Sambiro 6

Kasi Ufumu wa Ciuta Ncici?

Kasi Ufumu wa Ciuta uli nku? (1) Karonga wake ndi njani? (2)

Kasi ŵanji ŵakuŵamo na cigaŵa mu kuwusa na Karonga? Usange ndi nteura, mbaringa? (3)

Cikurongora ncici kuti tikukhala mu mazuŵa ghaumaliro? (4)

Kasi Ufumu wa Ciuta ŵizamuŵacitiraci ŵantu muntazi umu? (5-7)

1. Apo wakaŵa pa caru capasi, Yesu ŵakasambizga ŵakumurondezga ŵake kupempelera Ufumu wa Ciuta. Ufumu ndi boma leneilo likurongozgeka na karonga. Ufumu wa Ciuta ngwapadera comene. Uli kukhazikiskika kucanya ndipo wizamkuwusa pa caru ici capasi cose. Wizamkutuŵiska panji kutoweska zina la Ciuta. Wizamkucitiska khumbo la Ciuta kucitika pano pasi nga ndi umo likucitikira kucanya.—Mateyu 6:9, 10.

2. Ciuta wakarayizga kuti Yesu wizamkuŵa Karonga mu Ufumu Wake. (Luka 1:30-33) Apo Yesu wakaŵa pano pa caru capasi iye wakasimikizgira kuti wizamkuŵa Muwusi wacisungusungu, wakurunjika, na wakufikapo. Apo wakawelera kucanya, kuti wakaŵikika kuŵa Karonga wa Ufumu wa Ciuta nyengo yeneyiyo cara. (Ŵahebere 10:12, 13) Mu 1914, Yehova wakamupa Yesu mazaza agho Iye wakapangana nayo. Kufumira nyengo iyo, Yesu waŵusa kucanya nga ndi Karonga wakwimikika wa Yehova.—Daniel 7:13, 14.

3. Yehova wali kusora ŵanarumi na ŵanakazi ŵamagomezgeko kufuma mu caru capasi kuya kucanya. Iwo ŵamkuwusa nga mbakaronga, ŵeruzgi, ndiposo ŵasofi pamoza na Yesu pa mtundu wa ŵantu. (Luka 22:28-30; Civumbuzi 5:9, 10) Yesu wakaŵacema ŵakuwusa naye pamoza mu Ufumu wake aŵa kuŵa “kamskambo kacoko.” Ciŵerengero cawo ndi 144,000.—Luka 12:32; Civumbuzi 14:1-3.

4. Yesu wati wakhazikiskika kuŵa Karonga, wakamuponya Satana na ŵangero ŵake ŵaheni kufuma kucanya kumuwiskira iye pasi pafupi na caru capasi. Ndico ncifukwa vintu vyahenipa comene nteura pano pa caru capasi kuyambira 1914. (Civumbuzi 12:9, 12) Nkondo, njala, videro, kwandana kwa ucikana-marango—vyose ivi ncigaŵa ca “cimanyikwiro” cakurongora  kuti Yesu wakuwusa nakuti kaŵiro aka kavintu kali mu mazuŵa ghake ghaumaliro.—Mateyu 24:3, 7, 8, 12; Luka 21:10, 11; 2 Timote 3:1-5.

5. Mwasonosono Yesu wazamweruzga ŵantu kuŵapatulanya nga ndi umo muliska wakupatulira mberere ku mbuzi. “Mberere” mbene aŵo ŵizamkujisimikizgira ŵekha pakweru kuŵa ŵakugomezgeka. Iwo ŵizamkupokera umoyo wamuyirayira pa caru capasi. “Mbuzi” ndi aŵo ŵizamkuŵa ŵakana Ufumu wa Ciuta. (Mateyu 25:31-34, 46) Muntazi sonosono apa, Yesu waparanyenge ŵose aŵo ŵali nga ni mbuzi. (2 Ŵatesalonika 1:6-9) Usange mukukhumba kuŵa yumoza wa “mberere” za Yesu, mukwenera kutegherezga ku uthenga wa Ufumu na kucitapo kantu mwakuyana na ivyo mukusambira.—Mateyu 24:14.

6. Sono caru ncakugaŵikana mu vyaru vinandi comene. Ciri cose ciri na boma lake. Kwene kanandi mitundu iyi yikutimbana. Kweni Ufumu wa Ciuta wamkuhalira maboma ghose gha ŵantu. Iwo wizamkuwusa nga ndi boma lekha pa caru cose capasi. (Daniel 2:44) Penepapo kuti kwamkuŵaso nkondo cara, nesi ucigeŵenga, na ciwawa. Ŵantu wose ŵizamkukhala pamoza mu mtende na mu umoza.—Mika 4:3, 4.

7. Mu Muwuso wa Yesu wa Vyaka Cikwi, ŵakugomezgeka ŵamkuzgoka ŵarunji, ndipo caru cose capasi camkuŵa paradiso. Pakukamala vyaka cikwi, Yesu wamkuŵa wacita na kufiska vyose ivyo Ciuta wakamtuma. Penepapo wamukuwezgera Ufumu ku Ŵawiske. (1 Ŵakorinte 15:24) Mwalekeraci kuphalirako ŵanyinu na ŵakutemweka ŵinu za ico Ufumu wa Ciuta uzamucita?

[Cithuzithuzi pa peji 13]

Mu muwuso wa Yesu, nta mwamkuŵaso thinko nesi kusankana mitundu