Sambiro 3

Yesu Kristu Ndi Njani?

Cifukwa ncici Yesu wakucemeka Mwana “muŵere” wa Ciuta? (1)

Cifukwa ncici wakucemeka “Mazgu”? (1)

Cifukwa ncici Yesu wakiza ku caru nga ndi muntu? (2-4)

Cifukwa ncici wakacitanga vyamintondwe? (5)

Ncici ico Yesu wacitenge muntazi sonosono apa? (6)

1. Yesu wakakhalanga kucanya nga ndi muntu wauzimu pambere iye wandize pa caru capasi. Wakaŵa cirengiwa cakudanga ca Ciuta, lekani wakucemeka Mwana “muŵere” wa Ciuta. (Ŵakolose 1:15; Civumbuzi 3:14) Yesu ndi Mwana yekha uyo Ciuta wakamulenga mwa iye yekha. Yehova wakagwiriskira ncito Yesu pambere wandizge pa caru ca pasi nga ndi “fundi” wake kufuma uko vyose vikalengeka kucanya na pano pacaru capasi. (Zintharika 8:22-31; Ŵakolose 1:16, 17) Ciuta wakamugwiriskiraso ncito nga ndi muyowoyeri Wake murara. Lekani Yesu wakucemeka “Mazgu.”—Yohane 1:1-3; Civumbuzi 19:13.

2. Ciuta wakatumizga Mwana Wake ku caru capasi mwakuwusamya umoyo wake kuya mu ntumbo ya Mariya. Mwanteura kuti Yesu wakaŵa na ŵawiske ŵawuntu cara. Ndico ncifukwa kuti wakanjizgika mukwananga nesi kuleka kucita urunji cara. Ciuta wakatuma Yesu ku caru capasi pa vifukwa vitatu: (1) Kuti watisambizge unenesko pakunena za Ciuta (Yohane 18:37), (2) kusunga ukongorekwa wakufikapo, nakutisidira bambiro kuti timurondezgenge (1 Petros 2:21), na (3) kupereka umoyo wake sembe ya kuwufwatura mtundu wa ŵantu kufuma ku kwananga na nyifwa. Kasi cifukwa ncici ici cikakhumbikwanga?—Mateyu 20:28.

3. Mwakuleka kupulikira languro la Ciuta, muntu wakwamba, Adamu, wakacita ico Baibolo likuti “kwananga.” Nteura Ciuta wakarangula kuti wafwenge. (Genesis 3:17-19) Iye wakayanaso cara na cipimo ca Ciuta, nteura nta wakaŵaso wakufikapo. Mwapacokopacoko wakacekura ndipo wakafwa. Adamu wakaŵanjizga ŵana ŵake ŵose mukwananga. Ndico ncifukwa nase tikucekura, tikurwara, na kufwa. Kasi mtundu wa ŵantu wukate wuthaskike uli?—Ŵaroma 3:23; 5:12.

 4. Yesu wakaŵa muntu wakufikapo nga ndi Adamu. Mwakupambanako na Adamu, Yesu wakaŵa wakupulikira Ciuta fikepo nanga ni muviyezgo vikuru. Mwanteura wakaŵa wakwenerera nkanira kupereka sembe umoyo wake wakufikapo kulipilira kwananga kwa Adamu. Ici ndico Baibolo likucema kuti “thumba [“cakuwombolera,” NW].” Ŵana ŵa Adamu mwanteura ŵakenera kufwatulika kufuma ku njeruzgo ya nyifwa. Ŵose aŵo ŵakugomezga mwa Yesu ŵangagowokeleka zakwananga zawo nakupokera umoyo wamuyirayira.—1 Timote 2:5, 6; Yohane 3:16; Ŵaroma 5:18, 19.

5. Apo Yesu wakaŵa pa caru capasi wakacizga ŵarwari, wakaryesa ŵanjara, ndiposo wakacetamiska cimpupuru. Wakawuska nanga mbakufwa. Kasi cifukwa ncici wakacita vyamintondwe? (1) Wakacita citima na ŵantu aŵo ŵakatambulanga, ndipo wakakhumba kuŵavwira. (2) Vyamintondwe vyake vikamusimikizgira kuti ndi Mwana wa Ciuta. (3) Vikarongoranga ivyo wazamukucita ku ŵantu ŵa kupulikira mu muwuso wake nga ndi Karonga pa caru capasi.—Mateyu 14:14; Marko 2:10-12; Yohane 5:28, 29.

6. Yesu wakafwa ndipo wakawuskika na Ciuta nga ncilengiwa ca mzimu, nakuwelera kucanya. (1 Petros 3:18) Kufumira nyengo iyo, Ciuta wamuŵika iye Karonga. Sonosono apa Yesu wizamukuwuskapo uheni wose na kusuzgika kufuma pa caru ici capasi.—Salmo 37:9-11; Zintharika 2:21, 22.

[Vithuzithuzi pa peji 7]

Uteŵeti wa Yesu ukasazgamo kusambizga, kucita vyamintondwe, nanga ndi kupereka umoyo wake cifukwa ca ise