Wanangwa wa Kusankha Ivyo Tikukhumba
Cigaŵa 5
Wanangwa wa Kusankha Ivyo Tikukhumba
1, 2. Kasi tili kulengeka na cawanangwa wuli ciwemi?
KUTI tipulikiske cifukwa ico Ciuta wazomerezgera masuzgo na ivyo wacitenge kuti wamazge masuzgo agha, tikwenera kumanya dankha umo wakatilengera. Wakatilenga na thupi ndiposo wongo pera yayi. Wakatilengaso kuti tighanaghanenge.
2 Cifukwa cakuti tikughanaghana, tili na wanangwa wa kusankha ivyo tikukhumba. Enya, Ciuta wakatilenga na wanangwa wa kusankha ivyo tikukhumba. Ici nchawanangwa ciwemi nadi cakufuma kwa Ciuta.
Umo Tikalengekera
3-5. Cifukwa wuli tikuwonga kuti tili na wanangwa wa kusankha ivyo tikukhumba?
3 Kasi pali kukolerana wuli pakati pa wanangwa wa kusankha ivyo tikukhumba na kuzomerezga masuzgo uko Ciuta wacita? Kuti tizgore fumbo ili, cakwamba ghanaghanirani ici: Kasi mukuwonga kuti muli na wanangwa wa kusankha vyakucita, vyakuyowoya, vyakurya, vyakuvwara, mtundu wa nchito iyo mugwirenge, ndiposo uko mwamukhala na umo mwamukhalira? Panji kasi mungatemwa kuti munthu munyake ndiyo wamuphaliraninge cilicose ico muyowoyenge na ico mucitenge nyengo zose?
4 Palije munthu wamahara uyo wangatemwa kuti wacitenge kuphalirika cilicose. Cifukwa wuli? Cifukwa ca umo Ciuta wakatilengera. Baibolo likutiphalira kuti Ciuta wakalenga munthu mu ‘cikozgo cake’ kweniso kwakulingana na nkharo yake. Ndipo Ciuta iyo mwene wali na wanangwa wa kusankha. (Genesis 1:26; Duteronome 7:6) Apo Ciuta wakalenganga ŵanthu, ŵakaŵapa wanangwa wakuyana waka wa kusankha ivyo ŵakukhumba. Lekani tikukwiya para uyo wakutiwusa wakutisuzga.
5 Ntheura kukhumba wanangwa kukiza kwekha yayi, pakuti Yehova ni Ciuta wa wanangwa. Baibolo likuti: “Penepapo pali mzimu wa Fumu [Yehova], penepapo pali wanangwa.” (2 Ŵakorinte 3:17) Mwantheura, Ciuta wakatilenga na wanangwa wa kusankha ivyo tikukhumba. Pakuti wakamanya umo maghanoghano ghithu ghaliri, wakamanya kuti tingaŵa ŵacimwemwe para tingaŵa na wanangwa wa kusankha ivyo tikukhumba.
6. Kasi Ciuta wakalenga wuli wongo withu kuti ugwirenge nchito mwakukolerana na wanangwa wa kusankha ivyo tikukhumba?
6 Padera pa wanangwa wa kusankha ivyo tikukhumba, Ciuta wali kutipaso luso lwa kughanaghana, kusanda vinthu, na kupatura pakati pa ciwemi na ciheni. (Ŵahebere 5:14) Mwantheura, wanangwa wa kusankha ukeneranga kucitika mwamahara. Tikalengeka nga ni makina yayi agho ghakucita vinthu kwambura kughanaghana, ndiposo agho ghakucita waka ivyo uyo wakaghapanga wakukhumba. Kweniso, tikalengeka nga ni nyama yayi izo zikucita waka vinthu mu ciwuluwulu. M’malo mwake, wongo withu ukalengeka kuti ugwirenge nchito mwakukolerana na wanangwa wa kusankha ivyo tikukhumba.
Vinthu Vikamba Makora
7, 8. Kasi Ciuta wakaŵapa jando liwemi wuli ŵapapi ŵithu ŵakwamba?
7 Padera pa wanangwa wa kusankha, Adamu na Heva ŵakapika vinthu vyose ivyo munthu wangakhumba. Ciuta wakacita vyose ivi kuti walongore kuti wakuŵapwelelera. Wakaŵaŵika mu paradiso wakutowa. Ŵakasoŵanga kanthu yayi. Ŵakaŵa na maghanoghano ndiposo mathupi ghaurunji, ntheura ŵakatenge ŵacekurenge yayi, kulwara, nesi kufwa. Ŵakatenge ŵakhalenge kwamuyirayira. Ŵakatenge ŵababenge ŵana ŵarunji awo ŵakatenge ŵakhalenge mwacimwemwe kwamuyirayira. Ndipo para ŵandana, ŵakatenge ŵacitenge nchito yakukondweska comene ya kuzgora caru cose capasi kuŵa paradiso.—Genesis 1:26-30; 2:15.
8 Pakuyowoya za ivyo Yehova wakacita, Baibolo likuti: “Ciuta wakawona vyose ivyo wakavilenga, ndipo wonani, vikaŵa viwemi comene.” (Genesis 1:31) Pakuyowoya za Ciuta, Baibolo likuyowoyaso kuti: “Mulimo wake ngwakufikapo.” (Duteronome 32:4) Enya, Mlengi wakaŵapa jando liwemi ŵanthu. Pakaŵavya cinyake ico wakatenge wacitenge kuluska apa. Ciuta wakalongora kuti wakutighanaghanira comene!
Wanangwa Wuli na Mphaka
9, 10. Kasi wanangwa wa kusankha ivyo tikukhumba ukwenera kucitika wuli?
9 Kweni kasi Ciuta wakakhumbanga kuti wanangwa wa kusankha ivyo tikukhumba uŵe wambura mphaka? Ghanaghanirani za msumba uwo wuli na galimoto zinandi kweni palije malango gha pa msewu. Kasi mungatemwa kwendeska galimoto mu msumba wanthena? Yayi, ici cingapangiska kuti paŵe nthimbanizgo, ntheura pangaŵa ngozi zinandi.
10 Ndimo viliri na wanangwa wa kusankha uwo Ciuta wali kutipa. Ciuta watipenge wanangwa wambura mphaka, mphanyi mu caru muli nthimbanizgo. Pakwenera kuŵa malango kuti ghalongozgenge ŵanthu. Mazgu gha Ciuta ghakuti: “[Mukhalenge] nga mbanangwa, kweni kuŵa nawo wanangwa winu nga nchidiko ca uheni cara.” (1 Petros 2:16) Ciuta wakukhumba kuti wanangwa wa kusankha ivyo tikukhumba ucitikenge makora mwakuti tose tandulenge nawo. Ciuta wakakhumbanga kuti tiŵe na wanangwa wambura mphaka yayi, kweni kuti tipulikirenge dango.
Malango gha Njani?
11. Kasi tikalengeka kuti tipulikirenge malango gha njani?
11 Kasi tikalengeka kuti tipulikirenge malango gha njani? Kuumaliro kwa lemba la 1 Petros 2:16, Petros wakati tiŵenge “nga mbazga ŵa Ciuta.” Ici cikung’anamura wuzga wakucita kucicizgika yayi, kweni, cikung’anamura kuti tikalengeka kuti tiŵenge ŵacimwemwe pekha para tikupulikira malango gha Ciuta. (Mateyu 22:35-40) Malango ghake ghakupeleka ulongozgi uwemi comene kuluska malango ghose agho ŵanthu ŵangapanga. “Ine ndine Yehova, Ciuta winu uyo wakumusambizgani kuti muwone candulo, uyo wakumulongozgani mu nthowa iyo mukwenera kwendamo.”—Yesaya 48:17.
12. Kasi malango gha Ciuta ghakutipa wanangwa wuli wa kusankha?
12 Ndipouli, malango gha Ciuta ghakutipa wanangwa ukuru wa kusankha ivyo tikukhumba, cikuru tikuleka kujumpha mphaka. Lekani tikucita vinthu vyakupambanapambana ndipo ici cikupangiska kuti taŵanthu tiŵe ŵakukondweska. Ghanaghanirani za vyakurya vyakupambanapambana, sumu, maluso na nyumba pa caru cose capasi. Tikukhumba nadi kuti tisankhenge tekha vyakucita pa nkhani izi m’malo mwakuti munthu munyake ndiyo watisankhirenge.
13. Ni malango ngani gha cilengiwa agho tikwenera kupulikira kuti vinthu vitiyendere makora?
13 Ntheura tikalengeka kuti tiŵenge ŵacimwemwe pekha para tikupulikira malango gha Ciuta gha mikhaliro. Cikuyana waka na kupulikira malango gha Ciuta gha cilengiwa. Mwaciyelezgero, usange tingazelezga nkhongono ya caru yakuguza vinthu na kuduka kufuma pa malo ghapacanya, mbwenu tipwetekekenge panji kufwa. Usange tingasurako ivyo thupi lithu likukhumba na kuleka kurya, kumwa maji, panji kuthuta, mbwenu tifwenge.
14. Kasi tikumanya wuli kuti ŵanthu ŵakalengeka kuti ŵajiwusenge ŵekha yayi kwambura Ciuta?
14 Nga ni umo tikalengekera kuti tipulikirenge malango gha Ciuta gha cilengiwa, ndimo viliriso na malango gha Ciuta gha mikhaliro. (Mateyu 4:4) Taŵanthu tikalengeka kuti tijiwusenge tekha kwambura Mlengi withu yayi. Nchimi Yeremiya yikati: “Nthowa ya munthu kuti yili mwa iye yekha cara, kuti nkhwa munthu uyo wakwenda cara kurunjika mendero ghake. A Yehova, mundiyeruzge.” (Yeremiya 10:23, 24) Ntheura ŵanthu ŵakalengeka kuti ŵawusikenge na Ciuta, ŵekha yayi.
15. Kasi malango gha Ciuta ghakatenge ghaŵenge mphingo kwa Adamu na Heva?
15 Kupulikira malango gha Ciuta kukatenge kuŵenge mphingo yayi ku ŵapapi ŵithu ŵakwamba. M’malo mwake, ŵapulikirenge mphanyi vinthu vikaŵayendera makora comene. Adamu na Heva ŵalondezgenge malango gha Ciuta, mphanyi vyose vili makora. Nakuti mphanyi sono taŵanthu tose tikukhala mwakukolerana ndiposo mwakukondwa mu paradiso! Mphanyi kulije uheni, masuzgo na nyifwa.
[Mafumbo]
[Cithuzithuzi pa peji 11]
Mlengi wakaŵapa jando liwemi ŵanthu
[Cithuzithuzi pa peji 12]
Kasi mungatemwa kwendeska galimoto pa msewu uwo mukwenda galimoto zinandi usange palije malango?
