Mungamanya Kuŵa na Muntazi mwa Kukondweska!
Cipaturo 1
Mungamanya Kuŵa na Muntazi mwa Kukondweska!
1, 2. Kasi Mlengi winu wakumukhumbilani vici imwe?
KUFUKATIRIKA kwaubwezi na muntu uyo mukumutemwa. Kusekelerana kwakufumira pasi pa mtima pa nyengo ya cakurya ciwemi pamoza na mabwezi ghakutemweka. Cakusekereska cakuwona ŵana ŵinu ŵakuseŵera mwakukondwa. Nyengo za nteura izi nzakukondweska mu umoyo. Ndipouli, ku ŵanandi, umoyo ukuŵa ngati ukwiziska cakumaramahara cikuru comene cakurondezgana-rondezgana. Usange namwe vili nteura, zikani.
2 Ni khumbo la Ciuta kuti muzaye nakukondwa kwa muyirayira pasi pa mikhaliro yiwemi comene mu malo ghawemi. Ici kuti ndi loto waka cara, cifukwa Ciuta mwanadi wakumupani kiyi wakusangira muntazi mwakukondweska mwanteura. Kiyi uyo ncimanyisko.
3. Kasi ncimanyisko uli ico ndi kiyi wakusangira kukondwa, ndipo kasi cifukwa ncici tingasimikizga kuti Ciuta wangapereka cimanyisko ico?
3 Tikuyowoya za cimanyisko ca mtundu wapadera ico ncapacanya comene kuruska vinjeru vya muntu. Ndico “mahara ghakumanyira Ciuta.” (Zintharika 2:5) Pafupifupi vilimika 2,000 ivyo vyajumpa, mlembi wa Baibolo wakati: “Nyumba yose yikuzengeka na muntu; kweni Uyo wakazenga vyose ndi Ciuta.” (Ŵahebere 3:4) Aghanaghanani za cimanyisko ico Mpangi wa vintu vyose wakwenera kuŵa naco! Baibolo likuyowoya kuti Ciuta wakupenda nakupa mazina nyenyezi zose. Nalo ndi ghanaghano lakuziziswa uli ’mwe, pakuti pali mahandredi gha mabiliyoni gha nyenyezi mu cipinga usiku cithu, ndipo ŵamanyi nyenyezi ŵakuyowoya kuti viliko vipinga usiku vinyake pafupifupi handredi biliyoni! (Salmo 147:4) Ciuta wakumanyaso vyose pakunena za ise, nteura ninjani munyakeso wangapereka mazgoro ghawemi ku mafumbo ghakuzirwa gha umoyo?—Mateyu 10:30.
4. Kasi cifukwa ncici tikwenera kulindizga Ciuta kutipa unjirikizgi wa kutirongozga ise, ndipo kasi ndi buku uli ilo likukhorweska khumbo ilo?
4 Aghanaghanani za ŵantu ŵaŵiri ŵakuyezga kunozga magalimoto ghawo. Mwakugongowa, muntu yumoza wakutaya pasi viteŵetero vyake. Munyake mwakufwasa wanozga suzgo, nakujura nakiyi, ndipo wakumwemwetera apo injini yikwamba kulira nakwenda makora ghene. Kuti mwate muŵe na suzgo cara kusacizga paŵaŵiri aŵa kuti ni njuni wali na kabuku kamarango kakufuma kwa mweneco mpangi. Kasi ncakupulikikwa cara kuti Ciuta wangapereka maunjirikizgi ghakutirongozga mu umoyo? Nga ndi umo mukumanyira, Baibolo likujisimikizgira kuŵa ilo—buku la unjirikizgi na urongozgi kufuma kwa Mlengi withu, lakupangika kupa cimanyisko ca Ciuta.—2 Timote 3:16.
5. Kasi ncakuzirwa uli cimanyisko ico cikusangika mu Baibolo?
5 Usange cisimikizgo ca Baibolo ncaunenesko, aghanaghanani za usambazi wa cimanyisko uwo buku ilo lingaŵa nawo! Pa Zintharika 2:1-5, likuticicizga ise kupenja vinjeru, kujima nga ndi umo tatenge ticitire na usambazi wakubisika—kuti mu dongo la maghanoghano gha muntu cara, kweni mu Mazgu ghake gha Ciuta. Usange tingapenjamo, ise tisangenge “mahara ghakumanyira Ciuta.” Pakuti Ciuta wakumanya kupereŵera na vyakukhumba vithu, iye wakutipa unjirikizgi uwo ungatovwira kukhara na maumoyo ghamtende, ghakukondweska. (Salmo 103:14; Yesaya 48:17) Mwakulutirizga, cimanyisko ca Ciuta cikutipa ise makani ghawemi ghakukondweska.
UMOYO WAMUYIRAYIRA!
6. Kasi ncisimikizgo uli ico Yesu Kristu wakapereka pakunena za cimanyisko ca Ciuta?
6 Muntu wakumanyikwa makora mu mdauko Yesu Kristu wakakonkoska cigaŵa ici ca cimanyisko ca Ciuta mu mazgu ghakupurikikwa makora comene. Iye wakati: ‘Ndipo uwu Mbumoyo wamuyirayira, kuti ŵamumanyani Imwe, Ciuta Mweneco Yekha, na Yesu Kristu, mweneuyo mukamutuma.’ (Yohane 17:3) Aghanaghanani—cimanyisko ceneico cikulongozgera ku umoyo wamuyirayira!
7. Kasi ncisimikizgo uli ico ciripo cakuti Ciuta kuti wakakhumba kuti ise tifwenge cara?
7 Mungakananga mwaluŵiro yayi umoyo wamuyirayira kuŵa nga ndi maloto waka. M’malo mwake, awonani umo thupi la muntu liri kupangikira. Liri kupangika makora pa kulaŵa, kupulika, kunuska, kulaŵiska, na kukwaska. Pari vinandi pacaru capasi ivyo vikutikondweska—cakulya cakunoŵa, sumu za tuyuni zakukondweska, maluŵa ghakununkira, malo ghakutowa, ubwezi wakukondweska! Ndipo wongo withu wakuziziswa ukuruska kompyuta yapacanya nkanira, pakuti ukutovwira kumanya na kuzaya na vintu vyose vyanteura. Kasi mukughanaghana kuti Mlengi withu wakukhumba kuti ise tifwe nakuruza vyose ivi? Kasi cate ciŵe camahara yayi kudumura kuti iye wakukhumba kuti ise tikhalenge mwakukondwa na kuzaya na umoyo kwamuyirayira? Ehede, ico ndico cimanyisko ca Ciuta cingang’anamura kwa imwe.
UMOYO MU PARADISO
8. Kasi Baibolo likuyowoyaci pakunena za muntazi mwa mtundu wa ŵantu?
8 Ico Baibolo likuyowoya pakunena za muntazi mwa caru capasi na mtundu wa ŵantu cingaŵikika mu lizgu limoza—Paradiso! Yesu Kristu wakayowoya za uyo apo wakaphaliranga muntu uyo wakaŵa pafupi kufwa kuti: “Wizamkuŵa na ine mu Paradiso.” (Luka 23:43, NW) Kuzunura za Paradiso mwambura nkayiko kukamkumbuska muntu uyo mkhaliro wakukondwa wa ŵapapi ŵithu ŵakudanga, Adamu na Heva. Apo Ciuta wakaŵalenga iŵo, ŵakaŵa ŵakufikapo ndipo ŵakakharanga mu paki yakuŵa nga ndi munda uwo Mlengi wakanozga nakupanda. Uwo mwakwenelera ukacemeka munda wa Edeni, zina lakwimira kukondwa.
9. Kasi cikaŵa cakuyerezgereka na vici kukhara mu Paradiso wakutendekera?
9 Nako nkukondweska ’mwe umo munda uwo ukaŵira! Uwo ukaŵa paradiso wanadi. Mwa makuni ghake ghakutowa mukaŵa agho ghakupambika vipasi vyakunowa. Apo Adamu na Heva ŵakendelanga cikaya cawo, kumwa maji ghake ghakunowa, nakuwunjika vipasi kufuma mumakuni ghake, iŵo ŵakaŵavye cifukwa cakufipira mtima panji kofiwa. Nanga nvinyama vikofyanga cara, pakuti Ciuta wakaŵika mwanarumi na muwoli wake kuwusa mwakutemwa pa ivyo vyose. Mwakusazgapo, ŵantu ŵaŵiri ŵakwamba ŵakaŵa na mathupi gha umoyo uwemi. Usange ŵalutirirenge kupulikira Ciuta, muntazi mwamuyirayira, mwakukondweska mukaŵa mwawo. Iwo ŵakapika ncito yakukhorweska yakupwelerera cikaya cawo cakuziziswa ca Paradiso. Mwakusazgapo, Ciuta wakapa Adamu na Heva mazaza kuti “muzuzge caru, mucithereske.” Iwo na ŵana ŵawo ŵakenera kulutilizgirako mphaka za Paradiso mupaka pulaneti lithu lose kuzgoka malo ghakutowa naghakukondweska.—Genesis 1:28.
10. Apo Yesu wakayowoya za Paradiso, kasi wakang’anamurangaci?
10 Ndipouli, apo Yesu wakazunura Paradiso, kuti wakafumbanga muntu wapafupi kufwa kughanaghana za vyakumanyuma kutari cara. Cara, Yesu wakayowoyanga za vyakuntazi! Wakamanya kuti cikaya cithu cose ca pa caru capasi camkuzgoka paradiso. Ciuta mwanteura wamkufiska khumbo lake lakudanga kwa mtundu wa ŵantu na caru cithu capasi. (Yesaya 55:10, 11) Enya, Paradiso wamkuwezgekaso! Ndipo kasi wamkuŵa nga ndi vici? Lekani Mazgu gha Ciuta, Baibolo Lakupatulika, lizgore.
UMOYO MU PARADISO WAKUWEZGEKASO
11. Mu Paradiso wakuwezgekaso, ncici camucitikira ulwari, ucekuru, na nyifwa?
11 Ulwari, ucekulu, na nyifwa kuti vyamkuŵakoso cara. “Penepapo maso gha vinthuru ghamkujulika, makutu gha ŵakumangwa nayo ghamkubanuka; ndipo mugonti wadukenge nga ndi mpala, lulimi lwa mbuwu lwimbenge.” (Yesaya 35:5, 6) “Ciuta Iyo wati waŵenge pamoza nawo, na kuŵa Ciuta wawo: ndipo wati wafyurenge sozi lose ku maso ghawo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara; nesi kulira, panji nesi kuŵinya: cifukwa vyakudanga viri kuruta.”—Civumbuzi 21:3, 4.
12. Kasi cifukwa ncici ico ise tingaŵira na cigomezgo kuti kwizamkuŵavye ucigeŵenga, ciwawa, na uheni mu Paradiso wamuntazi?
12 Ucigeŵenga, ciwawa, na uheni vyamkumara kwamuyirayira. “Pakuti ŵaheni tiŵadumulikenge; . . . Kwakhala kanyengo, ndipo muheni kuti tiwaŵepo cara; . . . nta waŵengemo. Ŵakuzika ndiwo tiŵaharenge caru.” (Salmo 37:9-11) “Ŵaheni ŵadumulikenge mu caru, ndipo ŵajuvyi tiŵazgurikemo.”—Zintharika 2:22.
13. Kasi ndi mwauli umo Ciuta wiziskirenge mtende?
13 Mtende wamkuŵa posepose pacaru capasi. “Ndiye [Ciuta] wakurekeska nkondo kumpererekezgo za vyaru; ndiye wakupyora uta na kuswa mkondo.” (Salmo 46:9) “Mu mazuŵa ghake ŵasakatenge ŵarunji na cimango kosekose usuke mwezi umare!”—Salmo 72:7.
14, 15. Kasi Baibolo likuyowoyapoci pakunena za nyumba, ncito, na cakurya mu Paradiso wakuwezgekaso?
14 Nyumba zamkuŵa zakuvikilirika na ncito yakukhorweska. “Ŵantu ŵane tiŵazenge nyumba na kukhalamo; . . . Kuti ŵazengenge cara munyake ndiye wakhalengemo; nta tiŵapande munyake warye; cifukwa nga ndi mazuŵa gha kuni ndimo ghaŵirenge mazuŵa ghawo, ndipo ŵakusoreka ŵane tiŵasekererenge swi na milimo ya mawoko ghawo. Kuti tiŵateŵetenge waka cara, panji kubabira soka nako cara.”—Yesaya 65:21-23.
15 Cakurya cakuzenga thupi cizamkuŵako mu uzari. “Kuŵenge fumpha ya vyakurya mu caru; vikupurenge na pa mapiri pacanya.” (Salmo 72:16) “Caru capambika vipambi vyake; Ciuta, Ciuta witu, watitumbika.”—Salmo 67:6.
16. Kasi cifukwa ncici umoyo mu Paradiso wizamkuŵa wakukondweska?
16 Umoyo wamuyirayira mu caru capasi ca paradiso wamkuŵa wakukondweska. “Ŵakunyoroka ŵamkuhara caru na kukhala mwenemumo kwandanda.” (Salmo 37:29) “Mapopa na malo gha mayiyi tighakondwenge, luwalala tilusekerere na kuphuka.”—Yesaya 35:1.
CIMANYISKO NA MUNTAZI MWINU
17. (a) Kasi mukwenera kucitaci usange umoyo mu Paradiso ukumudokeskani? (b) Kasi tikumanya uli kuti Ciuta wiziskenge kusinta kukuru pacaru capasi?
17 Usange umoyo mu Paradiso ukumudokeskani, lekani kuzomerezga ciricose kumutondeskani kusanga cimanyisko ca Ciuta. Iye wakuwutemwa mtundu wa ŵantu ndipo wiziskenge kusinta kwakukhumbikwira kupanga caru capasi kuŵa paradiso. Nakwene nako, usange imwe muŵenge nankongono kumazga masuzgo na nkaza vyakuzara nteura mu caru, kasi mwate mucite nteura cara? Kasi tingalindizga kuti Ciuta vingamutonda? Mwanadi, Baibolo likuyowoya pakweru za nyengo apo Ciuta wazamufumizgapo dongosolo ili lakuzula na ciwawa nakwizakalinjizga m’malo na muwuso wakufikapo, wa urunji. (Daniel 2:44) Kweni Baibolo likucita vinandi kuruska kutiphalira waka za vyose ivi. Ilo likutilongora ise umo tingaponera nakuyakanjira mu caru cipya calayizgano ca Ciuta.—2 Petros 3:13; 1 Yohane 2:17.
18. Kasi cimanyisko ca Ciuta cingamucitiranici imwe sono?
18 Cimanyisko ca Ciuta cingamucitiraniso vinandi nyengo yino. Mafumbo ghanonono mu umoyo na ghakutimbanizga ghakuzgoreka mu Baibolo. Kuzomerezga ulongozgi wake kuti kumovwirani imwe kukuzga ubwezi na Ciuta. Nawo ndi mwaŵi ukuru ’mwe! Ndipo uwu umucitiskaninge imwe kuzaya na mtende uwo Ciuta yekha ndiyo wangapereka. (Ŵaroma 15:13, 33) Apo imwe mukwambapo waka kusanga cimanyisko ici cakuzirwa, imwe mwambapo kuyezgayezga kwakukhumbikwa na kwakupa njombe mu umoyo winu. Imwe kuti mwamuŵa nacitima cara pakusanga cimanyisko ca Ciuta ico cikurongozgera ku umoyo wamuyirayira.
19. Kasi ndi fumbo uli ilo tilighanaghanirenge mu cipaturo cakurondezgapo?
19 Talongora ku Baibolo nga ndi buku ilo lina cimanyisko ca Ciuta. Kweni, kasi tikumanya uli kuti ilo ndilo, kuti buku la vinjeru vya muntu cara, kweni cintu cinyake cikuru kwakuruska? Tighanaghanenge za fumbo ili mu cipaturo cakurondezgapo.
YEZGANI CIMANYISKO CINU
Cifukwa ncici cimanyisko ca Ciuta cingamurongozgerani ku kukondwa kwamuyirayira?
Kasi umoyo wizamkuŵa uli mu caru capasi ico cikwiza ca Paradiso?
Kasi cifukwa ncici mwandulenge kufuma mu kusanga cimanyisko ca Ciuta sono?
[Mafumbo]
