Cifukwa Ico Ciuta Wazomerezgera Masuzgo
Cigaŵa 6
Cifukwa Ico Ciuta Wazomerezgera Masuzgo
1, 2. Kasi Adamu na Heva ŵakatimbanizga wuli jando liwemi ilo Ciuta wakaŵapa?
KASI cikanangika nchivici? Pakuti Ciuta wakaŵapa jando liwemi ŵapapi ŵithu ŵakwamba mu Edeni, kasi cikacitika nchivici kuti vinthu vitimbanizgike? M’malo mwa mtende na umoza, cifukwa wuli uheni na masuzgo vyatora malo kwa vilimika vinandi?
2 Nchifukwa cakuti Adamu na Heva ŵakacita mwambura kwenelera na wanangwa wawo wa kusankha. Kuti vithu viŵayendere makora cikathemba pa kupulikira malango gha Ciuta pera. Iwo ŵakaluwa fundo iyi. Ŵakasankha kujiwusa ŵekha kwambura Ciuta. Ŵakaghanaghananga kuti ŵakhalenge makora para ŵacita nthena. Ntheura ŵakajumpha mphaka ya wanangwa wa kusankha uwo Ciuta wakaŵapa.—Genesis, cipaturo 3.
Nkhani ya Muwuso
3-5. Kasi Ciuta wakalekeraci kukoma waka Adamu na Heva na kulengaso ŵanthu ŵanyake?
3 Kasi Ciuta wakalekeraci kukoma waka Adamu na Heva na kulengaso ŵanthu ŵanyake? Cifukwa nchakuti pakaŵa kukayikira usange Yehova ngwakwenelera kuwusa cilengikwa cose.
4 Fumbo likaŵa lakuti: Kasi ni njani uyo ngwakwenelera kuwusa, ndipo ni njani uyo wakuwusa makora? Pakuti Ciuta ngwankhongono zose kweniso ni Mlengi wa vilengiwa vyose, iyo ndiyo ngwakwenelera kuviwusa. Cifukwa cakuti Ciuta ngwamahara comene, ndiyo wangawusa makora vilengiwa vyose. Kweni muwuso wa Ciuta ukasuskika. Ndiposo, kasi cilipo ico munthu uyo Ciuta wakalenga wakabuda? Kunthazi uku, tiwonenge umo kugomezgeka kwa ŵanthu kukukhwaskikira.
5 Pakuti ŵanthu ŵakakhumbanga kujiwusa ŵekha, fumbo linyake likaŵa lakuti: Kasi vinthu vingaŵayendera makora usange ŵangajiwusa ŵekha kwambura Ciuta? Tikukayika yayi kuti Mlengi wakamanya zgoro lake, kweni kuti ŵanthu ŵamanye, Ciuta wakaŵapa wanangwa wakujiwusa ŵekha uwo ŵakakhumbanga. Ŵakasankha ŵekha wanangwa uwu, ntheura Ciuta wakazomerezga.
6, 7. Cifukwa wuli Ciuta watipa wanangwa wakujiwusa kwa nyengo yitali nthena?
6 Mwakuzomerezga ŵanthu kuti ŵajiwuse ŵekha kwa nyengo yitali, vilengiwa vyose vingawona usange ŵanthu ŵangakhala makora para ŵakuwusika na Ciuta panji para ŵakujiwusa ŵekha. Ndipo Ciuta wakenera kuŵapa nyengo yakukwana kuti ŵanthu ŵacite vyose ivyo ŵangakwaniska pa ndyali, vyakupangapanga, sayansi, na munkhwara.
7 Lekani Ciuta watipa wanangwa wakucita ivyo tikukhumba mpaka sono mwakuti tiwone usange vinthu vingatiyendera makora kwambura iyo. Mwantheura, taŵanthu taŵa na mwaŵi wa kusankha pakati pa lusungu na nkhaza, citemwa na thinkho, urunji na uheni. Kweni tikusuzgika panji kwandula cifukwa ca ivyo tikusankha. Mwaciyelezgero, pa ivyo tasankha tingasanga viwemi panji viheni, mtende panji masuzgo.
Kugaluka kwa Vilengiwa Vyauzimu
8, 9. (a) Kasi cigaluka cikamba wuli kucanya? (b) Mbanjaniso ŵanyake awo Satana wakaŵagaruska padera pa Adamu na Heva?
8 Paliso fundo yinyake iyo tikwenera kuyighanaghanira. Mbapapi ŵithu ŵakwamba pera yayi awo ŵakagalukira muwuso wa Ciuta. Kweni kasi mbanjani ŵanyake awo ŵakaŵako pa nyengo yira? Vilengiwa vyauzimu. Pambere Ciuta wandalenge ŵanthu, wakalenga ŵangelo ŵanandi kuti ŵakhalenge kucanya. Nawo ŵakalengeka na wanangwa wa kusankha ivyo ŵakukhumba ndiposo kuti ŵapulikilenge muwuso wa Ciuta.—Job 38:7; Salmo 104:4; Civumbuzi 5:11.
9 Baibolo likulongora kuti ŵangelo kucanya ndiwo ŵakamba kugalukira Ciuta. Mungelo munyake wakakhumbanga wanangwa wakujiyimira payekha. Wakakhumbangaso kuti ŵanthu ŵasopenge iyo. (Mateyu 4:8, 9) Mungelo uyu ndiyo wakapangiska kuti Adamu na Heva ŵagaluke mwakuŵapusika kuti Ciuta wakaŵanora cinthu cinyake ciwemi. (Genesis 3:1-5) Lekani wakucemeka Dyabulosi (kung’anamura Musesi) na Satana (kung’anamura Mulwani). Pamanyuma pake, wakapangiskaso kuti ŵangelo ŵanyake ŵagaluke. Ŵangelo aŵa ŵakamba kucemeka viŵanda.—Leviticus 17:7; Civumbuzi 12:9; 16:14.
10. Nchivici cikacitika cifukwa ca kugaluka kwa ŵanthu na vilengiwa vyauzimu?
10 Mwakugalukira Ciuta, ŵanthu ŵakajipeleka ŵekha ku muwuso wa Satana na viŵanda vyake. Ndico cifukwa cake Baibolo likuti Satana ni “ciuta wa caru cino,” uyo “wali kuburumutizga mahara gha awo mbambura cipulikano.” Mwantheura, Mazgu gha Ciuta ghakuti “caru cose cikugona mu nkhongono za muheni.” Yesu wakati Satana ni “Fumu ya caru cino.”—2 Ŵakorinte 4:4; 1 Yohane 5:19; Yohane 12:31.
Nkhani Ziŵiri
11. Ni nkhani wuli yinyake iyo Satana wakasuska Ciuta?
11 Satana wakambiskaso nkhani yinyake kususka Ciuta. Mu nkhani iyi, Satana wang’anamuranga kuti Ciuta wakabudiska umo wakalengera ŵanthu, ndiposo kuti palije munthu uyo wangacita viwemi para wakusuzgika. Nakuti wakati para ŵanthu ŵangayezgeka ŵangamutuka Ciuta. (Job 2:1-5) Mwakucita nthena, Satana wakakayikira kugomezgeka kwa ŵanthu.
12-14. Kasi nyengo yingavumbura wuli unenesko pa nkhani ziŵiri izo Satana wakambiska?
12 Mwantheura, Ciuta wapeleka nyengo yikuru kuti ŵanthu na ŵangelo ŵawone umo nkhani iyi ndiposo nkhani ya muwuso wa Ciuta, zimalirenge. (Wonani Exodus 9:16.) Ivyo vicitikenge mu mdauko wa ŵanthu vivumburenge uwo mbunenesko pa nkhani ziŵiri izi.
13 Cakwamba, kasi nyengo yivumburengeci pa nkhani yakukhwaskana na muwuso wa Ciuta? Kasi Ciuta ngwakwenelera kuwusa? Kasi ŵanthu ŵangajiwusa makora kuluska umo wangaŵawusira Ciuta? Kasi pangaŵa muwuso wuliwose wa ŵanthu uwo ungawuskapo nkhondo, kuswa malango na kutemwera, padera pa muwuso wa Ciuta? Kasi ulipo muwuso uwo ungamazga ukavu kuti ŵanthu wose ŵasakate? Kasi ulipo muwuso uwo ungamazga matenda, ucekuru na nyifwa? Muwuso wa Ciuta ungacita vyose ivi.—Genesis 1:26-31.
14 Pa nkhani yaciŵiri, kasi nyengo yivumburengeci za kuzirwa kwa ŵanthu? Kasi Ciuta wakabudiska umo wakalengera ŵanthu? Kasi walipo uyo wangacita ciwemi para wakuyezgeka? Kasi ŵalipo ŵanthu awo ŵangalongora kuti ŵakukhumba kuwusika na Ciuta m’malo mwa kujiwusa ŵekha?
[Mafumbo]
[Cithuzithuzi pa peji 13]
Ciuta wapeleka nyengo kuti ŵanthu ŵacite vyose ivyo ŵangakwaniska
[Kulongosora Cithuzithuzi]
Combo ca mu mlengalenga: Based on NASA photo
