‘Ŵakamanya Yayi’

KUZEREZGA cenjezgo kungaŵa kwakupweteka.

Mu 1974, ŵanthu ŵa mu msumba wa Darwin ku Australia, ŵakaŵa mukati kunozgekera viphikiro apo maberu ghakucenjezga kuti kuŵenge kavuluvulu wakofya ghakayamba kulira. Kweni mu msumba wa Darwin mukaŵa mundacitikepo kavuluvulu wakofya kwa vilimika 30. Sono mungaŵa wuli kavuluvulu? Ŵanthu ŵanandi ŵakaghanaghananga kuti cimphepo ici ciŵenge cakofya yayi, mupaka apo ŵakati ŵayamba kuwona kuti cayamba kunyamura mtenje wa nyumba zawo na kuwiska viliŵa vya nyumba izo ŵakajoŵamo. Pakufika namulenji, msumba uwu ukabwanganduka.

Ku Colombia mu Novemba 1985, vibala vyakocha vikaphulika kufuma pasi. Vibala ivi vikasungunura maji agho ghakukhoma mu caru cakuzizima ici, na kupanga mathipa agho ghakawundira ŵanthu ŵakukwana 20,000 mu msumba wa Armero. Kasi ŵanthu aŵa ŵakacenjezgekerathu yayi? Phiri ilo likaphulika likasunkhunyikanga kwa myezi yinandi. Ndipouli, pakuti mu caru ici mukutemwa kucitika vindindindi na kuphulika kwa caru, ŵanthu ŵanandi ŵakazgoŵera waka ndipo ŵakaŵikangako mahara yayi. Ŵalara ŵa boma ŵakaphalirika cenjezgo ili, kweni ŵakasoka yayi ŵanthu. Mawayilesi ghakaphaliranga ŵanthu kuti ŵangopanga yayi. Mu machalichi, ŵanthu ŵakaphalirikanga kuti ŵangafipanga mtima yayi. Mise yinyake, phiri likaphulika kaŵiri. Kasi imwe mukatenge mulekenge katundu winu na kucimbira? Mbanthu ŵacoko waka awo ŵakayezga kucimbira kweni ŵanandi ŵakacedwa.

Kanandi, ŵanthu awo ŵakumanya za vindindindi ŵakuneneska comene para ŵapima kuti malo ghakuti na ghakuti kucitikenge cindindindi. Kweni ŵangayowoya yayi nyengo yeneco iyo cicitikirenge. Mu 1999, vindindindi vikakoma ŵanthu ŵakukwana 20,000 pa caru cose. Ŵanandi mwa ŵanthu awo ŵakafwa ŵakaghanaghananga kuti iwo vingaŵacitikira yayi.

Kasi Mukucita Nagho Wuli Macenjezgo Ghakufuma kwa Ciuta Iye Mwene?

Baibolo likayowoyerathu kale vinthu ivyo vizamulongora kuti umaliro wuli pafupi. Pa nkhani iyi, likuticiska kuti tikumbukire “mazuŵa gha Nowa.” “Mu mazuŵa ghara, apo ciwowota cikaŵa cindize,” ŵanthu ŵakatangwanikanga na milimo yawo ya nyengo zose, nangauli ŵakafipanga  mtima na kuthandazgika kwa ciwawa. Kweni cenjezgo ilo Ciuta wakapeleka kwa mteŵeti wake Nowa, ‘ŵakalimanya yayi mupaka cikiza ciwowota, ndipo cikaŵakukura wose.’ (Mateyu 24:37-39) Kasi imwe mukatenge mupulikirenge cenjezgo? Kasi panyengo yasono mukupulikira?

Wuli muŵenge kuti mukukhala pafupi na Nyanja ya Mucere mu Sodomu, munyengo ya Loti, mwana wa mukuru wa Abrahamu? Msumba uwu ukaŵa nga ni paradiso. Ukaŵa msumba usambazi comene. Ŵanthu ŵakakhalanga mwakudemwera. Mu mazuŵa gha Loti, ŵanthu ‘ŵakaryanga, ŵakamwanga, ŵakagulanga, ŵakaguliskananga, ŵakapandanga, ŵakazenganga.’ Mukhaliro wa ŵanthu mu msumba uwu ukaŵa uheni comene. Kasi mukatenge mupulikirenge cenjezgo la Loti apo wakasuskanga mikhaliro yiheni? Kasi mukatenge mupulikirenge apo wakatenge wamuphaliraninge kuti Ciuta waparanyenge msumba wa Sodomu? Panji mukatenge muwonenge nga wakucezga waka, nga ni umo ŵakacitira ŵanyamata awo ŵakatenge ŵaŵenge ŵakweni ŵake? Kasi mukatenge mwambenge kucimbira na kughanaghanaso ivyo mwaleka kumanyuma nga ni umo wakacitira muwoli wa Loti? Nangauli ŵanthu ŵanyake ŵakaŵikako mahara yayi ku cenjezgo, kweni pa zuŵa ilo Loti wakafumira mu Sodomu, “kukarokwa vura ya moto na vyoto kufuma kucanya, ndipo vikaŵaparanya wose.”—Luka 17:28, 29.

Ŵanthu ŵanandi mazuŵa ghano ŵakudemwera. Kweni viyelezgero ivi vili kusungika mu Mazgu gha Ciuta kuti viŵe cenjezgo kwa ise, kuti vitikhuŵirizge kuti TIŴE MASO!

[Bokosi/Cithuzithuzi pa peji 22]

Kasi Cigumula Cikaŵako Nadi?

Ŵanthu ŵanandi ŵakususka kuti cikaŵako. Kweni Baibolo likuti cikaŵako.

Yesu Khristu iye mwene wakayowoyapo za cigumula, ndipo wakaŵako apo cikacitikanga, wakawonanga kufuma kucanya.

[Bokosi/Cithuzithuzi pa peji 23]

Kasi Misumba ya Sodomu na Gomora Yikaparanyika Nadi?

Ŵanthu awo ŵakujima na kufukura vinthu vya kale ŵakucitira ukaboni nkhani iyi.

Mabuku gha mbiri yakale ghakuzunura za ici.

Yesu Khristu wakakhozgera cakucitika ici, ndipo cikuyowoyeka mu mabuku 14 ghakupambanapambana mu Baibolo.