Sambiro 10

Maluso Gheneagho Ciuta Wakutinka

Mungapulika uli na vintu ivyo Ciuta wakuti viheni? (1)

Ndi makhaliro nga gha kugonana agho ngaheni? (2)

Mkristu wangakuwona uli kuteta utesi? (3) kutchova njuga? (3) kwiba? (3) ciwawa? (4) kugomezga mizimu? (5) uloŵevu? (6)

Kasi muntu wangamasukako uli ku nkalo ziheni izi? (7)

1. Ŵateŵeti ŵa Ciuta ŵakutemwa ico nciwemi. Kweni ŵakweneraso kusambira kutinka ico nciheni. (Salmo 97:10) Ici cikung’anamura kutcheŵa tumaluso tunyake uto Ciuta wakutinka. Kasi ghanji mwa maluso agha ndi ngani?

2. Uzaghali: Kugonana pambere mundatorane, ureŵi, kugonana na cinyama, kugonana na mubali wako, na mathanyula nzakwananga zikulu comene pamaso pa Ciuta. (Leviticus 18:6; Ŵaroma 1:26, 27; 1 Ŵakorinte 6:9, 10) Usange mwanakazi na mwanarumi ŵakukhala pamoza kwene mbambura kutorana, ŵapatukane panji ŵatoleranethu mwa dango.—Ŵahebere 13:4.

3. Utesi, Kutchova Njuga, Kwiba: Yehova Ciuta nta wangateta. (Tito 1:2) Ŵantu aŵo ŵakukhumba cizomerezgo cake ŵakwenera kutceŵa utesi. (Zintharika 6:16-19; Ŵakolose 3:9, 10) Mucitiro uliwose wa njuga ukwendezgana na uryezi. Mwanteura Ŵakristu kuti ŵakuŵamo na cigaŵa cara mu mtundu uliwose wa njuga, nga ndi njuga za vyamalotare, viphalizgano vya mahaci, na njuga za waciwona-njani.  (Ŵaefeso 5:3-5) Ndipo Ŵakristu kuti ŵakwiba cara. Kuti mwadala ŵakugula katundu wakwiba cara nesi kutora cintu kwambula cizomerezgo.—Exodus 20:15; Ŵaefeso 4:28.

4. Ukari, Ciwawa: Ukari wambura kujikora ungawuska ciwawa. (Genesis 4:5-8) Muntu wa ciwawa kuti wangaŵa mubwezi wa Ciuta cara. (Salmo 11:5; Zintharika 22:24, 25) Mbubudi kuwezgera panji kulifyira uheni pa uheni wa vintu ivyo ŵanji ŵangaŵa ŵaticitira.—Zintharika 24:29; Ŵaroma 12:17-21.

5. Mayele na Kugomezga Mizimu: Ŵantu ŵanji ŵakukafumbira ku nkongono za mizimu kuti ŵacizge matenda. Ŵanji ŵakulowa awa ŵakuŵatinka kuti ŵarware nyengo zinyake na kuŵakoma wuwo. Vyose ivi vikukhuŵirizgika na nkongono ya Satana. Mwanteura Ŵakristu ŵangaŵangamo na cigaŵa cara mu ciricose ca ivyo. (Duteronome 18:9-13) Kukhala pafupi na Yehova nciskango cikuru comene cakutivikilira kufuma ku mayele agho ŵanji ŵangaticitira.—Zintharika 18:10.

6. Uloŵevu: Nciheni cara kumwako tuvinyo pacoko, moŵa panji vyakumwa vinyake vyakuloŵezga. (Salmo 104:15; 1 Timote 5:23) Kwene kumwa kwakujumpizga na uloŵevu mbubudi pamaso pa Ciuta. (1 Ŵakorinte 5:11-13; 1 Timote 3:8) Kumwa kwakujumpa muyeso nkuheni ku umoyo winu kweniso kungaparanya mbumba yinu. Kungamupangiskaniso kunjizgika mukuyezgeka kunyake mwaluŵiro comene.—Zintharika 23:20, 21, 29-35.

7. Ŵantu aŵo ŵakucita ivyo Ciuta wakuti viheni “kuti ŵati ŵaharenge Ufumu wa Ciuta cara.” (Ŵagalatiya 5:19-21) Usange mukumutemwa nadi Ciuta nakuti mukukhumba kumukondweska, mungamasukako ku maluso ghaheni agha. (1 Yohane 5:3) Sambirani kutinka ico Ciuta wakuti nciheni. (Ŵaroma 12:9) Temwani kwendezgana na aŵo ŵali na makhaliro ghauciuta. (Zintharika 13:20) Ŵarara-ŵarara Ŵacikristu ŵangamovwirani. (Yakobe 5:14) Kwakuruska vyose, gomezgani covwiro ca Ciuta kwizira mu pempero.—Ŵafilipi 4:6, 7, 13.

[Vithuzithuzi pa peji 20, 21]

Ciuta wakutinka uloŵevu, kwiba, kutchova njuga, na macitiro gha ciwawa