Lufura lwa Caru Ciphya Lukuzengeka Sono
Cigaŵa 11
Lufura lwa Caru Ciphya Lukuzengeka Sono
1, 2. Mwakuyana na ucimi wa Baibolo, ni vinthu wuli ivyo vikucitika sono?
CAKUKONDWESKA comene ni fundo yakuti lufura lwa caru ciphya lukuzengeka sono nthena, nangauli mikhaliro ya caru ca kuwusika na Satana ici yikuhenipirahenipira. Tose tikuwona kuti Ciuta wakuwunganya ŵanthu kufuma ku mitundu yose. Ŵanthu aŵa ndiwo ŵakupanga lufura lwa caru ciphya ceneico cizamunjira m’malo mwa caru cambura mtende ico tikukhalamo sono. Mu Baibolo, pa lemba la 2 Petros 3:13, ŵanthu aŵa ŵakucemeka kuti “caru ciphya.”
2 Ucimi wa Baibolo ukuyowoyaso kuti: “Kwamkuti mu mazuŵa gha umaliro [mu nyengo yithu yino] . . . ŵanthu ŵanandi tiŵarute, na kuti, ‘Tiyeni tikwelere ku lupiri lwa Yehova [kusopa kwake kwaunenesko], kuti watisambizge nthowa zake ndipo tamkwenda mu mendero ghake.’”—Yesaya 2:2, 3.
3. (a) Kasi ucimi wa Yesaya ukufiskika pa ŵanjani? (b) Ndipo buku la umaliro la mu Baibolo likulongosora vici za ucimi uwu?
3 Ucimi uwu ukufiskika sono pakati pa ŵanthu awo ŵakulondezga ‘nthowa za Ciuta ndiposo mendero ghake.’ Buku la umaliro la mu Baibolo likulongosora za ŵanthu ŵakutemwa mtende aŵa kuŵa ‘mzinda ukuru . . . kufuma ku mitundu yose, na ku mafuko na ku ŵanthu na ku malulimi,’ ŵeneawo ŵakuteŵetera Ciuta mwakukolerana pa caru cose capasi. Ndipo Baibolo likuyowoyaso kuti: “Ŵeneaŵa ndiwo ŵafuma mu cisuzgo cikuru cira.” Kung’anamura kuti ndiwo ŵazamupona peneapo ŵanthu ŵaheni ŵazamuparanyika.—Civumbuzi 7:9, 14; Mateyu 24:3.
Ubali Wanadi wa pa Caru Cose
4, 5. Nchivici cikupangiska kuti Ŵakaboni ŵa Yehova ŵaŵe ŵakukolerana pa caru cose?
4 Ŵakaboni ŵa Yehova ŵakuyezgeska comene kulondezga malango ndiposo nthowa za Ciuta. Ŵali na cigomezgo cakukhora ca kuzakakhala na umoyo wamuyirayira mu caru ciphya ca Ciuta. Cifukwa cakuti ŵakupulikira malango gha Ciuta, ŵakulongora kuti mbakugomezgeka ku muwuso wake sono ndipo ŵazamucitaso ntheura mu caru ciphya. Kulikose uko ŵali, mwambura kughanaghanira za mtundu, panji fuko, wose ŵakulondezga malango ghakuyana agho ghakusangika mu Baibolo. Nchifukwa cake mbakukolerana pa caru cose capasi. Ni ŵanthu awo ŵazamukhala mu caru ciphya ca Ciuta.—Yesaya 54:13; Mateyu 22:37, 38; Yohane 15:9, 14.
5 Ŵakaboni ŵa Yehova ŵakumanya kuti ubali wa pa caru cose uwu ulipo cifukwa ca mahara ghawo yayi. Kweni cifukwa cakuti mzimu wa Ciuta uwo ngwankhongono comene, ukovwira ŵanthu awo ŵakupulikira malango ghake. (Milimo 5:29, 32; Ŵagalatiya 5:22, 23) Ciuta ndiyo wakupangiska kuti ŵaŵe ŵakukolerana. Vili nga umo Yesu wakayowoyera kuti, ‘vyose ivyo ni vyambura macitiko ku ŵanthu, kwa Ciuta ni vyamacitiko.’ (Luka 18:27) Mwantheura, Ciuta uyo wakalenga mtambo uwo uŵengeko kwamuyirayira ndiyoso wapangiskenge kuti caru ciphya cizakaŵeko kwamuyirayira.
6. Cifukwa wuli ŵanthu ŵakuzizwa na citemwa ico cili pakati pa Ŵakaboni ŵa Yehova?
6 Ndipo nadi, cithuzithuzi ca umo Yehova wazamuwusira mu caru ciphya camba kale kuwoneka mu ŵanthu awo ŵakupanga lufura lwa caru ciphya ulo lukuzengeka sono. Nakuti ico wapanga na Ŵakaboni ŵake ŵa lero, nchakuzizwiska comene. Cifukwa wuli nchakuzizwiska? Cifukwa nchakuti wapangiska kuti Ŵakaboni ŵa Yehova ŵaŵe pa ubali pa caru cose capasi. Nakuti ubali wawo ngwakuti ungatimbanizgika yayi cifukwa ca kupambana mitundu, fuko panji cisopo. Pakuti Ŵakaboni ŵalipo mamiliyoni ghanandi ndipo ŵakukhala mu vyaru vyakujumpha 235, iwo ŵakutemwana comene ndipo palije uyo wangaŵatatura. Ubali wawo wa pa caru cose, ukumanyikwa na ŵanthu ŵanandi, ndipo ngwakuzizwiska nadi, kulongora kuti Ciuta ndiyo wakupangiska.—Yesaya 43:10, 11, 21; Milimo 10:34, 35; Ŵagalatiya 3:28.
Kumanya Ŵanthu ŵa Ciuta
7. Kasi Yesu wakayowoya kuti tingaŵamanya wuli ŵalondezgi ŵake ŵaunenesko?
7 Kasi tingamanya wuli ŵanthu awo Ciuta ŵasankha kuti ŵaŵe nga ni lufura lwa caru cake ciphya? Oho, kasi mbanjani awo ŵakufiska mazgu agho Yesu wakayowoya, agho ghakusangika pa lemba la Yohane 13:34, 35? Yesu wakati: “Dango liphya nkhumupani, kuti mutemwanenge; nga ndi umo Ine nkhamutemwerani, ndimo namweso mutemweranenge. Na ceneici ndico ŵanthu wose ŵati ŵamanyirenge kuti muli ŵasambiri ŵane, para mukutemwana.” Ŵakaboni ŵa Yehova ŵakugomezga na kulondezga mazgu gha Yesu agha. Nga ni umo Baibolo likusambizgira, ‘ŵakufwilirapo mu kutemwana.’ (1 Petros 4:8) Ŵakujivwalira kutemwa, pakuti kutemwa ndiko kukukaka vyose kuti viŵe mu umoza wakufikapo. (Ŵakolose 3:14) Mwantheura citemwa ico ŵakulongorana, ndico “cikupangiska” kuti ŵaŵe pa ubali pa caru cose capasi.
8. Ni fundo wuli yinyake iyo lemba la 1 Yohane 3:10-12 likulongosora ya umo tingamanyira ŵanthu ŵa Ciuta?
8 Kweniso, lemba la 1 Yohane 3:10-12 likuyowoya kuti: “Mu ceneici ndimo ŵana ŵa Ciuta ŵakuvumbukwira, na ŵana ŵa Satana: yose uyo wakuleka kucita urunji kuti ngwa Ciuta cara, panji uyo walive kutemwa mbali wake. Pakuti uwu mbuthenga weneuwo mukapulika pakudanga, kuti titemwanenge: nga ndi Kayini cara, uyo wakaŵa wa muheni, ndipo wakakoma munung’una wake. Ndipo wakamukomeraci? Cifukwa milimo yake yikaŵa yiheni, ndipo ya munung’una wake yikaŵa yirunji.” Pa cifukwa ici ŵanthu ŵa Ciuta mbamtende pa caru cose.
Cimanyikwiro Cinyake
9, 10. (a) Kasi ŵateŵeti ŵa Ciuta ŵakumanyikwa na mulimo wuli? (b) Kasi Ŵakaboni ŵa Yehova ŵafiska wuli ivyo lemba la Mateyu 24:14 likuyowoya?
9 Paliso nthowa yinyake iyo yingatovwira kumanya ŵateŵeti ŵa Ciuta. Mu ucimi wake wakuyowoya za umaliro wa caru, Yesu wakalongosora vinthu vinandi ivyo vizamucitika mu mazuŵa gha umaliro. (Wonani Cigaŵa 9.) Cimanyikwiro cikuru ca ucimi uwu cikusangika pa Mateyu 24:14, apo pakuyowoya kuti: “Makani ghawemi gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.”
10 Kasi tawona kufiskika kwa ucimi uwu? Enya. Kwambira mu cilimika ca 1914, apo mazuŵa gha umaliro ghakambira, Ŵakaboni ŵa Yehova ŵaŵa ŵakupharazgira ŵanthu makani ghawemi gha Ufumu wa Ciuta ku nyumba zawo pa caru cose capasi, nga umo Yesu wakaŵatumira. (Mateyu 10:7, 12; Milimo 20:20) Mu vyaru vyose Ŵakaboni ŵa Yehova ŵakuphalira ŵanthu za caru ciphya. Cifukwa ca kupharazga kwawo lekani namwe mwaŵa na mwaŵi wakuŵazga kabuku kano. Vili nthena cifukwa cakuti mulimo wa Ŵakaboni ŵa Yehova ukusazgapo kusindikizga na kugaŵira ŵanthu mabuku na magazini agho ghakulongosora makora Ufumu wa Ciuta. Kasi mukumanyapo yunji uyo wakupharazga za Ufumu wa Ciuta ku nyumba na nyumba? Lemba la Marko 13:10 likuti nchito ya kupharazga na kusambizga yikwenera kucitika ‘dankha’ pambere umaliro undize.
Kuzgora Nkhani ya Ciŵiri
11. Kasi Ŵakaboni ŵa Yehova ŵakufiska vici cifukwa ca kugomezgeka ku muwuso wa Ciuta?
11 Ŵakaboni ŵa Yehova ŵakufiska cinthu cinyake cifukwa ca kupulikira malango na ulongozgi wa Ciuta. Ŵakulongora kuti Satana ni mutesi uyo wakayowoya kuti ŵanthu ŵangagomezgeka yayi kwa Ciuta para ŵakusuzgika. Mwantheura ŵakuzgora nkhani yaciŵiri yakukhwaskana na kugomezgeka kwa ŵanthu. (Job 2:1-5) Pakuti iwo mbanandi comene ndipo ŵakufumira ku mitundu yose, Ŵakaboni ŵakucita vinthu mu umoza, ndipo mbakugomezgeka ku muwuso wa Ciuta. Nangauli mbarunji yayi, kweni wakukhozgera muwuso wa Ciuta mwambura kupwelerako kuti ŵakususkika na Satana.
12. Na cipulikano cawo, kasi Ŵakaboni ŵakulondezga njani?
12 Lero, mamiliyoni gha Ŵakaboni ŵa Yehova mbakugomezgeka kwa Ciuta nga ni umo ŵakacitira ŵakaboni ŵa mu nyengo zakale. Ŵanyake mwa ŵakaboni aŵa ni Abelu, Nowa, Yobu, Davide, Sara, Isaki, Yakobe, Debora, Rute, Davide, na Daniyele, kuzunurapo ŵacoko waka. (Ŵahebere, cipaturo 11) Baibolo likuyowoya kuti iwo ni ‘cibingu cikuru ca ŵapanikizgi [ŵakaboni]’ ŵakugomezgeka. (Ŵahebere 12:1) Ŵanthu aŵa na ŵanji, kusazgapo ŵasambiri ŵa Yesu, ŵakaŵa ŵakugomezgeka kwa Ciuta. Ndipo Yesu wakapeleka ciyelezgero ciwemi comene ca kugomezgeka kwanadi.
13. Kasi ni vinthu wuli vyaunenesko vyakukhwaskana na Satana ivyo Yesu wakayowoya?
13 Fundo iyi yikulongora kuti ivyo Yesu wakaphalira ŵalongozgi ŵa cisopo vyakukhwaskana na Satana ni vyaunenesko. Iyo wakati: “Kweni sono mukukhumba kundikoma, nda munthu ine nda wakumunenerani unenesko, weneuwo nkhapulika kwa Ciuta: . . . Imwe wiskemwe ndi Satana, ndipo makhumbiro gha wiskemwe mukukhumba kucita. Wakaŵa mbanda kufuma ku mtendeko, ndipo kuti wakwimilira mu unenesko cara, pakuti mwa iyo mulije unenesko. Para wakuyowoya utesi, wakuyowoya uto nthwake: pakuti ndi mutesi, ndipo ndi wiske wa utesi.”—Yohane 8:40, 44.
Kasi Musankhenge Vici?
14. Kasi nchivici ico cikucitikira lufura lwa caru ciphya sono?
14 Lufura lwa caru ciphya ulo lukuzengeka na Ciuta pakati pa Ŵakaboni ŵa Yehova pa caru cose lukukholerakholera. Cilimika cilicose ŵanthu masauzandi ghanandi ŵakulondezga unenesko uwo ŵasambira ndipo ŵakuzomera muwuso wa Ciuta mwakuyana na wanangwa wawo wa kusankha. Mwantheura, nawo ŵakukhozgera nkhani yakuti Ciuta ndiyo ngwakwenelera kuwusa cilengiwa cose na kulongora kuti Satana ni mutesi comene.
15. Kasi ni nchito wuli ya kupatura iyo Yesu wazamucita?
15 Cifukwa cakuti ŵasankha muwuso wa Ciuta, mbakwenelera kuti ŵaŵe ku ‘woko la malyero’ la Khristu peneapo wakupatura “mberere” ku “mbuzi.” Mu ucimi wake wakuyowoya za mazuŵa gha ku umaliro, Yesu wakati: “Yizamkuwunjikika panthazi zake mitundu yose; ndipo wizamkuŵapatura yumoza yumoza, nga ndi umo muliska wakupatulira mberere ku mbuzi. Ndipo mberere wati wazimikenge ku woko lake la malyero, kweni mbuzi ku mazere.” Mberere ni ŵanthu ŵakujipepura awo ŵakupulikira muwuso wa Ciuta na kovwira ŵabali ŵa Khristu. Mbuzi ni ŵanthu ŵakujikuzga awo ŵakukana ŵabali ŵa Khristu ndipo ŵakukhozgera yayi muwuso wa Ciuta. Kasi cizamucitika nchivici para wamara kupatura? Yesu wakati: “Ŵeneaŵa [awo ni mbuzi] ŵati ŵalutenge ku kulangika kwa muyirayira; kweni ŵakunyoroka [awo ni mberere] ku umoyo wa muyirayira.”—Mateyu 25:31-46.
16. Kuti muzakakhale mu Paradiso uyo wizenge, kasi mukwenera kucitaci?
16 Nadi pano, Ciuta wakutipwelelera nadi! Sonosono apa ŵazgorenge caru kuŵa paradiso wakutowa. Kasi mukukhumba kuti muzakakhalemo mu Paradiso uyo? Usange ndi nthena, sambirani vinthu vyakukhwaskana na Yehova na kuvilondezga. “Penjani Yehova penepapo Iye wangasangika, cemani kwa Iye apo wacali pafupi; muheni waside nthowa yake, na wambura kunyoroka maghanoghano ghake; wawelere kwa Yehova mwakuti wamucitire vyalusungu.”—Yesaya 55:6, 7.
17. Cifukwa wuli tikwenera kuzinazina yayi pakusankha uyo timuteŵeterenge?
17 Palije cifukwa cakuti tizinezinenge. Umaliro wa caru cikoloŵere ici waneng’enera comene. Baibolo likuticenjezga kuti: “Mungatemwanga caru, panji nesi vinthu ivyo vili mu caru. Usange munthu wakutemwa caru, kutemwa kwa Ŵawiske kulimo mwa iyo cara. . . . Ndipo caru cikuluta na makhumbiro ghake, kweni uyo wakucita khumbo la Ciuta, wakukhalilira muyirayira.”—1 Yohane 2:15-17.
18. Kasi mungacita wuli kuti muŵe na cigomezgo ca kuzakakhala mu caru ciphya ca Ciuta?
18 Ŵanthu ŵa Yehova ŵakusambizgika umo ŵazamukhalira kwamuyirayira mu caru ciphya. Ŵakusambira vinthu vyauzimu ndiposo maluso gha umo ŵangapwelelera paradiso. Tikumuciskani kusankha Muwuso wa Ciuta na kukhozgera nchito ya kuponoska ŵanthu iyo yikucitika pa caru cose capasi lero. Sambirani Baibolo na Ŵakaboni ŵa Yehova, na kumanya Ciuta uyo wakumupwelelerani ndiposo uyo wamazgenge masuzgo ghose. Usange mucitenge nthena mungaŵa yumoza wa ŵanthu awo ŵazamukhala mu caru ciphya. Nakuti muŵenge na cigomezgo cose kuti Ciuta wamutumbikaninge na kuzakaŵa wamoyo kwamuyirayira mu caru ciphya.
[Mafumbo]
[Cithuzithuzi pa peji 31]
Ŵakaboni ŵa Yehova mbakukolerana zanadi pa caru cose capasi
[Cithuzithuzi pa peji 32]
Lufura lwa caru ciphya ca Ciuta lukuzengeka sono
