Kasi Ningachita Wuli Kuti Nisange Ŵabwezi Ŵawemi?
MUTU 8
Kasi Ningachita Wuli Kuti Nisange Ŵabwezi Ŵawemi?
“Para nakwiya, nkhukhumba niphalirengeko munthu umo nkhujipulikira. Para nili na chitima, nkhukhumba kuti munthu munyake waniphalirengeko kuti kudandawura yayi viŵenge makora. Para nakondwa, nkhukhumba kuŵa waka na munthu uyo tingakondwera lumoza. Nkhuwona kuti kuŵa na ŵabwezi ntchakuzirwa chomene.”—Brittany.
Ŵanthu ŵanyake ŵakuti ŵana ŵakwenera kuŵa na ŵanyawo ŵakuti ŵaseŵerenge nawo, apo ŵachinyamata ŵakwenera kuŵa na ŵabwezi. Kasi pali mphambano wuli?
Munthu wakuseŵera nayo ni uyo mukuchezgera lumoza nyengo zose.
Mubwezi ni munthu uyo mukutemwana nayo chifukwa chakuti mukuyana vyakuchita.
Baibolo likuti “mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.” (Zintharika 17:17) Apa Baibolo likung’anamura mubwezi mweneko kuluska waka munthu uyo mukaseŵeranga lumoza pa wana!
Unenesko: Waliyose para wakukura, wakukhumba kuŵa na mubwezi uyo
1. Wali na nkharo yiwemi
2. Wakwendera fundo ziwemi
3. Wangamovwira kuchita vinthu viwemi
Fumbo: Kasi ungachita wuli kuti usange mubwezi wanthena? Tiye tiwone umo ungachitira.
Chinthu Chakwamba—Nkharo Yiwemi
Ivyo ukwenera kumanya. Ni waliyose yayi uyo wangaŵa mubwezi wanadi. Baibolo likuti “pali ŵabwezi awo mbakunozgeka kupwetekana.” (Zintharika 18:24) Panji ungazizwa na fundo iyi. Kweni ghanaghanira waka ivi: Kasi uli kuŵapo na “mubwezi” uyo wakakhumbanga waka kukulyera masuku pa mutu? Kasi uli kuŵapo na mubwezi uyo wakuyowoya viwemi para wamwene ulipo kweni kumphepete wakukusesa? Ŵabwezi ŵanthena ŵangakupangiska kuti uleke kugomezga munthu waliyose. * Nyengo zose para ukukhumba kusankha ŵabwezi ukwenera kuwona dankha nkharo yawo, m’malo mwakuwunukira waka kuŵa na ŵabwezi ŵanandi!
Ivyo ungachita. Ukwenera kusankha ŵabwezi awo ŵali na nkharo yiwemi yakuti ungatolerako.
“Waliyose wakuwona kuti mubwezi wane Fiona ni muwemi waka. Nane nkhukhumba kuti ndimo ŵanthu ŵaniwonerenge. Nkhukhumba kuŵa na mbiri yiwemi nga ndiyo. Nakuti nkhudokera chomene.”—Yvette, 17.
Yezga kuchita ivi.
1. Ŵerenga Ŵagalatiya 5:22, 23.
2. Jifumba kuti, ‘Kasi ŵabwezi ŵane ŵali na mikhaliro iyo yili mu gulu la “vipambi vya mzimu”?’
3. Lemba mazina gha ŵabwezi ŵako pasi apa. Kunthazi kwa zina lililose lembako mikhaliro iyo ŵali nayo.
Zina
․․․․․
Mikhaliro
․․․․․
Fundo: Usange mu mutu mwako mukwamba kwiza waka mikhaliro yiheni ya munthu uyo, mbwe yambapo waka kupenja ŵabwezi ŵawemi!
Chinthu Chachiŵiri—Fundo Ziwemi
Ivyo ukwenera kumanya. Para ukuchimbilira kusankha ŵabwezi manya kuti usankhenge ŵabwezi ŵawemi yayi. Baibolo likuti: “Uyo wakuchita vinthu pamoza na vindere wapwetekekenge.” (Zintharika 13:20) Mazgu ghakuti “vindere” ghakung’anamura ŵanthu awo ŵalije mahara yayi. Kweni ghakung’anamura ŵanthu awo ŵakukhumba yayi kupulikira ulongozgi wavinjeru. M’malo mwake ŵakulondezga fundo ziheni. Ukwenera yayi kuŵa na ŵabwezi ŵanthena aŵa.
Ivyo ungachita. Ukwenera kusankha mwakwenelera ŵabwezi, kusankha waka bwekakuko yayi. (Salimo 26:4) Fundo iyi yikung’anamura kuti ukwenera kuŵa na sankho yayi. Mazgu ghakuti kusankha mwakwenelera ghakung’anamura kupambaniska “pakati pa munthu murunji na munthu muheni, pakati pa uyo wakuteŵetera Chiuta na uyo wakuleka kumuteŵetera.”—Malaki 3:18.
“Nkhukondwa chomene kuti ŵapapi ŵane ŵakanovwira kusankha ŵabwezi ŵawemi ŵanthanga yane awo ŵakuchitaso makora chomene mwauzimu.”—Christopher, 13.
Zgora mafumbo ghakulondezgapo agha:
Usange nili na ŵabwezi ŵane, kasi nkhufipa mtima kuti nyengo zinyake ŵanganichichizga kuti nichite icho ntchiheni?
□ Enya
□ Yayi
Kasi nkhutondeka kuphalira ŵapapi ŵane za ŵabwezi awo nkhuchezga nawo chifukwa nkhopa kuti ŵangati mbawemi yayi?
□ Enya
□ Yayi
Fundo: Usange wazgora kuti enya mafumbo ghapachanya agha, mbwenu ukwenera kupenja ŵabwezi awo ŵakwendera fundo ziwemi izo zikukolerana na Mkhristu.
Chinthu Chachitatu—Kuchita Vinthu Viwemi
Ivyo ukwenera kumanya. Baibolo likuti: “Mendezgano ghaheni ghakunanga makhaliro ghawemi.” (1 Ŵakorinte 15:33) Msungwana munyake zina lake Lauren, wakati: “Ŵanyane ku sukulu ŵakunitemwa chomene para nachita ivyo iwo ŵakukhumba. Phukwa likanikoranga mbwenu nkhachitanga waka ivyo ŵakukhumba kuti ŵaŵe ŵabwezi ŵane.” Lauren wakawona kuti usange munthu wakuchita waka ivyo ŵabwezi ŵake ŵakumuphalira wakuŵa nga ntchidoli icho ŵakuseŵereska waka nyengo zose. Kasi ungatemwa kuti ŵanthu ŵakuseŵereskenge nga ntchidoli?
Ivyo ungachita. Mazga ubwezi na ŵanthu wose awo ŵakukhumba waka kuti wenderenge ivyo iwo ŵakukhumba. Mbunenesko kuti paumaliro uŵenge na ŵabwezi ŵadoko, kweni para wachita nthena ujipulikenge makora kweniso uŵenge na ŵabwezi ŵawemi pera awo ŵangakovwira kuchita icho ntchiwemi.—Ŵaroma 12:2.
“Mubwezi wane Clint wakuwona vinthu mwakwenelera kweniso wakughanaghanira chomene ŵanthu, nakuti wakunikhozga chomene nyengo zose.”—Jason, 21.
Jifumba mafumbo ghakulondezgapo agha:
Kasi nyengo zinyake nkhusintha umo nkhuvwalira, nkhuyowoyera kweniso kuchitira vinthu kuti nikondweske waka ŵabwezi ŵane?
□ Enya
□ Yayi
Kasi ŵabwezi ŵane ŵakupangiska kuti nilutenge ku malo ghambura kwenelera agho panekha ningalutako yayi?
□ Enya
□ Yayi
Fundo: Usange wazgora kuti enya mafumbo ghapachanya agha, mbwenu phalira ŵapapi ŵako panji munthu munyake wakukhwima kuti ŵakovwire. Usange ndiwe Kaboni wa Yehova, ungapempha ŵalara kuti ŵakovwire umo ungasankhira ŵabwezi ŵakwenelera, awo ŵangakovwira nadi.
KUTI UMANYE VINANDI, WONA BUKU LACHIŴIRI MUTU 9
Kasi ŵabwezi panji mtima wako vikukuchichizga kuchita vinthu viheni? Wona ivyo ungachita kuti utonde!
[Mazgu Ghamusi]
^ ndime 14 Mbunenesko kuti waliyose wakubudiska. (Ŵaroma 3:23) Ntheura usange mubwezi wako wakukwiyiska ndipo wakukuphepiska kufumira pasi pamtima, ukwenera kumugowokera chifukwa “chitemwa chikubenekelera zakwananga zinandi.”—1 Petrosi 4:8.
LEMBA
“Pali mubwezi uyo wakudemelera kuluska mubali wako.”—Zintharika 18:24.
FUNDO YAKUTI UGHANAGHANIREPO
Para ukwendera fundo ziwemi, awo ŵakuyezgayezga kuchita vinthu viwemi ŵakusangenge kwambura kusuzga kuti ŵaŵe ŵabwezi ŵako. Ndipo ŵangaŵa ŵabwezi ŵako ŵawemi chomene!
KASI UKUMANYA . . . ?
Chiuta wakutemwera yayi, kweni wakuŵa maso chomene para wakusankha ŵanthu awo ŵangaŵa ‘ŵalendo mu hema lake.’—Salimo 15:1-5.
VYAKUTI UCHITE!
Kuti niŵe na ŵabwezi ŵawemi, nkhwenera ․․․․․
Ŵalara msinkhu kwa ine awo ŵangaŵa ŵabwezi ŵane ŵakwenera kuŵa na mikhaliro nga ․․․․․
Ivyo ningafumba ŵapapi ŵane pa nkhani iyi ni ․․․․․
IWE UKUWONA WULI?
● Kasi ukukhumba kuti munyako waŵenge na mikhaliro wuli, ndipo chifukwa wuli?
● Kasi ukwenera kusintha vichi kuti uŵe mubwezi muwemi?
[Mazgu Ghakukhozgera]
“Usange ŵapapi ŵane ŵakuniphalira kuti nileke kwenda na ŵabwezi ŵane ŵanyake, nkhutemwa kuyowoya kuti aŵa ndiwo ŵekha ŵanguŵa ŵanyane. Kweni para naghanaghanirapo chomene nkhuwona kuti ŵapapi ŵane ŵakunipa ulongozgi uwemi ndipo nkhuwona kuti pali ŵanthu ŵanandi awo ŵangaŵa ŵabwezi ŵawemi chomene.”—Cole
[Bokosi]
Yezga Masachizgo Agha
Dumbiskana na ŵapapi ŵako vyakukhwaskana na ŵabwezi. Ŵafumba ŵanthu awo ŵakaŵa ŵabwezi ŵawo apo ŵakaŵa pa msinkhu nga ngwako. Kasi ŵakujiyimba mulandu kuti ŵakaŵa paubwezi na ŵanthu aŵa? Usange ni nthena, chifukwa wuli? Ŵafumba umo ungagegera masuzgo agho ghangaŵapo chifukwa cha kuchezga na ŵabwezi ŵaheni.
Phalira ŵapapi ŵako ŵanthu awo ukuchezga nawo. Usange ukutondeka kuŵaphalira, jifumba kuti, ‘Chifukwa wuli nkhutondeka?’ Kasi pali vinthu vinyake viheni ivyo ŵanyako ŵakuchita ivyo vingapangiska kuti ŵapapi ŵako ŵakukanizge kuchezga nawo? Usange ni nthena, mbwenu ukwenera kusankha mwamahara ŵabwezi.
Utegherezgenge. Ughanaghanirenge chomene pa ivyo ŵanyako ŵakukhumba.—Ŵafilipi 2:4.
Ugowokenge. Leka kukhazga kuti ŵabwezi ŵako ŵabudiskenge yayi. “Tose tikukhuŵara nyengo zinandi.”—Yakobe 3:2.
Leka kukhazga kuti ŵabwezi ŵako uŵenge nawo nyengo zose. Leka kukhazga kuti uŵenge nawo waka palipose. Ŵabwezi ŵanadi ŵakovwirenge apo ukukhumbikwira wovwiri.—Mupharazgi 4:9, 10.
[Chithuzithuzi]
Usange munthu wakuchita waka ivyo ŵabwezi ŵake ŵakumuphalira wakuŵa nga ntchidoli icho ŵakuseŵereska waka nyengo zose
Panji Mungatemwa Kuŵerengaso Nkhani Izi
ŴACHINYAMATA
Ivyo Ŵachinyamata Ŵakufumba
Ivyo ŵanyamata na ŵasungwana ŵakufumba pa nkhani ya kugonana, ŵabwezi, ŵapapi, sukulu, na nkhani zinyake.
