Khumbo la Ciuta Liri Pafupi Kufiskika
Cigaŵa 8
Khumbo la Ciuta Liri Pafupi Kufiskika
1, 2. Kasi Ciuta wanozga vici kuti wazakamazge masuzgo?
MUWUSO wa ŵanthu na viŵanda wasuzga ŵanthu kwa nyengo yitali. Kweni Ciuta wasulako yayi masuzgo ghithu. Ndipo kwa vilimika vyose ivi, waŵa wakunozga umo wangafwatulira ŵanthu ku nkhongono yiheni na masuzgo.
2 Pamanyuma pa cigaluka mu Edeni, Ciuta wakamba kuvumbula khumbo lake la kupanga boma ilo lizamuzgora caru kuŵa paradiso kuti ŵanthu wakhalemo. (Genesis 3:15) Mukuluta kwa nyengo, mutu wa upharazgi wa Yesu, uyo ni muyowoyeri mulara wa Ciuta, ukaŵa boma la Ciuta ilo likwiza. Wakayowoya kuti ndilo lekha ilo ŵanthu ŵakwenera kuligomezga.—Daniel 2:44; Mateyu 6:9, 10; 12:21.
3. Kasi Yesu wakayowoya kuti boma ilo likwiza pa caru ni vici, ndipo cifukwa wuli?
3 Yesu wakati boma la Ciuta ilo likwiza ni “ufumu wa kucanya,” cifukwa uzamuwusa kufuma kucanya. (Mateyu 4:17) Wakayowoyaso kuti ni “ufumu wa Ciuta,” cifukwa Ciuta ndiyo Mweneko. (Luka 17:20) Kwa vilimika vinandi, Ciuta wakaphalira ŵanthu ŵanyake kuti ŵalembe maucimi gha awo ŵazamuwusa boma ili na ivyo lizamucita.
Fumu Yiphya ya Caru
4, 5. Kasi Ciuta wakalongora wuli kuti Yesu ni Fumu yakwenelera?
4 Vilimika 2,000 ivyo vyajumpha, Yesu wakafiska maucimi ghanandi gha kukhwaskana na uyo wazamuŵa Fumu ya Ufumu wa Ciuta. Iyo wakalongora kuti Ciuta wamusora kuzakaŵa Fumu ya boma la kucanya. Pamanyuma pa nyifwa yake, Ciuta wakamuwuska Yesu ku umoyo wambura kufwa kucanya. Pakaŵa ŵakaboni ŵanandi awo ŵakawona kuwuka kwake.—Milimo 4:10; 9:1-9; Ŵaroma 1:1-4; 1 Ŵakorinte 15:3-8.
5 Pamanyuma pake Yesu ‘wakakhala pasi ku woko lamalyero la Ciuta.’ (Ŵahebere 10:12) Ndipo wakalindizganga nyengo iyo Ciuta wazamumupa nkhongono kuti wacitepo kanthu pakuŵa Fumu ya Ufumu wa Ciuta kucanya. Ici cikafiska ucimi wa pa Salmo 110:1, apo Ciuta wakumuphalira kuti: “Khalani pa woko lane la malyero ndisuke ndiŵike ŵalwani ŵinu ŵaŵenge citambaliro ca malundi ghako.”
6. Kasi Yesu wakalongora wuli kuti ngwakwenelera kuŵa Fumu ya Ufumu wa Ciuta?
6 Apo wakaŵa pa caru capasi, Yesu wakalongora kuti ngwakwenelera kuŵa Fumu. Nangauli wakakumana na masuzgo, wakasankha kuŵa wakugomezgeka kwa Ciuta. Mwantheura wakalongora kuti Satana ni mutesi apo wakuyowoya kuti ŵanthu ŵangagomezgeka kwa Ciuta yayi para ŵakumana na masuzgo. Yesu, uyo ni munthu murunji, panji ‘Adamu waciŵiri,’ wakalongora kuti Ciuta wakabudiska yayi kulenga ŵanthu ŵarunji.—1 Ŵakorinte 15:22, 45; Mateyu 4:1-11.
7, 8. Kasi Yesu wakacita vinthu wuli viwemi apo wakaŵa pa caru, ndipo wakalongora vici?
7 Kasi ni muwuso ngu uwo wacita vinthu viwemi nga ni umo Yesu wakacitira mu vilimika vicoko vya uteŵeti wake? Pakuŵa na nkhongono ya mzimu utuŵa wa Ciuta, Yesu wakacizganga ŵalwari, ŵakupendera, ŵaciburumutira, ŵambura kupulika na ŵambuwu. Wakawuska nanga mbakufwa! Wakalongora pacoko waka ivyo wazamucitira ŵanthu pa caru cose para wamba kuwusa.—Mateyu 15:30, 31; Luka 7:11-16.
8 Yesu wakacita vinthu vinandi viwemi apo wakaŵa pa caru capasi mwakuti mpositole Yohane wakati: “Kweni vilipo vinyake vinandi ivyo Yesu wakacitanga, vyeneivyo usange vingalembeka vyose, nkhughanaghana kuti nanga ndi caru cose ca pasi kuti cingaŵa na malo cara gha mabuku agho ghangalembeka.”—Yohane 21:25. a
9. Cifukwa wuli ŵanthu awo wakakhumbanga kumanya unenesko wakizanga kwa Yesu?
9 Yesu wakaŵa walusungu comene na ŵanthu, ndipo wakaŵatemwanga comene. Wakawovwiranga ŵakavu na ŵakutambuzgika, kweni ŵasambazi panji ŵamazaza wakaŵatinkhanga yayi. Ŵanthu awo ŵakakhumbanga kumanya unenesko ŵakacitapo kanthu pa nchemo ya Yesu apo wakati: “Zani kwa Ine mose imwe mukulemerwa na kuzotofyeka, ndipo Ine nditi ndimupumuzganinge. Jitolerani goliwori lane, ndipo musambire kwa Ine; cifukwa ndine wakuzika na wakujipepura mu mtima: ndipo muti musangenge kuvukuka ku mizimu yinu. Cifukwa goliwori lane ndipusu, na katundu wane ndi muyuyu.” (Mateyu 11:28-30) Ŵanthu ŵakopa Ciuta ŵakwiza kwa iyo na kulindilira muwuso wake.—Yohane 12:19.
Awo Ŵazamuwusa Nayo
10, 11. Kasi mbanjani awo ŵazamuwusa caru lumoza na Yesu?
10 Nga ni umo maboma gha ŵanthu ghakuŵira na awo ŵakovwira kuwusa, ndimo wuliri Ufumu wa Ciuta wa kucanya. Padera pa Yesu pali ŵanyake awo ŵazamuwusa nayo lumoza caru, lekani Yesu wakalayizga awo ŵazamuwusa nayo kuti ŵazamuŵa mafumu.—Yohane 14:2, 3; Civumbuzi 5:10; 20:6.
11 Lekani pali ŵanthu ŵacoko awo ŵakuwuskikira kucanya umo Yesu wakacitira. Ŵakupanga Ufumu wa Ciuta uwo uzamupeleka vitumbiko vyambura kumara ku ŵanthu. (2 Ŵakorinte 4:14; Civumbuzi 14:1-3) Pa nyengo yose iyi, Yehova waŵa wakupanga lufura lwa muwuso uwo uzamupeleka vitumbiko vyambura kumara ku ŵanthu.
Kujiwusa Kuzamumara
12, 13. Kasi Ufumu wa Ciuta wuli pafupi kucita vici?
12 Mu vilimika vya mu ma 1900, Ciuta wakanjilirapo pa vyakucitika vya ŵanthu. Nga ni umo cigaŵa 9 ca kabuku kano cikuyowoyera, Ucimi wa Baibolo ukulongora kuti Ufumu wa Ciuta pasi pa Khristu ukamba kuwusa mu 1914, ndipo sono wuli pafupi kuparanya muwuso wa Satana. Ufumu uwu uli pafupi kuthereska ŵalwani ŵa Yesu.—Salmo 110:2.
13 Lekani ucimi wa pa Daniel 2:44 ukuti: “Ndipo mu mazuŵa gha mathemba agha [agho ghalipo sono] Ciuta wa kucanya wati wimike uthemba [kucanya], uwo kuti wamkuparanyika cara muyirayira, panji mazaza ghake ghasidike ku fuko linyake cara [ŵanthu ŵazamuzomerezgeka yayi kuwusa]. [Ufumu wa Ciuta] wamkuteketa mauthemba ghose agha na kughamara kweni uwu tiwimilire muyirayira.”
14. Kasi ni vitumbiko wuli ivyo vizamuŵapo cifukwa ca kumara kwa muwuso wa ŵanthu?
14 Pakuti uzamumazga kujiwusa, Ufumu wa Ciuta uzamuwusa caru cose capasi. Ndiposo pakuti uzamuŵa kucanya, uzamupusikika na ŵanthu yayi. Nkhongono ya kuwusa yizamuŵa uko yikawa pakwamba, kucanya na Ciuta. Pakuti muwuso wa Ciuta uzamuthandazgika caru cose, palije nanga njumoza uyo wazamupuluska ŵanthu na cisopo ca utesi panji kusambizga ŵanthu vinjeru vya caru na ndyali. Vinthu ivi vizamuzomerezgeka yayi.—Mateyu 7:15-23; Civumbuzi, vipaturo 17 mupaka 19.
[Mazgu ghamusi]
a Kuti mumanye vinandi vya umoyo wa Yesu, wonani buku la Munthu Wamkulu Woposa Onse Amene Anakhalako, lakusindikizgika mu 1991, na Ŵakaboni ŵa Yehova.
[Mafumbo]
[Cithuzithuzi pa peji 18]
Apo wakaŵa pa caru Yesu wakacizganga ŵalwari, ŵakawuska ŵakufwa, kulongora ivyo wazamucita mu caru ciphya
[Cithuzithuzi pa peji 19]
Ufumu wa Ciuta uzamuparanya maboma ghose gha ŵanthu
