Sambiro 15

Kovwira Ŵanji Kucita Khumbo la Ciuta

Cifukwa ncici kuphalira ŵanji za ico mukusambira? (1)

Mba njani aŵo mungagaŵana nawo makani ghawemi? (2)

Nkaro yinu yikuŵakhwafya uli ŵanji? (2)

Mpauli apo mungapharazga pamoza na mpingo? (3)

1. Kufika apa mwasambira vintu vinandi comene viwemi kufuma mu Baibolo. Cimanyisko ici cikwenera kumukhuŵilizgani kusanga wuntu wa Cikristu. (Ŵaefeso 4:22-24) Cimanyisko ca nga ndi ici ncakukhumbikwa kwa imwe kuti musange umoyo wamuyirayira. (Yohane 17:3) Ndipouli, ŵanji nawoso ŵakukhumba kupulika makani ghawemi kuti nawo ŵaponoskeke. Ŵakristu ŵose ŵaunenesko ŵakwenera kucitira ukaboni ku ŵanji. Ndi languro la Ciuta.—Ŵaroma 10:10; 1 Ŵakorinte 9:16; 1 Timote 4:16.

2. Mungamba mwakugaŵana na awo ŵali pafupi namwe vintu viwemi ivyo mukusambira. Viyowoyeni ku mbumba yinu, ŵabwezi, ŵanyinu ŵa kusukulu, na ŵanyinu pa ncito. Iŵani ŵacisungusungu kweniso ŵakuzizipizga pakucita nteura. (2 Timote 2:24, 25) Kumbukirani kuti ŵantu nyengo zinandi ŵakuwona makhaliro gha muntu kwakuruska umo ŵakupulikira ivyo wakuyowoya. Nteura nkaro yinu yiwemi yingaguza ŵanji kupulikizga ku uthenga uwo mukuŵaphalira.—Mateyu 5:16; 1 Petros 3:1, 2, 16.

3. Mukuruta kwa nyengo, mungaŵa na wenelero wakuyamba kupharazga na mpingo wa Ŵakaboni ŵa Yehova ŵapafupi namwe. Ili ndi sitepe lakukhumbikwa comene mu kuruta kwinu pantazi. (Mateyu 24:14) Cate ciŵe cakukondweska uli usange mwate muŵe na mwaŵi kovwira yunji kuŵa mteŵeti wa Yehova na kukapoka umoyo wamuyirayira!—1 Ŵatesalonika 2:19, 20.