Kasi ndi Mazaza gha Njani Agho Imwe Mukwenera Kuzomerezga?
Cipaturo 14
Kasi ndi Mazaza gha Njani Agho Imwe Mukwenera Kuzomerezga?
1, 2. Kasi mitundu yose yamazaza njakupweteka? Longosorani.
“MAZAZA” ni lizgu liheni comene kulipulika kwa ŵantu ŵanandi. Ici ncakupulikikwa, pakuti mazaza kanandi ghacitika mwambura kughanaghanirana—pa ncito, mu mbumba, ndiposo na maboma. Mwaunenesko Baibolo likuyowoya kuti: “Muntu yumoza wakuwusa pacanya pa munyake kujipweteka iye mwene.” (Mupharazgi 8:9) Enya, ŵanandi ŵawusa ŵanyawo mwakuŵacitira nkaza na kujighanaghanira iŵo ŵeneco.
2 Kweni kuti mazaza ghose ghakupweteka cara. Mwaciyerezgero, cingayowoyeka kuti thupi lithu liri na mazaza pa ise. “Likutilangura” ise kuthuta, kurya, kumwa, nakugona. Kasi ici ncakufyenyerezga? Cara. Kuzomerezgana na vyakukhumbikwa ivi nkwaphindu kwa ise. Ukurwande kujilambika ku vyakukhumba vya thupi lithu kungaŵa kwambura kukhumba ise, pali mitundu yinyake yamazaza iyo yikukhumba kujilambika kwithu kwakucita kukhumba. Aghanaghanani za viyerezgero vinyake.
WAMAZAZA MURARA PA ŴOSE
3. Kasi cifukwa ncici ncakwenerera kuti Yehova wacemeke “Fumunkuru”?
3 Nyengo mandredi ghanandi mu Baibolo, Yehova wakucemeka “Fumunkuru.” Fumu ndi muntu uyo wali na mazaza ghakujumpa ŵose. Kasi ici cikupangiska Yehova kwenerera ku malo ghanteura ncici? Civumbuzi 4:11 likuzgora kuti: “Ŵakwenerera ndimwe, Fumu yithu na Ciuta withu, kupokera ncindi na thumbiko na nkongono: Pakuti imwe mukalenga vyose, Ndipo cifukwa ca khumbo linu vikaŵako, ndipo vikalengeka.”
4. Kasi ndi mwauli umo Yehova wakusankira kucita mazaza ghake?
4 Nga ni Mlengi withu, Yehova wali nawenelero wakucita mazaza na umo wasankira. Ici cingawoneka cakupa wofi, comenecomene usange tikughanaghanira zakuti Ciuta wali na “nkongono zinandi zakuziziswa.” Iye wakucemeka “Ciuta Wankongono-zose”—lizgu ilo pa Cihebere likupereka ng’anamuro lakuti nkongono zakujumpa muyeso. (Yesaya 40:26, NW; Genesis 17:1) Kweni, Yehova wakurongora nkongono zake mwa ntowa yakutemwa comene, pakuti mukhaliro wake ukuru ndiwo kutemwa.—1 Yohane 4:16.
5. Kasi cifukwa ncici kujilambika ku mazaza gha Yehova nkwakusuzga cara?
5 Nangauli Yehova wakacenjezga kuti wiziskenge cirango pa ŵakwananga ŵambura kulapa, Moses wakamumanya makora iye nga ndi “Ciuta [wa unenesko, NW], Ciuta wa magomezgeka, uyo wakusunga pangano na lusungu na ŵeneaŵo ŵakumutemwa na kusunga marango ghake.” (Duteronome 7:9) Aghanaghanani! Wamazaza Mulala wa vilengiwa vyose kuti wakuticicizga kumuteŵetera iye cara. Kweni, ise tikuguzikira kufupi na iye cifukwa ca citemwa cake. (Ŵaroma 2:4; 5:8) Kujilambika ku mazaza gha Yehova nkwakukondweska, pakuti marango ghake nyengo zose nga phindu likuru kwa ise.—Salmo 19:7, 8.
6. Kasi makani ghamazaza ghakawuka uli mu munda wa Edeni, ndipo na cakufumapo uli?
6 Ŵapapi ŵithu ŵakudanga ŵakakana muwuso wa Ciuta. Ŵakakhumbanga kujisankira iŵoŵene ico cikaŵa ciweme na ico cikaŵa ciheni. (Genesis 3:4-6) Nga ncakufumapo cake, iŵo ŵakazikizgika mu cikaya cawo ca Paradiso. Pamanyuma pake Yehova wakazomerezga ŵantu kuti ŵapange miwuso iyo yingaŵapangiska kukhala mwa dongosolo, nangauli mu wumba wa ŵantu ŵambura kufikapo. Kasi yinyake mwa miwuso iyi ni njini, ndipo kasi Ciuta wali na cirindizga cakuti kujilambika kwithu kwa iyo kukwenera kufika mpa?
“ŴAMAZAZA ŴARARA”
7. Kasi mbanjani aŵo ndi “ŵamazaza ŵarara,” ndipo kasi malo ghawo ghakukhwaskana uli na mazaza gha Ciuta?
7 Mpostole Paulos wakalemba kuti: “Ŵantu ŵose ŵaŵalambire ŵa mazaza ŵarara; cifukwa palive wa mazaza kweni mweneuyo ngwa Ciuta.” Kasi mbanjani “ŵamazaza ŵarara”? Mazgu gha Paulos mu mavesi ghakurondezgapo ghakurongora kuti iŵo mbamazaza ŵa boma ŵawuntu. (Ŵaroma 13:1-7; Tito 3:1) Yehova kuti ndiye wakayambiska ŵamazaza ŵa maboma gha wuntu cara, kweni ghakuŵako mwa cizomerezgo cake. Nteura Paulos wakenera kulemba: “Ŵa mazaza aŵo ŵaliko ŵali kwimikika na Ciuta.” Kasi ici cikurongoraci pakunena za mazaza gha pano pasi ghanteura? Kuti igho ngacoko, panji ngakuceperako, ku mazaza gha Ciuta. (Yohane 19:10, 11) Mwanteura, usange pali kwimikana pakati pa dango la muntu na dango la Ciuta, Ŵakristu ŵakwenera kurongozgeka na njuŵi zaŵo zakusambizgika kufuma mu Baibolo. Iwo ŵakwenera “kupulikira Ciuta kwakuruska ŵantu.”—Milimo 5:29.
8. Kasi imwe mukupindura uli na ŵamazaza ŵarara, ndipo kasi mungarongora uli kujilambika kwinu kwa iŵo?
8 Ndipouli, nyengo zinandi, ŵarara-ŵarara ŵa boma aŵo ŵali na mazaza ŵakuteŵetera nga ‘mbateŵeti ŵa Ciuta kwa ise ku uweme withu.’ (Ŵaroma 13:4) Mwa ntowa uli? Eya, aghanaghanani za mauteŵeti ghanandi comene agho ŵarara-ŵarara ŵa mazaza aŵa ŵakuticitira, nga ndi kuposita ŵakalata, ŵapolisi na civikiriro ku moto, kupwelerera malo, na masambiro. “Pakuti cifukwa ceneici mukusonkera sonko wuwo,” wakalemba nteura Paulos, “cifukwa mbateŵeti ŵa Ciuta, ŵakupa kuteŵeta mu ceneici ndico.” (Ŵaroma 13:6) Pakuyowoya za msonko na cinyake cose cakuzomerezgeka mwa dango, ise tikwenera ‘kucita mwakugomezgeka.’—Ŵahebere 13:18.
9, 10. (a) Kasi ndi mwauli mweneumo ŵamazaza ŵarara mbakuzomerezgekera mu manozgero gha Ciuta? (b) Kasi cifukwa ncici cate ciŵe cambura mahara kwimikana nawo ŵamazaza ŵarara?
9 Nyengo zinyake, ŵamazaza ŵarara ŵakugwiriskira ncito mazaza ghaŵo mwaubudi. Kasi ivi vingapangiska kuti tireke kuŵapulikira? Cara, ni nteura yayi. Yehova wakuraŵiska macitiro ghaheni agha gha ŵamazaza. (Zintharika 15:3) Kuzomerezga kwake muntu kuwusa kuti kukung’anamura kuti wakuzomerezga macitiro ghaŵo ghaheni cara; nesi kutizomerezga ise kucita nteura. Mwanadi, Ciuta sonosono apa “wamkuteketa mauthemba ghose agha nakughamara,” na kuharizgirapo muwuso wa boma lake la urunji. (Daniel 2:44) Kweni pambere ici cindacitike, ŵamazaza ŵarara ŵarutirirenge kutiteŵetera milimo yakukhumbikwa.
10 Paulos wakarongosora kuti: “Nteura uyo wakupindikana na ŵa mazaza, wakwimikana na cakwimikika ca Ciuta.” (Ŵaroma 13:2) Ŵamazaza ŵarara ndi ‘manozgero’ gha Ciuta pa cifukwa cakuti ŵakovwira kusungiska mtende, mwakuti kwambura iŵo kwate kuŵe vivulupi na vitimbaheti. Kwimikana naŵo kwate kuŵe kwambura malemba kweniso kusoŵa mahara. Kucitira ciyerezgero: Aghanaghanani kuti ŵamucitani opareshoni sono wuzu uwu ŵasonera ndiwo wavikirira cironda. Nangauli wuzu uwu ngwacilendo mu thupi, iwo ukugwira ncito kwa kanyengo kacoko waka. Kuwuskapo pambere nyengo yake yindakwane kungaŵa kwakupweteka. Mwakuyana waka, ŵamazaza ŵa maboma gha ŵantu kuti ŵakaŵa cigaŵa ca khumbo lakudanga la Ciuta cara. Kufika pa nyengo iyo Ufumu wake uwu wamkuyambira nkanira kuwusa caru, ndipouli, maboma gha ŵantu gharutirirenge kuwunganya ŵantu pamoza, uku ŵakuteŵetera milimo yakwenerera iyo Ciuta wate wacite panyengo yasono. Mwanteura tikwenera kurutirira kuŵa ŵakujilambika ku ŵamazaza ŵarara, uku tikupereka malo ghakwamba ku dango na mazaza gha Ciuta.
MAZAZA MU MBUMBA
11. Kasi imwe mwate murongosore uli pulinsipolo la umutu?
11 Mbumba ndiyo lufura lwa cikaya ca ŵantu. Mwenemumo mufumu na muwoli ŵangasangamo wene na wene wakupa njombe, ndipo ŵana ŵangavikiririka nakusambizgika kuŵa ŵarara. (Zintharika 5:15-21; Ŵaefeso 6:1-4) Manozgero ghakucindikika ghanteura ghakukhumbikwira ndondomeko yiweme mwakuti ghawovwire ŵa mu mbumba kukhala mwamtende ndipo mwakukorereranako. Ntowa ya Yehova yakufiskira ici ndiyo kwizira mu manozgero gha umutu, mwakudumura yarongosoreka mu mazgu agha, ghakusangika pa 1 Ŵakorinte 11:3: “Mutu wa muntu yose ndi Kristu; ndipo mutu wa mwanakazi ndi mfumu wake; ndipo mutu wa Kristu ndi Ciuta.”
12, 13. Kasi mutu wa mbumba ni njani, ndipo kasi tingatorako sambiro uli ku ciyerezgero ca umutu cakurongoleka na Yesu?
12 Mufumu ndiyo mutu wa mbumba. Ndipouli, nayeso wali na mutu—Yesu Kristu. Paulos wakalemba kuti: “Mwa ŵafumu, temwani ŵawoli ŵinu umo Kristu nayo wakatemwera Ekleziya, ndipo wakajiperekera ilo.” (Ŵaefeso 5:25) Mufumu wangarongora kuti wakujilambika kwa Kristu usange wakucita nayo muwoli wake nga ndi umo Yesu nyengo zose wacitira na mpingo. (1 Yohane 2:6) Mazaza ghakuru comene ghapika kwa Yesu, kweni iye wakughagwiriskira ncito mwakuzika, kutemwa, ndipo mwamahara. (Mateyu 20:25-28) Nga ndi muntu, Yesu wandagwiriskirepo ncito mazaza ghake mwankaza. Iye wakaŵa “wakuzika na wakujipepura mu mtima,” ndipo wakaŵacema ŵakumurondezga ŵake kuti “ŵabali” kwakuruska kuti “ŵazga.” “Ine nditi ndimupumuzganinge,” wakaŵalayizga nteura iŵo, ndipo ico ndico wakacita.—Mateyu 11:28, 29; Yohane 15:15.
13 Ciyerezgero ca Yesu cikusambizga ŵafumu kuti umutu wa Cikristu kuti ndiwo malo ghakuwusirapo mwankanyulira cara. M’malomwake, ngamoza ghakukhumba ncindi nakujipereka kwa iwemwene kwa kutemwa. Mwapakweru ici cenera cifumiskepo kucitirana nkaza na wakutorana nayo mwakuthupi panji mwamazgu. (Ŵaefeso 4:29, 31, 32; 5:28, 29; Ŵakolose 3:19) Mwanteura usange mwanarume wa Cikristu wate wacitire nkaza muwoli wake, ncito zake zinyake ziweme zate ziŵe zambura canduro, ndipo malurombo ghake ghate ghapuvyiwenge.—1 Ŵakorinte 13:1-3; 1 Petros 3:7.
14, 15. Kasi ndi mwauli mweneumo cimanyisko ca Ciuta cikovwirira muwoli kuŵa ŵakujilambika kwa mfumu wake?
14 Usange mufumu wakurondezga ciyerezgero ca Kristu, ncipusu kwa muwoli wake kucita mwakukorereranako na mazgu ghakusangika pa Ŵaefeso 5:22, 23: “Mwa ŵawoli, jilambikani ku ŵafumu ŵinu na ŵinu, nga nku Fumu. Pakuti mufumu ndi mutu wa muwoli wake, umo Kristu nayo wariri mutu wa Ekleziya.” Nga ndi umo mufumu wakwenera kujilambika kwa Kristu, muwoli wakwenera kujilambika ku mfumu wake. Baibolo naloso likurongosora mwakupulikikwa kuti ŵawoli ŵaweme ŵakwenerera ncindi na marumbo cifukwa ca vinjeru vyawo vya uciuta na kutokatoka kwawo.—Zintharika 31:10-31.
15 Kujilambika kwa muwoli wa Cikristu kwa mfumu wake kuli na mpaka. Ici cikung’anamura kuti usange kujilambika pa vintu vinyake kucitiskenge kuswa dango la uciuta iye wakwenera kupulikira Ciuta kwakuruska muntu. Nanga mpanyengo iyo, kimiro kakukhora ka mwanakazi kakwenera kuŵa ka “mzimu wakujiyuyura na wakuzika.” Iko kakwenera kupanikizgira kuti cimanyisko ca Ciuta camupangiska kuŵa mwanakazi muwemeko. (1 Petros 3:1-4) Ici cingaŵa cakuyana waka ku mwanarume wa Cikristu uyo muwoli wake ngwambura kupulikana. Kungangamira kwake ku mapulinsipolo gha Baibolo kukwenera kumupangiska iye kuŵa mufumu muwemeko.
16. Kasi ndi mwauli mweneumo ŵana ŵangalondezgera ciyerezgero ca Yesu apo wakaŵa mucoko?
16 Ŵaefeso 6:1 likurongosora cigaŵa ca ŵana, likuti: “Mwa ŵana, pulikirani mu Fumu ŵapapi ŵinu: cifukwa uku nkwakurunjika.” Ŵana ŵa Cikristu ŵakurondezga ciyelezgero ca Yesu, uyo wakakhalirira mu kujilambika kwa ŵapapi ŵake mu kukura kwake. Nga ndi mwana wakupulikira, iye “wakakura mu vinjeru na mu msinku, na mu ucizi kwa Ciuta na ŵantu.”—Luka 2:51, 52.
17. Kasi ntowa iyo ŵapapi ŵakucitira na mazaza ghawo yingaŵa na vyakufumapo uli ku ŵana ŵawo?
17 Ntowa iyo ŵapapi ŵakucitira na mpingo zaŵo yingaŵa na vyakufumapo vyake kuti kwali ŵana ŵawo ŵacindikenge mazaza ghawo panji ŵaghagarukirenge. (Zintharika 22:6) Nteura ŵapapi ŵakwenera kujifumba iŵoŵene kuti, ‘Kasi Ine mazaza ghane nkughagwiriskira ncito makora mwakutemwa panji mwa nkanyulira? Kasi ndine wakufikirika?’ Mupapi wa uciuta wakwenera kuŵa wakutemwa ndipo wakughanaghanira, kweni wakukhora mu kujingangamikira ku mapulinsipolo gha uciuta. Mwakwenelera, Paulos wakalemba kuti: “Ndipo imwe, mwa ŵawiskewo, mungatopolanga moyo [ndiko kuti ‘kuŵakwiyiska’] ŵana ŵinu: kweni muŵalere mu kulanga na mu kucenjezga kwa Fumu [Yehova, NW].”—Ŵaefeso 6:4; Ŵakolose 3:21.
18. Kasi cirango ca upapi cingaperekeka uli?
18 Ŵapapi ŵakwenera kusanda makora ntowa zaŵo zakasambizgiro, comene usange ŵakukhumba kuti ŵana ŵawo ŵaŵe ŵakupulikira nakuŵiziskira kukondwa. (Zintharika 23:24, 25) Mu Baibolo, cirango kanandi cikuŵa ca urongozgi. (Zintharika 4:1; 8:33) Ico cikwendezgana na citemwa na kuzika, kuti na ukari na nkaza cara. Mwanteura, ŵapapi ŵa Cikristu ŵakwenera kucita mwamahara nakujikora iŵoŵene pakuranga ŵana ŵaŵo.—Zintharika 1:7.
MAZAZA MU MPINGO
19. Kasi ndi mwauli mweneumo Ciuta waperekera ndondomeko yiweme mu mpingo wa Cikristu?
19 Pakuti Yehova kuti ndi Ciuta wa utimbanizgi cara, ncakwenerera kuti wangapereka mazaza na urongozgi wakwenerera ku ŵantu ŵake. Mwakuyana waka, iye wasora Yesu nga ndi Mutu wa mpingo wa Cikristu. (1 Ŵakorinte 14:33, 40; Ŵaefeso 1:20-23) Pasi pa urongozgi wambura kuwoneka wa Yesu, Ciuta wapereka ndondomeko kwizira mwa yeneiyo ŵakulu ŵakusoreka mu mpingo wuliwose ŵakuliska mskambo mwaphampu, mwakujipereka, ndiposo mwakutemwa. (1 Petros 5:2, 3) Ŵateŵeti ŵakuteŵetera ŵakovwira mu ntowa zakupambanapambana nakupereka uteŵeti waŵo wakukhumbikwa mu mpingo.—Ŵafilipi 1:1.
20. Kasi cifukwa ncici tikwenera kuŵa ŵakujilambika ku ŵakulu ŵakusoreka ŵa Cikristu, ndipo kasi ici ncaphindu uli?
20 Pakunena za ŵakulu ŵa Cikristu, Paulos wakalemba kuti: “Ŵapulikirani aŵo mbacirongozi ŵinu, ndipo ŵalambirani: cifukwa ŵakulinda mizimu yinu, nga ndi aŵo ŵamkupataula; mwakuti ŵacite ici nacimwemwe, ndipo nacitima cara: cifukwa ici ncambura kwandula kwa imwe.” (Ŵahebere 13:17) Mwamahara, Ciuta waŵika m’mawoko gha ŵalaŵiliri mphingo yakupwelerera vyakukhumbikwa vyakumzimu kwa awo ŵali mu mpingo. Ŵakulu aŵa kuti ŵakupanga ka wupu ka ŵadangiriri ŵa cisopo cara. Iŵo mbateŵeti na ŵazga ŵa Ciuta, ŵakuteŵetera pa vyakukhumbikwa vya ŵalambiri ŵanyawo, nga ndi umo Fumu yithu, Yesu Kristu, wakacitira. (Yohane 10:14, 15) Kumanya kuti ŵanarume ŵakwenereskeka kumzimu Mwamalemba ŵakupwelerera kuya kwithu pantazi na kukura kwithu kumzimu kukutikhuŵirizga ise kuŵa ŵakukoreranako naŵo na kujilambika.—1 Ŵakorinte 16:16.
21. Kasi ndi mwauli mweneumo ŵakulu ŵakusoreka ŵakuyezgera kovwira Ŵakristu ŵanyawo mwamzimu?
21 Nyengo zinyake, mberere yingazgeŵa panji kuŵa pa ngozi na vinyama vyakofya vyakuthondo. Pasi pa urongozgi wa Mliska Mrara, ŵakulu nga mbaliska ŵacoko ŵali maso kovwira pa vyakukhumbikwa vya awo ŵakulaŵilira nakuŵapa covwiro mwaphampu. (1 Petros 5:4) Iwo ŵakwendera viŵalo vya mpingo nakuviciska. Pakumanya kuti Satana wakukhumba kutimbanizga mtende wa ŵantu ŵa Ciuta, ŵakulu ŵakugwiriskira ncito vinjeru vyakufuma kucanya pakovwira kumazga masuzgo ghalighose. (Yakobe 3:17, 18) Iwo ŵakutokatoka mwaphampu kusungilira kukoreranako na umoza wa cipulikano, cintu cinyake ico Yesu iyemwene wakapemperera.—Yohane 17:20-22; 1 Ŵakorinte 1:10.
22. Kasi ncovwiro uli ico ŵakulu ŵakupereka mu vyakucitika nga ndi ubudi?
22 Kasi uli usange Mkristu wakusuzgika cifukwa ca uheni panji wagongoweskeka cifukwa cakucita kwananga? Urongozgi wakupembuzga wa Baibolo na malurombo ghaŵakulu ghakufuma pasi pamtima ghakumurombera iye ghangamovwira kusangaso umoyo uweme wakumzimu. (Yakobe 5:13-15) Ŵanalume aŵa, ŵakusoreka na mzimu mutuŵa, ŵaliso na mazaza ghakuranga na kucenya waliyose uyo wali na kaluso kakwananga panji wakuŵika pangozi mikhaliro yakumzimu na yakuthupi ya utuŵa wa mpingo. (Milimo 20:28; Tito 1:9; 2:15) Mwakuti ŵasunge mpingo kuŵa wutuŵa, cingaŵa cakwenerera kwa waliyose payekha kuphara cakwananga cikuru ciricose. (Leviticus 5:1) Usange Mkristu wacita kwananga kukuru ndipo wazomerezga kulanga na urongozgi wa Malemba ndipo wakurongora kulapa kweneco, iye wovwirikenge. Mwanadi, aŵo ŵakuswa dango la Ciuta ruta-ruta na aŵo ŵakurapa cara mukucita kwawo kwananga ŵakuŵasezgamo mu mpingo.—1 Ŵakorinte 5:9-13.
23. Kasi ncici ico ŵalaŵiliri ŵa Cikristu ŵakupereka ku uweme wa mpingo?
23 Baibolo likayowoyerathu kuti pasi pa Yesu Kristu nga ndi Karonga, ŵanarume ŵarara ku mzimu ŵamkusoreka kuti ŵakapembuzge, kuvikirira, nakupumuzga ŵantu ŵa Ciuta. (Yesaya 32:1, 2) Iwo ŵakwenera kudangilira mu ncito yakupharazga, kuliska, nakusambizga mwakuti ŵarutiske pantazi kukula kwa kumzimu. (Ŵaefeso 4:11, 12, 16) Nangauli ŵalaŵiliri ŵa Cikristu nyengo zinyake ŵangacenya, kuranga, nakucenjezga ŵakupulikana ŵanyawo, usange ŵakulu aŵa ŵakugwiriskira ncito cisambizgo ca pa lufura lwa mu Mazgu gha Ciuta wovwirenge wose kukhalirira pa ntowa ya kuumoyo.—Zintharika 3:11, 12; 6:23; Tito 2:1.
ZOMEREZGANI KAWONERO KA YEHOVA KA MAZAZA
24. Kasi ni makani uli agho ise tikuyezgeka nagho zuŵa na zuŵa?
24 Mwanalume na mwanakazi ŵakudanga ŵakayezgeka pa makani gha kujilambika ku mazaza. Ncakuziziswa cara, kuti ise nase zuŵa na zuŵa tikusangana na viyezgo vyakuyana waka. Satana Diabolosi walutiska pantazi mzimu wa cigaruka pa mtundu wa ŵantu. (Ŵaefeso 2:2) Mkhaliro wakucita umo muntu wakukhumbira ukupangika kuŵa wakukopa comene kwakuruska wura wakujilambika.
25. Kasi pali vyandulo uli pakukanizga mzimu wa cigaruka wa caru na pakuŵa wakujilambika ku mazaza gha Ciuta panji agho wakuzomerezga?
25 Ndipouli ise, tikwenera, kukanizga mzimu wacigaruka wa caru. Mwakucita nteura, tisangenge kuti kujilambika kwa uciuta kukwiziska vitumbiko vikuru comene. Mwaciyerezgero, ise titcheŵenge vyenjezgo na vikhuŵazgo vyakuzara kwa aŵo ŵakusosomora masuzgo na ŵamazaza ŵa kucaru. Ticepeskenge kukwesana uko nkwakuzara mu mbumba zinandi. Ndiposo tisekererenge na vyandulo vya kukoreranako kuweme, na kwacitemwa pamoza na ŵakupulikana ŵanyithu Ŵacikristu. Kwakuruska vyose, kujilambika kwithu kwa uciuta kutinjizgenge mu ubwezi uweme na Yehova, Wamazaza Murara.
YEZGANI CIMANYISKO CINU
Kasi ndi mwauli umo Yehova wakucitira mazaza ghake?
Kasi mbanjani aŵo ndi “ŵamazaza ŵarara,” ndipo kasi ndi mwauli umo ise tikujilambikira kwa iŵo?
Kasi pulinsipolo la umutu likuŵika mphingo uli pa muntu waliyose wa mu mbumba?
Kasi ndi mwauli mweneumo ise tingalongolera kujilambika mu mpingo wa Cikristu?
[Mafumbo]
[Bokosi pa peji 134]
ŴAKUJILAMBIKA, KUTI ŴAKUWUKIRA CARA
Kwizira mu ncito yawo yakupharazga pakweru, Ŵakaboni ŵa Yehova ŵakurongora ku Ufumu wa Ciuta nga ndi cilindizga cekha ca mtende weneco na cimango. Kweni ŵapharazgi ŵa mwampu ŵa Ufumu wa Ciuta aŵa mwantowa yiriyose kuti mbakuwukira ku maboma agho iŵo ŵakukhalamo cara. Mwakupambanako, Ŵakaboni ŵali pakati pa ŵantu ŵancindi comene naŵakusunga dango mu caru. “Usange visopo vyose viŵenge nga Mbakaboni ŵa Yehova,” wakayowoya nteura murara yumoza mu caru ca mu Afirika, “mpanyi kulive ŵakukoma ŵanyawo, ŵaskoghi, mpuvya za ŵawukirano, ŵakayidi na mabomba gha atomu. Miryango mpanyi tikukiyako cara zuŵa na zuŵa.”
Pakumanya ici, ŵarara ŵa maboma mu vyaru vinandi ŵazomerezga ncito yakupharazga ya Ŵakaboni kurutirira kwambura kujandizgika. Mu vyaru vinyake, kujalirika panji kukanizgika kwafumizgikapo apo ŵa mazaza ŵawona kuti Ŵakaboni ŵa Yehova ŵakovwira pa kucitiska vintu kuŵa makora. Ciri nga ndi umo mpostole Paulos wakalembera pakunena za kupulikira ku ŵamazaza ŵarara: “Ipo ucitenge ico nciweme, ndipo iye wati wakurumbenge.”—Ŵaroma 13:1, 3.
