakababika ku mtundu wapadera kwa Ciuta. Mwanteura, Yesu wakaŵa wakujipereka kale kufuma papo pakubabika. (Exodus 19:5, 6) Mwakujipereka ku ubabatizo, iye wakajiperekanga iyemwene kwa Yehova kucita ilo likaŵa khumbo la uciuta kwa iye pa nyengo iyo wakaŵa pano pasi. (Ŵahebere 10:5, 7) Ndipo Yesu wakakwaniska ng’anamuro la ubabatizo wake. Iye wakajipereka kucita uteŵeti wa Yehova, kusangana na ŵanji cimanyisko cakunena za Ciuta pa mwaŵi wuliwose. Yesu wakaŵa wakukondwa kucita khumbo la Ciuta, nanga kungaŵa kuyowoya kuti ici cikaŵa nga ndi cakurya kwa iye.—Yohane 4:34.
6. Kasi ndi mwantowa uli mweneumo Yesu wakajipatira?
6 Yesu wakamanya nkanira kuti kucita khumbo la Yehova kumutayiskenge vinandi—nanga ungaŵa umoyo wake weneco. Ndipouli, Yesu wakajipata, kuŵika vyakukhumba vyake vyakuthupi pa malo ghaciŵiri. Kucita khumbo la Ciuta nyengo zose kukaŵa pa malo ghakudanga. Mu vyakucitika vya mtundu wa nga ndi uwu, kasi ndi mwauli mweneumo tingarondezgera ciyerezgero ca kufikapo ca Yesu?
NTOWA ZENEIZO ZIKURONGOZGERA KU UMOYO WANDANDA
7. Kasi ndi ntowa zinyake nzi izo muntu wakwenera kuzitora mwakuti wenereskeke kubabatizika?
7 Mwakupambanako na Yesu, ise ndise ŵambura kufikapo ndipo tingafika pa kupanga cakusanka ca kubabatizika kwekha usange tatora ntowa zinyake zakukhumbikwira. Izi zikwamba mwa kusanga cimanyisko cakulongosoka ca Yehova Ciuta na Yesu Kristu mu mitima yithu. Kucita ici kukuticitiska kuŵa na cipulikano na kuŵa na citemwa cikuru pa Ciuta. (Mateyu 22:37- 40; Ŵaroma 10:17; Ŵahebere 11:6) Kulondezga marango, mapulinsipolo, na vipimo vyake vya Ciuta kukwenera kutitutuzga ise kulapa, kucita citima cauciuta cifukwa ca zakwananga zithu za nyengo yakumanyuma. Ici cikulongozgera ku kung’anamuka mtima, ndiko kuti, kuwerera na kuleka ntowa zithu ziheni zose zakale izo tikendangamo apo tikaŵavya cimanyisko ca Ciuta. (Milimo 3:19) Mwanadi, usange ticali kucita ndipera kwananga kunyake kwa muubendi m’malo mwakucita urunji, ndiko kuti tindang’anamuke, nesi kuti tikupusika Ciuta cara. Yehova wakumanya upusikizgi wose.—Luka 12:2, 3.
8. Kasi mukwenera kucitaci usange mukukhumba kutoramo cigaŵa mu ncito yakupharazga za Ufumu?
8 Sono pakuti mwaŵa mukusambira cimanyisko ca Ciuta, kasi ncamahara yayi kuwona vyakucitika vya kumzimu mu ntowa ya imwe mwaŵene? Mutepanji muli ŵakunweka nadi kuphalirako ŵabali ŵinu, ŵabwezi, na ŵanyake za ivyo mukusambira. Nakwenenako, mutepanji mungaŵa muli kwambapo kale kucita ici, nga ndi umo Yesu wakaphalirirako ŵanji makani ghaweme mwa ntowa yakucezga. (Luka 10:38, 39; Yohane 4:6-15) Kwasono mungatemwa kucita mwakusazgikira. Ŵakulu ŵa Cikristu ŵaŵenge ŵakukondwa kuyowoya namwe mwakuti ŵawone usange imwe mwafikapo pakutoramo cigaŵa mu ncito yakupharazga za Ufumu ya nyengo zose ya Ŵakaboni ŵa Yehova. Usange muli ŵakufikapo, ŵakulu ŵapangenge manozgero ghakuti imwe murute na yumoza wa ŵa Kaboni mu uteŵeti. Ŵasambiri ŵa Yesu ŵakarondezga urongozgi wake mwakuti ŵafiske makora uteŵeti wawo kwambura ntimbanizgo. (Marko 6:7, 30; Luka 10:1) Mupindulenge kufuma ku covwiro cakuyana waka para mukutoramo cigaŵa mu kupharazga makani gha uthenga wa Ufumu ku nyumba na nyumba ndiposo mwantowa zinyake.—Milimo 20:20, 21.
9. Kasi ndi mwauli mweneumo muntu wakupangira kujipereka kwa Ciuta, ndipo kasi kujipereka kukukhwaska uli umoyo wa muntu?
9 Kupharazga makani ghaweme kwa ŵantu ŵa mtundu uliwose mu gawo la mpingo ndiyo ntowa yakusangira ŵantu ŵakutemwa urunji ndipo kuli pakati pa ncito ziweme zakurongora kuti muli na cipulikano. (Milimo 10:34, 35; Yakobe 2:17, 18, 26) Kusangikapo rutaruta pa maungano gha Cikristu nakutoramo cigaŵa ca candulo mu ncito yakupharazga ni zinyake mwa ntowa zakurongolera kuti mwalapa nakung’anamuka ndipo sono muli ŵakusimikizga kukhala na umoyo kwakuyana na cimanyisko ca Ciuta. Kasi sitepe lakurondezgapo lamahara ni ndi? Ndilo kupanga kujipereka kwa Yehova Ciuta. Ici cikung’anamura kuti mu lurombo lwakufuma pasi pa mtima, imwe mumuphalire Ciuta kuti muli ŵakukhumbisiska ndipo na mtima wose mukupereka umoyo winu kwa iye kuti mucite khumbo lake. Iyi ndiyo ntowa yakujiperekera imwe mwaŵene kwa Yehova nakuzomerezga goriwori lipusu la Yesu Kristu.—Mateyu 11:29, 30.
UBABATIZO—ICO UKUNG’ANAMURA KWA IMWE
10. Kasi cifukwa ncici mukwenera kubabatizika pamanyuma pakuti mwapanga kujipereka imwe mwaŵene kwa Yehova?
10 Kwakuyana na Yesu, ŵose aŵo ŵakuŵa ŵasambiri ŵake ŵakwenera kubabatizika. (Mateyu 28:19, 20) Kasi cifukwa ncici ici ncakwenerera pamanyuma pakuti mwapanga kujipereka kwa Ciuta? Pakuti mwajipereka imwe mwaŵene kwa Yehova, iye wakumanya kuti mukumutemwa. Kweni kwambura kukayika imwe mukhumbenge kucitapo kantu kakusazgirapo mwakuti ŵanji ŵamanye pakunena za citemwa cinu ca kwa Ciuta. Eya, ubabatizo ukumupani mwaŵi wakumanyiska ŵanji kumanya pakweru za kujipereka kwinu kwa Yehova Ciuta.—Ŵaroma 10:9, 10.
11. Kasi ubabatizo cikung’anamuraci?
11 Kweni ubabatizo uli na ving’anamuro vinandi vyakuyerezgera. Para mukubizgika, panji “kuwundilika,” pasi pa maji, cikuŵa ngati kuti mwafwa ku ntowa zinu zaumoyo zakale. Para mwazuwuka kufuma mu maji, cikuŵa ngati kuti mukuwukira ku umoyo wupya, uwo ngwakurongozgeka na khumbo la Ciuta kuti linu cara. Ni nadi, ici kuti cikung’anamura kuti mubudengeso cara yayi, pakuti ise tose tiri kupereŵera pa urunji ndipo tikwananga zuŵa lirilose. Ndipouli, nga ndi mteŵeti wakujipereka, wakubabatizika wa Yehova, imwe muŵenge mwanjira mu wene na wene wapadera na iye. Cifukwa ca kurapa kwinu na kujipereka kwinu mu ubabatizo, Yehova ngwakukhumbisiska kumugowokerani zakwananga zinu pa lufura lwa sembe yakuwombora ya Yesu. Mwanteura ubabatizo ukurongozgera muntu kuŵa na njuŵi yiweme kwa Ciuta.—1 Petros 3:21.
12. Cikung’anamuraci kubabatizika (a) “mu zina la Ŵawiske”? (b) ‘mu zina la Mwana’? (c) ‘mu zina la mzimu mutuŵa’?
12 Yesu wakaŵalangura ŵakumurondezga ŵake kubabatiza ŵasambiri ŵapya “mu zina la Ŵawiske na la Mwana na la mzimu mutuŵa.” (Mateyu 28:19) Kasi Yesu wakang’anamurangaci? Kubabatizika “mu zina la Ŵawiske” kukurongora kuti muntu uyu wakubabatizika wakuzomera Yehova Ciuta na mtima wake wose kuŵa Mlengi ndiposo Muwusi wa cilengiwa cose. (Salmo 36:9; 83:18; Mupharazgi 12:1) Kubabatizika ‘mu zina la Mwana’ cikung’anamura kuti muntu uyu wakuzomerezga Yesu Kristu—comene-comene sembe Yake yakuwombolera—nga ndiyo ntowa yekha yakusangiramo ciponosko yakuperekeka na Ciuta. (Milimo 4:12) Kubabatizika ‘mu zina la Mzimu Mutuŵa’ cikurongora kuti muntu uyu wakubabatizika wakuwumanya mzimu mutuŵa wa Yehova, panji nkongono yake yakugwira ncito, nga nciteŵetero ca Ciuta kwizira mu ico wakufiskira makhumbiro ghake na cakuperekera nkongono ku ŵateŵeti Ŵake zakucitira khumbo Lake la urunji mwakukorererana na gulu Lake lakurongozgeka na mzimu.—Genesis 1:2; Salmo 104:30; Yohane 14:26; 2 Petros 1:21.
KASI MULI ŴAKUNOZGEKERA KUBABATIZIKA?
13, 14. Kasi cifukwa ncici tikwenera kopa cara kusanka kuteŵetera Yehova Ciuta?
13 Pakuti ubabatizo uli na cing’anamuro cikuru comene ndipo ncakusanka cakuzirwa comene mu umoyo wa muntu, kasi ni ntowa iyo mukwenera kuyiwopa? Cara nadi! Uku lwande tikuwona cakusanka cakubabatizika kuŵa cambura kucitolera masoŵero, ico ndico ncintu camahara comene ico mungapanga.
14 Ubabatizo ncisimikizgiro cakusanka kwinu kwa kumteŵetera Yehova Ciuta. Aghanaghanani za ŵantu aŵo mukuŵamanya. Mwa ntowa yimoza panji yinyake, kasi waliyose wa iŵo wakuteŵetera mwene-ncito munyake cara? Ŵanji mbazga ŵa usambazi. (Mateyu 6:24) Ŵanji ŵakuŵika mtima wawo wose pa ncito zawo panji ŵakuŵa ŵazga ŵa iŵoŵene mwakufiska vyakukhumba vyawo nakuvipanga kuŵa vyakukhumbikwa kwakuruska mu umoyo wawo. Ndipouli ŵanji ŵakusopa ŵaciuta ŵautesi. Kweni imwe mwasanka kuteŵetera Ciuta waunenesko, Yehova. Palijeso munyake uyo wangarongora cisungusungu, lusungu na kutemwa. Ciuta wakuŵacindika ŵantu mwakuŵapa ncito yiweme iyo yikuŵarongozgera ku ciponosko. Iye wizamkuŵapa njombe ŵateŵeti ŵake ya umoyo wamuyirayira. Mwaunenesko, kurondezga ciyerezgero ca Yesu nakupereka umoyo winu kwa Yehova kungaŵanga ntowa yakucitiska wofi cara. Comene-comene, ndiyo yekha njamahara na yakukondweska Ciuta.—1 Mathemba 18:21.
15. Kasi nvyakujandizga vya mtundu uli ivyo nvyakuzara pakunena za ubabatizo?
15 Kweni, ubabatizo kuti ni ntowa yakuyitora cifukwa ca kucicizgika cara. Ndi nkani yamwaŵene pakati pa imwe na Yehova. (Ŵagalatiya 6:4) Pakuti mwaluta pantazi kumzimu, imwe mungaŵa mwazizwapo kuti: “Ncici cikundikanizga kubabatizika?” (Milimo 8:35, 36) Mungajifumba mwaŵene kuti, ‘kasi nkuwukirika na ŵa mu mbumba ndiko kukunitondeska? Kasi ndicali wakunjizgika mu mukhaliro wambura malemba panji nkucita maluso ghakwananga? Panji cingaŵa cifukwa cakuti nkopa kuti ŵabali ŵane mucigaŵa ŵanikhumbengeso cara?’ Ivi ndi vinyake vyakukhumbikwa kuvighanaghanirapo, kweni muvipime mwamahara.
16. Kasi imwe mupindulenge uli mwa kuteŵetera Yehova?
16 Nkwamahara cara kughanaghanira waka za ivyo kumteŵetera Yehova kungamutayiskani kwambura kughanaghanaso za vyandulo vyake. Mwaciyerezgero, aghanaghanani za cakucitika ca kuwukirika na ŵa mu mbumba. Yesu wakalayizga kuti nanga kwali ŵasambiri ŵake ŵangataya ŵabali ŵawo cifukwa cakumurondezga iye, iŵo ŵizamkusanga mbumba yikuru kwakuruska yakumzimu. (Marko 10:29, 30) Ŵakupulikana ŵanyinu aŵa ŵamurongoraninge citemwa ca pa ŵabali, kumovwirani imwe kuzizipizga ntombozgo, nakumovwirani kuya ku ntowa ya ku umoyo. (1 Petros 5:9) Comene-comene ŵakulu ŵa mpingo ŵangamovwirani kumazga vyakumara mahara nakuthereska mikhaliro yinyake yakusuzga makoraghene. (Yakobe 5:14-16) Kuyowoya za kutinkika na ŵantu mu caru ici, mungajifumba imwe mwaŵene kuti, ‘Kasi ncivici ico cingaruska kuŵa na cizomerezgo ca Mlengi wa cilengiwa cose, kumukondwereska iye na ntowa yaumoyo iyi nasanka?’—Zintharika 27:11.
KUKHALA NA UMOYO KWAKUYANA NA KUJIPEREKA KWINU NA UBABATIZO
17. Kasi cifukwa ncici mukwenera kuwona ubabatizo kuŵa kwamba waka kuti umaliro cara?
17 Ncakuzirwa kukumbukira kuti ubabatizo kuti ndiwo umaliro wa kuya kwinu pantazi kumzimu cara. Uwo ukurongora waka kwamba kwa uteŵeti wa umoyo winu wose kwa Ciuta nga ndi minisitala wakwimikika kweniso yumoza wa Ŵakaboni ŵa Yehova. Nangauli ubabatizo ngwakuzirwa comene, kuti ndiwo cisimikizgo ca ciponosko cara. Yesu kuti wakayowoya kuti: ‘Yose uyo wababatizika wizamkupona’ cara. M’malo mwake, wakati: “Kweni mweneuyo wakuzizipizga mpaka ku umariro, ndiyo wamkuponoskeka.” (Mateyu 24:13) Ipo, ncakuzirwa kuti imwe mupenje nanga Ufumu wa Ciuta mwakuwupanga kuŵa cakufipira mtima cinu cakudanga mu umoyo winu.—Mateyu 6:25-34.
18. Pamanyuma pakuti mwababatizika, kasi nvyakulatapo uli ivyo mukwenera kuvipanga?
18 Kuti muzizipizge mu uteŵeti winu kwa Yehova, mukhumbikwirenge kupanga vyakulatapo vya kumzimu vya imwe mwaŵene. Cimoza mwa vyakulatapo vyakuzirwa ivi ndico kurutiska pantazi cimanyisko cinu cakuyowoya za Ciuta kwizira mu sambiro la imwe mwaŵene la Mazgu ghake. Pangani manozgero ghakuŵerenga Baibolo zuŵa na zuŵa. (Salmo 1:1, 2) Sangikani pa maungano gha Cikristu nyengo zose, pakuti ubwezi uwo mwamupanga uko umovwiraninge kuŵa nankongono kumzimu. Kucigaŵa cinu, mwalekeraci kucipanga kuŵa cakulata cinu kuzgorapo pa maungano gha mpingo mwanteura mukurumba Yehova na kukhumba kuŵakhozga ŵanyake? (Ŵaroma 1:11, 12) Cakulatapo cinyake cingaŵa kunyolorera malurombo ghinu.—Luka 11:2-4.
19. Kasi ndi mikhaliro uli yeneiyo mzimu mutuŵa ungamovwirani kuyilongora?
19 Usange nkwakuti mukhale kwakuyana na cing’anamuro ca ubabatizo winu, mukwenera kuŵa ŵakulaŵisiska ivyo mukucita, uku mukuzomerezga mzimu mutuŵa wa Ciuta kubaba mwa imwe vipambi vya kutemwa, cimwemwe, mtende, kuzizipizga, wezi, uweme, magomezgeko, kuzika, na kujikora. (Ŵagalatiya 5:22, 23; 2 Petros 3:11) Kumbukirani, Yehova wakupa mzimu wake mutuŵa kwa ŵose aŵo ŵakuwupemperera nakumupulikira iye nga mbateŵeti ŵake ŵakugomezgeka. (Luka 11:13; Milimo 5:32) Nteura pemperani kwa Ciuta cifukwa ca mzimu wake ndipo mufumbeni za covwiro mukurongora mikhaliro iyo yikumukondweska iye. Mikhaliro yanteura yiwonekerenge comene mu kayowoyero kinu na nkaro yinu para mukurondezga urongozgi wa mzimu wa Ciuta. Mwanadi, waliyose mu mpingo wa Cikristu wakuyezgayezga kukuzga “muntu mupya” mwakuti warondezge ciyerezgero ca Yesu. (Ŵakolose 3:9-14) Waliyose wa ise wakukumana na vyakusuzga vyakupambanapambana pakucita ici cifukwa cakuti tiriso na vipimo vyakupambanapambana vya kuya pantazi kumzimu. Pakuti muri ŵambura kufikapo, mukwenera kurwerapo nkanira kuti muŵe na wuntu wakuyana na wa Kristu. Kweni mungatayanga mtima cara, pakuti ncamacitiko na covwiro ca Ciuta.
20. Kasi ndi mwantowa uli mweneumo mungalondezgera ciyerezgero ca Yesu mu uteŵeti?
20 Pakati pa vyakulatapo vinu vyakumzimu pakwenera kuŵa cira cakurondezga ciyerezgero ca Yesu cakuŵa wakukondwa. (Ŵahebere 12:1-3) Iye wakawutemwa uteŵeti wake. Usange muli na mwaŵi wakupharazga makani ghaweme gha Ufumu, mungacipanganga kuŵa waka cizgoŵi yayi. Penjani kuŵa wakukhorwa mwa kusambizga ŵanji pakunena za Ufumu wa Ciuta nga ndi umo wakacitira Yesu. Gwiriskirani ncito urongozgi uwo mpingo ukupereka kumovwirani imwe kucita makora nga ndi msambizgi. Ndipo mungakayikiranga cara kuti Yehova wangamupani imwe nkongono zakuti mufiskire uteŵeti winu.—1 Ŵakorinte 9:19-23.
21. (a) Kasi tikumanya uli kuti Yehova wakuŵawona ŵantu ŵakugomezgeka ŵakubabatizika nga mbusambazi? (b) Kasi ncici cikurongora kuti ubabatizo ngwakuzirwa mwakuti tizakapona pa nyengo ya ceruzgo ca Ciuta pa kaŵiro ka vintu kaheni aka?
21 Muntu wakujipereka, wakubabatizika uyo wakuyezgayezga kurondezga Yesu mwakugomezgeka wakuŵa wapadera comene kwa Ciuta. Yehova wakusanda mitima ya vikwi mamiliyoni gha ŵantu ndipo wakumanya umo ŵantu ŵa nga ndi aŵa ŵalili ŵambura kuwoneka-woneka. Iye wakuŵatora nga ndi usambazi, “vintu vyakuzirwa.” (Hagai 2:7, NW) Maucimi gha Baibolo ghakurongora kuti Ciuta wakuŵawona ŵantu ŵa nga ndi aŵa kuŵa ŵaŵikika cimanyikwiro ca kwizakapona ceruzgo cake ico citizenge sonosono apa pa kaŵiro ka vintu kaheni aka. (Ezekiel 9:1-6; Malaki 3:16, 18) Kasi imwe ‘mwimikikira umoyo wamuyirayira’? (Milimo 13:48) Kasi muli ŵakukhumbisiska kuŵikika cimanyikwiro nga njumoza wakuteŵetera Ciuta? Kujipereka na kubabatizika nvigaŵa vya cimanyikwiro ico, ndipo nvyakukhumbikwira usange nkwakuti mwizakaponoskeka.
22. Kasi ncirindizga uli ico “mzinda ukuru” ungaŵa naco?
22 Pamanyuma pa Ciwowota ca caru cose, Nowa na mbumba yake ŵakafuma mu cingaraŵa nakunjira mu caru capasi cakutozgeka. Mwakuyanawaka lero, “ŵa mzinda ukuru” aŵo ŵakugwiriskira ncito cimanyisko ca Ciuta mu maumoyo ghawo nakusanga cizomerezgo ca Yehova ŵali na cirindizga ca kwizakapona umaliro wa kaŵiro ka vintu kaheni aka nakwizakakondwa na umoyo wamuyirayira pa caru capasi cakutoweskeka kwa nyengo yose. (Civumbuzi 7:9, 14) Kasi umoyo uwo wizamkuŵa nga ndi vici?
YEZGANI CIMANYISKO CINU
Kasi ndi mwauli mweneumo Yehova wakukhumbira kuti mugwiriskire ncito cimanyisko cinu cakuyowoya za iye?
Kasi zinyake mwa ntowa zakurongozgera ku ubabatizo ndi nzi?
Kasi cifukwa ncici ubabatizo mbumaliro cara kweni wambiro?
Kasi ndi mwauli mweneumo tingakhalira na umoyo kwakuyana na kujipereka kwithu na kubabatizika?
[Mafumbo]
[Cithuzithuzi pa peji 172]
Kasi mwajipereka kwa Ciuta mu lurombo?
[Vithuzithuzi pa peji 174]
Kasi cikumukanizgani imwe ncici kuti mubabatizike?
