Sambiro 4

Diabolosi Ndi Njani?

Satana Diabolosi—wakafumanku? (1, 2)

Ndi mwauli umo Satana wakusovyera ŵantu? (3-7)

Cifukwa ncici mukwenera kumukanizga Diabolosi? (7)

1. Lizgu lakuti “diabolosi” likung’anamura uyo wakutetera muntu munyake utesi. “Satana” cikung’anamura murwani panji wakususka. Agha ndi mazgu ghakupika kwa murwani murara wa Ciuta. Pakudanga, wakaŵa mungelo muweme comene kucanya pamoza na Ciuta. Ndipouli, mukuruta kwa nyengo wakajighanaghanira comene za iye yekha nakukhumba kupoka wenerero wa kusopa ivyo vikwenerera Ciuta.—Mateyu 4:8-10.

2. Mungelo uyu, Satana, wakayowoya kwa Heva kwizira mwa njoka. Mwakumuphalira utesi, wakamufumyako ku kupulikira Ciuta. Mwanteura Satana wakimikana na ico cikucemeka “muwuso” wa Ciuta, panji malo nga ndi Wapacanya Nkanira. Satana wakakayikiranga usange kwari Ciuta wakuwusa mwa ntowa yiwemi nakukhorweska vikhumbo vya ŵantu Ŵake. Satana wakambaso kukayikira usange panji muntu waliyose wangarutilira kuŵa wakugomekezgeka kwa Ciuta. Mwakucita ici, Satana wakajipanga yekha kuŵa murwani wa Ciuta. Ndico cifukwa cake wakazakacemeka Satana Diabolosi.—Genesis 3:1-5; Job 1:8-11; Civumbuzi 12:9.

3. Satana wakuyezga kupusika ŵantu kuti ŵamusopenge iye. (2 Ŵakorinte 11:3, 14) Ntowa yimoza yakusovyeramo ŵantu ndiyo kwizira mu cisopa cautesi. Usange cisopa cikusambizga utesi pakunena za Ciuta, ico cikukwaniriska nkanira khumbo la Satana. (Yohane 8:44) Ŵantu aŵo ni mamembala gha visopa vyautesi ŵangakhorwa nkanira kuti ŵakusopa Ciuta waunenesko. Kweni mwaunenesko iwo ŵakuteŵetera Satana. Iye ndi ‘ciuta wa caru cino.’—2 Ŵakorinte 4:4.

4. Kugomezga mizimu ndi ntowa yinyake iyo Satana wakuguzira nayo ŵantu ku nkongono zake. Iwo ŵangacemerezga ku mizimu kuti yiŵawovwire, yipweteke ŵanyawo, kuŵaphalira vyamuntazi, panji kuŵacitira vyamintondwe. Satana ndiye nkongono ziheni kunyuma kwa vyakucitika vyose ivi. Kuti tikondweske Ciuta, tileke kutolamo cigaŵa mu kugomezga mizimu.—Duteronome 18:10-12; Milimo 19:18, 19.

5. Satana wakupuvyaso ŵantu kwizira mu kujitemwa cifukwa ca fuko na kusopa mawupu gha vya ndyale. Ŵanji ŵakughanaghana kuti mtundu waŵo panji  fuko ndiwemiko kuruska ŵanyawo. Kweni uwu kuti ni unenesko cara. (Milimo 10:34, 35) Ŵanji ŵakulaŵiska ku mawupu gha ndyale kuti ghangamazga vyakumara mahara vya muntu. Mwa kucita ici, ŵakukana Ufumu wa Ciuta. Uwo ndiwo zgoro lekha ku vyakumara mahara vya taŵantu.—Daniel 2:44.

6. Ntowa yinyake iyo Satana wakupuvyira ŵantu ndiyo mwakuŵayezga na makhumbiro ghaheni. Yehova wakutiphalira kukanizga tumaluso twakutitolera mukwananga cifukwa wakumanya kuti tungatipwetekeska. (Ŵagalatiya 6:7, 8) Ŵantu ŵanji ŵangakhumba nadi kuti munjizgikemo mu ntowa zawo ziheni. Kweni kumbukirani, ndi Satana uyo wakumukhumbirani kuti mucite vintu ivi.—1 Ŵakorinte 6:9, 10; 15:33.

7. Satana wangagwiriskira ncito thombozgo panji suskano kumucitiskani kuleka kuteŵetera Yehova. Ŵanji mwa ŵakutemweka ŵinu ŵangakwiya nadi cifukwa cakuti mukuŵerenga Baibolo. Ŵanji ŵangamuhoyani nakumusekani. Kweni kasi ni nku uko kukufuma umoyo? Satana wakukhumba kumuwofyani waka kuti muleke kusambira za Yehova. Mungamupanga mwaŵi Satana kuti waruske cara! (Mateyu 10:34-39; 1 Petros 5:8, 9) Mwa kukanizga Diabolosi, mungakondwereska Yehova na kurongora kuti mukuthuwuska muwuso Wake.—Zintharika 27:11.

[Vithuzithuzi pa peji 9]

Cisopa cautesi, kugomezga mizimu na kusankana mitundu vikupuvya ŵantu

[Cithuzithuzi pa peji 9]

Kanizgani Satana mwakurutilira kusambira za Yehova