Caru Cambura Masuzgo
Cigaŵa 2
Caru Cambura Masuzgo
1, 2. Kasi ŵanthu ŵanandi ŵali na ghanoghano wuli?
NANGAULI vili nthena, ŵanthu mamiliyoni ghanandi pa caru cose capasi ŵali na ghanoghano linyake. Ŵali na cilindizga cakuti munthazi umu, ŵanthu ŵazamusuzgikaso yayi. Ŵakuyowoya kuti penepano pa caru capasi masuzgo ghose agha ghamarenge. Ŵakugomezga kuti uheni wose uzamumara ndipo caru ciphya cizamukhazikiskika. Ŵakuyowoyaso kuti lufura lwa caru ciphya ici lukuzengeka sono nthena!
2 Ŵanthu aŵa ŵakugomezgaso kuti mu caru ciphya muzamuŵavya nkhondo, nkhaza, kuswa malango, ukavu ndiposo kucita vinthu mwakutemwera. Cizamuŵa caru cambura matenda, citengero na nyifwa. Pa nyengo iyo, ŵanthu ŵazamuŵa ŵarunji ndipo ŵazamukhala mwakukondwa kwamuyirayira mu paradiso pano pa caru. Nakuti ŵanthu awo ŵali kufwa ŵazamuwuskika na kuzakaŵa ŵamoyo kwamuyirayira.
3, 4. Cifukwa wuli ŵanthu aŵa ŵakughanaghana kuti ivyo ŵakugomezga vizamucitika nadi?
3 Kasi ivyo ŵanthu aŵa ŵakughanaghana ni loto waka? Cara. Ivyo ŵakughanaghana vili kuzikika pa cipulikano ca kukhora cakuti caru cizamuŵa Paradiso kwambura kutondeka. (Ŵahebere 11:1) Cifukwa wuli mbakusimikizga? Cifukwa nchakuti Mlengi wankhongono zose ndiyo wali kulayizga.
4 Pakuyowoya za vinthu ivyo Ciuta wali kulayizga, Baibolo likuti: ‘Palije kutondeka kanthu pa viwemi vyose ivyo Yehova Ciuta winu wakayowoya namwe; vyose vyafiskika kwa imwe, palije cinthu cimoza ca ivyo catondeka.’ “Ciuta kuti ndi munthu cara kuti watete utesi, . . . Wanena, ndipo kasi ntha wacicite? Wayowoya, ndipo kasi ntha wacinozge?” “Yehova wa mipingo walapa, wati: ‘Umo ndaphukwira ndimo tikufiskikire, ndipo umo ndamikira fundo ntheura ndimo tiyimilirenge.’”—Joshua 23:14; Maŵazgo 23:19; Yesaya 14:24.
5. Ni mafumbo wuli agho ghakukhumbikwira kuzgoreka?
5 Ndipouli, usange khumbo la Ciuta likaŵa la kukhazikiska paradiso mweneumo ŵanthu ŵazamukhala kwambura masuzgo, cifukwa wuli wazomerezga vinthu viheni kuti vicitikenge? Cifukwa wuli walindilira kwa vilimika vinandi mpaka sono kuti wanozge ivyo vikatimbanizgika? Kasi vilimika vyose ivi, ivyo ŵanthu ŵaŵa ŵakusuzgika vikulongora kuti Ciuta wakutipwelelera nadi yayi panji kuti iyo kulije?
[Mafumbo]
