Cigaŵa 4

Ciuta Wakutimanyiska Vilato Vyake

1, 2. Kasi tikumanya wuli kuti Ciuta wakupeleka mazgoro ku ŵanthu awo ŵakumufumba?

 CIUTA wacitemwa wakuvumbura vilato vyake ku ŵanthu ŵa mitima yiwemi awo ŵakumupenja. Wakuŵaphalira cifukwa ico iyo wazomerezgera masuzgo.

² Baibolo likuti: “Usange ukumupenja [Ciuta], iye tiwasangike na iwe.” “Kweni waliko Ciuta kucanya uyo wakuvumbura pakweru vyamucindindi.” “Yehova kuti wakucita kanthu cara, kwambura kuti wavumbulire cakuubende cake ku ŵateŵeti ŵake zinchimi.”—1 Midauko 28:9; Daniel 2:28; Amosi 3:7.

Mazgoro Ghali Nkhu?

3. Ni nkhu uko tingasanga cifukwa ico Ciuta wazomerezgera masuzgo?

³ Vifukwa ivyo Ciuta wazomerezgera masuzgo kucitika na ivyo wacitenge na masuzgo agha, vikusangika mu buku ilo wali kutipa kuti tisange candulo. Buku ili ni Baibolo. “Malembo ghose ghali kupelekeka na Ciuta ghakwanduliraso kusambizga, na kucenya, na kunozga na kulanga uko kuli mu urunji; mwakuti munthu wa Ciuta waŵenge wakufikapo, wakunozgekera nkhanira milimo yose yiwemi.”—2 Timote 3:16, 17.

4, 5. Nchivici ico cikupangiska Baibolo kuŵa buku lapadera?

⁴ Baibolo ni buku lapadera nadi. Liri na mdauko waunenesko wa ŵanthu, ndiposo wa ivyo vikalengeka pambere ŵanthu ŵandalengeke. Likuchujuka yayi, pakuti lili na maucimi agho ghakufiska sono na agho ghafiskikenge munthazi.

⁵ Palije buku linyake ilo liri na mdauko waunenesko nthena. Mwaciyelezgero, ni mipukutu yicoko waka ya ŵanthu iyo yikusangika sono. Kweni mipukutu yinandi yakale ya Baibolo yicalipo. Pali mipukutu pafupifupi 6,000 ya malemba gha Cihebere (mabuku 39 gha “Cipangano Cakale) ndiposo pafupifupi 13,000 ya malemba gha malemba gha Cigiriki (mabuku 27 gha “Cipangano Ciphya”).

6. Kasi tingagomezga wuli kuti Baibolo liri umo Ciuta wakalilembera?

⁶ Ciuta Wankhongono zose uyo wakapeleka Baibolo, wakawoneseska kuti lalembeka mwaunenesko na kusungika. Mwantheura Mabaibolo agho tili nagho mazuŵa ghano ghakuyana waka na agho ghakalembeka pakwamba. Fundo yinyake iyo yingatovwira kupulikiska njakuti, mipukutu yinyake ya malemba gha Cigiriki gha Cikhristu yikalembeka pakati pajumpha vilimika pafupifupi 100 kufumira apo mipukutu yakwamba yikalembekera. Kweni pa mipukutu yicoko waka ya ŵanthu iyo yikusangika, palije uwo ukalembeka pakati pajumpha vilimika vicoko nthena kufuma apo mipukutu yakwamba yikalembekera.

Cawanangwa Cakufuma kwa Ciuta

7. Kasi Baibolo lathandazgika uli?

⁷ Baibolo ni buku ilo liri na ŵanthu ŵanandi comene kuluska mabuku ghanyake mu mdauko wa ŵanthu. Makope mabiliyoni ghanandi ghasindikizgika. Palije buku linyake ilo lasindikizgika nthena. Baibolo lose panji cigaŵa cake lang’anamulika mu viyowoyero vyakujumpha 2,300. Pa caru cose pafupifupi munthu waliyose wali nalo Baibolo.

8-10. Kasi pali vifukwa wuli vinyake ivyo tikwenera kusanda Baibolo?

⁸ Nadi, buku ili ndakufuma kwa Ciuta  ndipo liri na maukaboni ghanandi ghakulongora kuti ndaunenesko ndipo ndakukhumbikwa kuti tilisandenge. a Likulongosora cilato ca umoyo, ng’anamuro la vinthu ivyo vikucitika pa caru na ivyo vicitikenge munthazi. Palije buku linyake ilo lingalongosora nthena.

⁹ Inya, Ciuta wakuyowoyeskana na ŵanthu kwizira mu Baibolo. Na mzimu wake utuŵa, wakalongozga ŵanthu 40 kuti ŵalembe Baibolo. Ntheura Ciuta wakuyowoya nase kwizira mu Baibolo. Mpositole Paulosi wakalemba kuti: “Cifukwa para mukapokelera kwa ise mazgu gha uthenga, ndigho mazgu gha Ciuta, kuti mukaghapokelera nga ndi mazgu gha ŵanthu cara, kweni nga umo ghaliri kwakuneneska, mazgu gha Ciuta.”—1 Ŵatesalonika 2:13.

¹⁰ Pulezidenti wakale wa ku United States, Abraham Lincoln, wakati Baibolo “nchawanangwa capacanya ico Ciuta wakupeleka ku ŵanthu . . . Kwambura ilo mphanyi tikumanya uwemi na uheni cara.” Ipo, kasi cawanangwa ici cikutiphaliraci za umo masuzgo ghakambira, cifukwa ico Ciuta waghazomerezgera, na ivyo iyo wacitenge na masuzgo agha?

[Mazgu ghamusi]

[Mafumbo]

[Cithuzithuzi pa peji 10]

Ciuta wakuyowoyeskana na ŵanthu kwizira mu Baibolo