Sambiro 2

Ciuta Ndi Njani?

Kasi Ciuta waunenesko ndi njani, ndipo zina lake ndi njani? (1, 2)

Kasi ndi thupi la mtundu uli ilo wali nalo? (3)

Kasi wuntu wake wapadera ndi ngu? (4)

Kasi tikwenera kugwiriskira ncito vikozgo na vimanyikwiro mu kumusopa kwithu? (5)

Kasi ndi ntowa ziŵiri nzi izo tingasambira pakunena za Ciuta? (6)

1. Ŵantu ŵakusopa vintu vinandi comene. Kweni Baibolo likutiphalira kuti pali Ciuta yumoza WAUNENESKO. Wakalenga vyose kucanya na pacaro capasi. Pakuti wali kutipa umoyo, ndiye Yekha tikwenera kumusopa.—1 Ŵakorinte 8:5, 6; Civumbuzi 4:11.

2. Ciuta wana vithokozo vinandi comene kweni wali na zina limoza. Zina ilo ndi YEHOVA. Mu ma Baibolo ghanandi, zina la Ciuta lafumiskikamo ndipo laharirika na vithokozo vyakuti FUMU panji CIUTA. Kweni apo Baibolo likalembekanga, zina lakuti Yehova likasangikangamo nyengo zakukwanira 7,000!—Exodus 3:15; Salmo 83:18.

3. Yehova wana thupi, kweni kuti liri nga ndithu yayi. “Ciuta ndi Mzimu,” likuphara nteura Baibolo. (Yohane 4:24) Mzimu ncintu ca umoyo wapacanya nkanira  kuruska withu. Palije muntu wali kumuwonapo Ciuta. Yehova wakukhala kucanya, kweni wangawona vintu vyose. (Salmo 11:4, 5; Yohane 1:18) Kasi, ncici, pera ico ndi mzimu utuŵa? Kuti ndi muntu nga ndi Ciuta cara. Kweni, ndi nkongono yakugwira ncito ya Ciuta.—Salmo 104:30.

4. Baibolo likuvumbura wuntu wa Yehova kwa ise. Likurongora kuti wuntu wake wapadera ndiwo citemwa, urunji, vinjeru, na nkongono. (Duteronome 32:4; Job 12:13; Yesaya 40:26; 1 Yohane 4:8) Baibolo likutiphaliraso kuti ngwacisungusungu, ngwalusungu, ngwakugowokera, ngwakupa, ndiposo ngwakuzizipizga. Ise, nga mbana ŵakupulikira, tikwenera kumuyezga.—Ŵaefeso 5:1, 2.

5. Kasi tikwenera kugwada panji kusopa vikozgo, vithuzithunzi, panji vimanyikwiro mukusopa kwithu? Cara! (Exodus 20:4, 5) Yehova wakuti tikwenera kumusopa iye pera. Kuti wamupengeko munyake ucindami wake cara panji kantu kanyake kalikose cara. Vikozgo vilije nkongono kuti vingatovwira.—Salmo 115:4-8; Yesaya 42:8.

6. Kasi ndi mwauli umo tingamumanyira makora Ciuta? Ntowa yimoza ndiyo mwakuwona ivyo wali kulenga nakughanaghanirapo comeme ico vintu ivi vikutiphalira. Virengiwa vya Ciuta vikutirongora pakweru kuti wana nkongono zakuruska na vinjeru. Tikuwona kutemwa kwake mu vyose ivyo wali kulenga. (Salmo 19:1-6; Ŵaroma 1:20) Ntowa yinyake iyo tingamanyira za Ciuta ndiyo kuŵerenga Baibolo. Mu ilo wakutiphalira vinandi comene pakunena za Ciuta uyo iye wali. Wakutiphaliraso za khumbo lake na ivyo wakukhumba kuti timucitire.—Amosi 3:7; 2 Timote 3:16, 17.

[Vithuzithuzi pa peji 5]

Tikusambira za Ciuta kufuma ku vilengiwa na kufuma mu Baibolo