Sambiro 9

Ŵateŵeti ŵa Ciuta Ŵakwenera Kuŵa Ŵatuŵa

Cifukwa ncici tikwenera kuŵa ŵatuŵa mu vyose? (1)

Cikung’anamuraci kuŵa ŵatuŵa mwauzimu? (2)

ŵatuŵa mwamakhaliro? (3) ŵatuŵa mukaghanaghaniro? (4) ŵatuŵa mkawonekero? (5)

Kasi ndi kayowoyero kakufipirwa nka ako tikwenera kukakanizga? (6)

1. Yehova Ciuta ndimutuŵa ndipo ngwakupatulika. Wanacirindizga ca kuwona aŵo ŵakumusopa kuŵa ŵatuŵa—mwauzimu, mwamakhaliro, kaghanaghaniro, ndiposo kawonekero kawo. (1 Petros 1:16) Ncakusuzgirako nadi kuŵa mutuŵa pamaso gha Ciuta. Tikukhala mu caru cakufipirwa. Kweniso tikulimbalimba na maubendezi ghithu gha kucita kwananga. Kweni tingalekanga cara.

2. Mutuŵa Mwauzimu: Usange tikukhumba kuteŵetera Yehova, tingayezganga cara kudemelera ku kasambizgiro panji tumaluso twa cisopa cautesi. Tifumemo mu cisopa cautesi ndipo mwantowa yiliyose tingacivikiliranga ico cara. (2 Ŵakorinte 6:14-18; Civumbuzi 18:4) Usange tasambira unenesko pakunena za Ciuta, tikwenera kuŵa maso mzire ŵatisovye aŵo ŵakusambizga utesi.—2 Yohane 10, 11.

3. Mutuŵa Mumakhaliro: Yehova wakukhumba aŵo ŵakumusopa kurongora kakhaliro nga Mbakristu ŵaunenesko nyengo zose. (1 Petros 2:12) Iye wakuwona vyose  ivyo tikucita, nanga mtepanji tacita ku ubendi. (Ŵahebere 4:13) Tikane uzaghali na tumaluso tose twaukazuzi twa caru ici.—1 Ŵakorinte 6:9-11.

4. Mutuŵa Mukaghanaghaniro: Usange tazuzga maghanoghano ghithu na maghanoghano ghawemi, ghatuŵa, nkaro yithu nayo yiŵenge yituŵa. (Ŵafilipi 4:8) Kweni usange tikukhala pa vintu vyaukazuzi, cakufumapo cake ndico kacitiro kaheni. (Mateyu 15:18-20) Tikwenera kutcheŵa makhaliro gha vyakukondweska agho ghangabinkiska kaghanaghaniro kithu. Tingazuzga maghanoghano ghithu na kaghanaghaniro katuŵa mwa kuŵazga Mazgu gha Ciuta.

5. Kawonekero Katuŵa: Pakuti ŵakuyimira Ciuta, Ŵakristu ŵakwenera kusunga mathupi na vyakuvwara vyawo kuŵa vituŵa. Tikwenera kugeza mu mawoko usange tafuma ku cimbuzi, kweniso tigeze pambere tindarye cakurya panji kukora cakurya. Usange mulije malo ghawemi ghakutayako viheni vyakucimbuzi, mujimire. (Duteronome 23:12, 13) Kawonekero kawemi kana wanduzi uwemi comene ku moyo withu. Nyumba ya Mkristu yikwenera kuŵa yakutowa mukati na kuwalo wuwo. Yikwenera kurongora ciyezgelero ciwemi mucikaya.

6. Kayowoyero Katuŵa: Ŵateŵeti ŵa Ciuta ŵakwenera kuyowoya unenesko nyengo zose. Ŵatesi nta ŵamukuhara Ufumu wa Ciuta. (Ŵaefeso 4:25; Civumbuzi 21:8) Ŵakristu kuti ŵakugwiriskira ncito kayowoyero kaheni cara. Nta ŵakupulikizga nesi kuyowoya milangwe ya ntonto panji tunkani twakuvunda cara. Cifukwa ca kayowoyero kawo katuŵa, iŵo ŵarongora viyezgelero viwemi mwakupambana na ŵanji pa ncito panji kusukulu nanga ndi kuŵazengezgani ŵawo.—Ŵaefeso 4:29, 31; 5:3.

[Vithuzithuzi pa peji 18, 19]

Ŵateŵeti ŵa Ciuta ŵakwenera kuŵa ŵatuŵa mu ntowa yiliyose