Sambiro 5

Kasi Khumbo la Ciuta Kurazga ku Caru Capasi Ndakuti Uli?

Cifukwa ncici Yehova wakalenga caru capasi? (1, 2)

Cifukwa ncici caru capasi sono ndi paradiso yayi? (3)

Kasi ŵantu ŵaheni camukuŵacitikira ncici? (4)

Muntazi umu, kasi Yesu wamukuŵacitiraci ŵarwari? ŵacekuru? ŵakufwa? (5, 6)

Kuti muzakaŵe yumoza wa aŵo ŵazamupokera vitumbiko vyakuntazi, kasi mukwenela kucitaci? (7)

1. Yehova wakalenga caru ici capasi kuti ŵantu ŵakondwe nakukhalamo kwamuyirayira. Wakakhumba caru capasi nyengo zose kuti mukhale ŵantu ŵarunji, ŵakukondwa. (Salmo 115:16; Yesaya 45:18) Caru capasi kuti cizamkuparanyikapo yayi; cikhalilirenge muyirayira.—Salmo 104:5; Mupharazgi 1:4.

2. Pambere Ciuta wandapange muntu, Iye wakasanka kacigaŵa kamoza ka caru capasi na kukapanga paradiso wakutowa. Wakakacema munda wa Edeni. Mukaŵa mu munda uwu umo wakaŵikamo mwanarumi wakudanga na mwanakazi, Adamu na Heva. Ciuta wakaŵakhumbira iŵo kuŵa na ŵana nakuzuzga caru cose capasi. Mwapacokopacoko mpanyi ŵakazgora caru cose capasi kuŵa paradiso.—Genesis 1:28; 2:8, 15.

3. Adamu na Heva ŵakananga mwadala mwakuswa dango la Ciuta. Nteura Yehova wakaŵafumizgamo mu munda wa Edeni. Paradiso wakatayika. (Genesis 3:1-6, 23) Kweni kuti Yehova wali kuruwa cara khumbo lake kurazga ku caru ici capasi. Iye wakulayizga kucipanga paradiso, umo ŵantu ŵazamkukhala kwa muyirayira. Ndi mwauli umo iye wizamkucicitira ici?—Salmo 37:29.

4. Pambere caru ici capasi cindapangike kukhala paradiso, ŵantu ŵaheni ŵakwenera kuwuskikapo. (Salmo 37:38) Ici cizamucitika pa Haramagedoni, iyo ndi nkondo ya Ciuta yakumazga uheni wose. Cakurondezgapo, Satana wazamujalirika kwa vyaka 1,000. Ici cikung’anamura kuti ŵantu ŵaheni nta ŵizamulekeka kuti ŵanange caru. Ŵantu ŵa Ciuta ŵekha ndiwo ŵizamkupona.—Civumbuzi 16:14, 16; 20:1-3.

5. Penepapo Yesu Kristu wizamkuwusa  nga ndi Karonga pa caru ici capasi kwa vyaka 1,000. (Civumbuzi 20:6) Mwapacokopacoko iye wizamufumiskapo kwananga kufuma mu maghanoghano ghithu na mathupi ghithu. Tizamuŵaso ŵarunji nga ndi umo ŵakaŵira Adamu na Heva pambere ŵandanange. Penepapo kuti kwamukuŵaso kurwara, kucekura, nanga ndi nyifwa cara. Ŵarwari ŵamkucizgika, ŵacekulu ŵamuweleraso ku wanici.—Job 33:25; Yesaya 33:24; Civumbuzi 21:3, 4.

6. Mu Muwuso wa Vyaka Cikwi wa Yesu, ŵantu ŵakugomezgeka ŵamkugwilirapo ncito pakupanga caru cose capasi kuŵa paradiso. (Luka 23:43) Kweniso ma miliyoni ghanandi gha ŵakufwa ŵizamukuwuskikira ku umoyo pa caru capasi. (Milimo 24:15) Usange ŵakucita ivyo Ciuta wakukhumba kwa iŵo, ŵizamkurutilira kukhala na umoyo wandanda pa caru capasi. Usange yayi, ŵizamkuparanyika kwamuyirayira.—Yohane 5:28, 29; Civumbuzi 20:11-15.

7. Khumbo lakudanga la Ciuta kurazga ku caru capasi penepapo lizamkufiskika. Kasi mungakhumba kuzakaŵamo na cigaŵa mu vitumbiko vyakuntazi ivi? Usange ndi nteura, mukwenera kurutilira kusambira za Yehova na kupulikira ivyo wakukhumba. Kufikapo pa maungano gha pa Nyumba Yaufumu ya Ŵakaboni ŵa Yehova ya kufupi namwe kumovwiraninge kucita nteura.—Yesaya 11:9; Ŵahebere 10:24, 25.

[Cithuzithuzi pa peji 10]

Paradiso wakutayika

[Vithuzithuzi pa peji 11]

Para yajumpa Haramagedoni, caru capasi cizamukupangika kuŵa paradiso